ଭୁବନେଶ୍ୱର,୨୯/୦୯: ଦେଶରୁ ଏବେ ମୌସୁମୀ ପ୍ରତ୍ୟାହାର ପ୍ରକ୍ରିୟା ଆରମ୍ଭ ହୋଇଛି । ରାଜସ୍ଥାନରୁ ଅନେକ ସ୍ଥାନରୁ ମୌସୁମୀ ପ୍ରତ୍ୟାହାର ହେଉଛି । ଓଡ଼ିଶାରୁ ମୌସୁମୀ ପ୍ରତ୍ୟାହାରର ସ୍ୱାଭାବିକ ତାରିଖ ଅକ୍ଟୋବର ଦ୍ୱିତୀୟ ସପ୍ତାହ ରହିଛି । ଏଥିପାଇଁ ଅବଗଣନା ଆରମ୍ଭ ହୋଇଥିବା ବେଳେ ତଥାପି ରାଜ୍ୟର ୪ ଜିଲ୍ଲାରେ ବର୍ଷା ନିଅଣ୍ଟିଆ ରହିଛି । କେନ୍ଦୁଝର, ଦେବଗଡ଼, ଭଦ୍ରକ ଓ ଝାରସୁଗୁଡ଼ାରେ ମୌସୁମୀ ବର୍ଷା ସ୍ଥିତି ନିଅଣ୍ଟିଆ ଥିବା ପାଣିପାଗ ବିଭାଗ ପୂର୍ବାନୁମାନ କରିଛି ।
ଜୁନ୍ ୧ ତାରିଖରୁ ଏବେ ସୁଦ୍ଧା ରାଜ୍ୟରେ ୧୧୩୮.୯ମିମି ବର୍ଷା ହେବା କଥା । କିନ୍ତୁ ୧୦୯୦ ମିମି ବର୍ଷା ହୋଇଛି । ଭଦ୍ରକରେ ସର୍ବାଧିକ ୨୬% ନିଅଣ୍ଟିଆ ବର୍ଷା ହୋଇଛି । ଦେବଗଡ଼ରେ ୨୩%, ଝାରସୁଗୁଡ଼ାରେ ୨୨% ଓ କେନ୍ଦୁଝରରେ ୨୦% ନିଅଣ୍ଟିଆ ବର୍ଷା ହୋଇଛି । ନୂଆପଡ଼ା ଓ ମାଲକାନଗିରିରେ ସ୍ୱାଭାବିକଠାରୁ ଅଧିକ ବର୍ଷା ହୋଇଥିବାବେଳେ ବାକି ୨୪ଟି ଜିଲ୍ଲାରେ ସ୍ୱାଭାବିକ ବର୍ଷା ହୋଇଛି । ଚାନ୍ଦବାଲିରେ ୨୬.୯ ଓ ନୂଆପଡ଼ାରେ ୧୪.୪ମିମି ବର୍ଷା ହୋଇଛି।
