ବଡ଼ବିଲ ୩୦।୧୨ : କେନ୍ଦୁଝର ଜିଲ୍ଲା ଚମ୍ପୁଆ ରେଞ୍ଚ ଚମକପୁର ପଞ୍ଚାୟତ ରେଭେନ୍ସାପୁର (କ) ଗାଁରେ ଅଘଟଣ । ଗୋଠଛଡ଼ା ଦନ୍ତାହାତୀର ଆକ୍ରମଣରେ ଚାଲିଯାଇଛି ଜଣଙ୍କ ଜୀବନ । ମୃତକ ସେହି ଗାଁ ଡଙ୍ଗାକଟା ସାହିର ୪୫ ବର୍ଷୀୟ ରସା ମୁଣ୍ଡା ବୋଲି ଜଣାପଡିଛି ।
ଖବର ଅନୁଯାୟୀ, ଶନିବାର ବିଳମ୍ବିତ ରାତି ପ୍ରାୟ ୩ଟା ସମୟରେ ରସା ମୁଣ୍ଡା ଶୌଚ ହେବା ପାଇଁ ଘର ବାହାରକୁ ବାହାରିଥିଲେ । ଏହି ସମୟରେ ସେ ଦନ୍ତା ହାବୁଡ଼ରେ ପଡିଯାଇଥିଲେ । ସେଠାରୁ ଦୌଡି ଆସିବାକୁ ଚେଷ୍ଟା କରିଥିଲେ , ହେଲେ ହାତୀ କବଳରୁ ନିଜ ଜୀବନ ବଞ୍ଚାଇପାରିନଥିଲେ । ଦନ୍ତା ରସା ମୁଣ୍ଡାଙ୍କୁ ଦଳିଦେଇଥିଲେ । ଯାହାଫଳରେ ତାଙ୍କର ଜୀବନ ଚାଲିଯାଇଛି । ସେପଟେ ଘଟଣା ସଂପର୍କରେ ଖବର ପାଇ ବନ କର୍ମଚାରୀ ଏବଂ ଚମ୍ପୁଆ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଚମ୍ପୁଆ ଉପଖଣ୍ଡ ଚିକିତ୍ସାଳୟକୁ ପଠାଇଛି ।
