କଟକ ୧୩।୦୧ : କଟକରେ ପୁଣି ଅଘଟଣ । ମାଞ୍ଜା ସୂତା ଲାଗି ଜଣେ ବ୍ୟକ୍ତି ଆହତ ହୋଇଛନ୍ତି । ଆହତ ବ୍ୟକ୍ତି କଟକ ରାଜେନ୍ଦ୍ର ନଗର ଅଞ୍ଚଳର ଅନିକେତ ଦାସ ବୋଲି ଜଣାପଡିଛି । ବର୍ତ୍ତମାନ ସେ ଆହତ ଅବସ୍ଥାରେ ମେଡିକାଲରେ ଭର୍ତ୍ତି ହୋଇଛନ୍ତି ।
ଖବର ଅନୁଯାୟୀ, ରବିବାର ଅନିକେତ ତ୍ରିଶୁଳିଆରୁ ନିଜ ଘର କଟକକୁ ଫେରୁଥିଲେ। ଏହି ସମୟରେ ରାଜେନ୍ଦ୍ର ନଗର ନିକଟରେ ଏକ ମାଞ୍ଜା ସୂତା ଅନିକେତଙ୍କ ଦେହରେ ଲାଗିଥିଲା । ଯାହାଦ୍ୱାରା ତାଙ୍କ ବେକ ଏବଂ ହାତ ଆଙ୍ଗୁଠିରେ କ୍ଷତ ଲାଗିଛି । ଏହାପରେ ଅନିକେତଙ୍କୁ ତୁରନ୍ତ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ଗତ କିଛି ଦିନ ହେବ କଟକରେ ଅଧିକ ପରିମାଣରେ ଗୁଡି ଉଡୁଛି । ତେଣୁ ଏସବୁକୁ ତୁରନ୍ତ ବନ୍ଦ କରିବାକୁ ଅନିକେତ ଦାବି କରିଛନ୍ତି ।
ଅନ୍ୟପେଟ ମଙ୍ଗଳବାର ଦିନ ପବିତ୍ର ମକର ସଂକ୍ରାନ୍ତି । କଟକ ଆକାଶରେ ଅନେକ ଗୁଡି ଉଡିବାର ଆଶଙ୍କା ରହିଛି । ଏହାପୂର୍ବରୁ ଆକ୍ସନକୁ ଆସିଛି ପ୍ରଶାସନ । ପୋଲିସ ପକ୍ଷରୁ କଟକର ବିଭିନ୍ନ ସ୍ଥାନରେ ଚଢାଉ ହୋଇ ମାଞ୍ଜା ସୂତାର ଯାଞ୍ଚ କରାଯାଉଛି । ଚୌଧୁରୀ ବଜାର ଓ କାଠଗଡ଼ା ସାହିରେ ପୁରୀ ଘାଟ ଥାନା ପୋଲିସ ପକ୍ଷରୁ ଚଢାଉ ହୋଇଛି ।
