ନୂଆଦିଲ୍ଲୀ: ଏକ ଦେଶ ଏକ ନିର୍ବାଚନ ସହ ଜଡିତ ବହୁପ୍ରତିକ୍ଷୀତ ବିଧେୟକ ମଙ୍ଗଳବାର ଲୋକସଭାରେ ଆଗତ କରାଯିବ । ବିଭିନ୍ନ ଜାତୀୟ ଗଣମାଧ୍ୟମର ରିପୋର୍ଟରୁ ଏହା ଜଣାପଡ଼ିଛି । ସୂଚନା ଅନୁସାରେ ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ ଲୋକସଭାରେ ଏକ ଦେଶ ଏକ ନିର୍ବାଚନ ବିଲ୍ ଆଗତ କରିବେ । ଏହା ପୂର୍ବରୁ ଡିସେମ୍ୱର ୧୬ର କାର୍ଯ୍ୟସୂଚୀରେ ଏହାକୁ ସାମିଲ କରାଯାଇଥିଲା, କିନ୍ତୁ ବିଲ୍ ଉପସ୍ଥାପନ ହେଲା ନାହିଁ । ସରକାର ପୂର୍ବରୁ ବିଧେୟକର ପ୍ରତିଲିପି ସମସ୍ତ ସାଂସଦ ଅଧ୍ୟୟନ ପାଇଁ ଦେଇସାରିଛନ୍ତି ।
ସୂଚନା ଅନୁସାରେ କେନ୍ଦ୍ର ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ ମଙ୍ଗଳବାର ସଂସଦର ନିମ୍ନ ସଦନରେ ସମ୍ୱିଧାନର (୧୨୯ତମ) ବିଧେୟକ ଏବଂ କେନ୍ଦ୍ର ଶାସିତ ପ୍ରଦେଶ ଆଇନ (ସଂଶୋଧନ) ବିଧେୟକ ଉପସ୍ଥାପନ କରିବେ । ପ୍ରଧାନମନ୍ତ୍ରୀ ମୋଦୀଙ୍କ ଅଧ୍ୟକ୍ଷତାରେ କେନ୍ଦ୍ର ମନ୍ତ୍ରିମଣ୍ଡଳ ଲୋକସଭା ଏବଂ ରାଜ୍ୟ ବିଧାନସଭା ନିର୍ବାଚନକୁ ଏକାସଙ୍ଗରେ କରିବା ପାଇଁ ସାମ୍ୱିଧାନିକ ସଂଶୋଧନ ବିଧେୟକୁ ଡିସେମ୍ୱର ୧୨ରେ ମଞ୍ଜୁରି ଦେଇଥିଲେ ।
କେନ୍ଦ୍ର ମନ୍ତ୍ରିମଣ୍ଡଳ ଦୁଇ ପ୍ରସ୍ତାବିତ ବିଲକୁ ମଞ୍ଜୁରି ଦେଇସାରିଛି । ସମ୍ୱିଧାନ ସଂଶୋଧନ ବିଧେୟକ ପାରିତ କରିବା ପାଇଁ ଦୁଇ-ତୃତୀୟାଂଶ ସମର୍ଥନ ଦରକାର ଥିବା ବେଳେ ଦ୍ୱିତୀୟ ବିଧେୟକଙ୍କ ପାଇଁ ଗୃହରେ ସାଧାରଣ ବହୁମତ ଦରକାର ପଡ଼ିବ । ଉଲ୍ଲେଖଯୋଗ୍ୟ ଯେ ସଂସଦର ଶୀଳକାଳୀନ ଅଧିବେଶନ ଡିସେମ୍ୱର ୨୦ରେ ଶେଷ ହେବ । ଯଦି ଏହି ବିଧେୟକ ଡିସେମ୍ୱର ୧୭ରେ ଆଗତ କରାନଯାଏ ତେବେ ସରକାରଙ୍କ ପାଖରେ କେବଳ ତିନି କାର୍ଯ୍ୟ ଦିବସ ରହିବ ।
