ଖଲ୍ଲିକୋଟ ୧୨।୧୧ : ଚୋରାରେ ଚାଲାଣ ହେଉଥିଲା ଗୋମାଂସ । ଗଞ୍ଜାମ ଜିଲ୍ଲା ଖଲ୍ଲିକୋଟ ନିକଟରୁ ୧ କ୍ୱିଇଣ୍ଟାଲ୍ରୁ ଅଧିକ ଗୋମାଂସ ଜବତ ହୋଇଛି । ଗୋମାଂସ ସହ ଜଣେ ବ୍ୟକ୍ତିଙ୍କୁ ଅଟକ ରଖିଛି ଖଲ୍ଲିକୋଟ ଥାନା ପୋଲିସ ।
ଖବର ଅନୁଯାୟୀ, ଖୋର୍ଦ୍ଧା ଅଞ୍ଚଳର ଆକ୍ରମ ଖାନ୍ ନାମକ ଜଣେ ବ୍ୟବସାୟୀ ଏକ ସ୍କୁଟିରେ ଗୋ ମାଂସ ନେଇ ବ୍ରହ୍ମପୁର ଅଭିମୁଖେ ଯାଉଥିଲେ । ଏହି ସମୟରେ ବେଆଇନ୍ ମଦ କାରବାର ନେଇ ଚେକିଂ କରୁଥିବା ବେଳେ ଆକ୍ରମ ଖାନ୍ଙ୍କ ସ୍କୁଟି ସହ ଅଟକାଇଥିଲା ଅବକାରୀ ପୋଲିସ । ଏହାପରେ ଯାଞ୍ଚ କରିଥିଲା, ଯେଉଁଥିରେ ଏକ ବ୍ୟାଗ୍ରେ ଗୋମାଂସ ଥିବା ଜଣାପଡିଥିଲା । ଦୁଇଟି ବ୍ୟାଗ୍ ଓ ସ୍କୁଟି ଡିକିରେ ପିଲିଥିନ୍ ଭର୍ତ୍ତି ଗୋ ମାଂସ ମିଳିଥିଲା । ସମସ୍ତ ଗୋ ମାଂସ ସହ ଆକ୍ରମଙ୍କୁ ଖଲ୍ଲିକୋଟ ପୋଲିସକୁ ହସ୍ତାନ୍ତର କରିଥିଲେ ବଜରଙ୍ଗୀ ଦଳ । ତେବେ ଏତେ ପରିମାଣର ଗୋମାଂସ କେଉଁ ସ୍ଥାନକୁ ଚାଲାଣ ହେଉଥିଲା । ସେନେଇ ଛାନ୍ଭିନ୍ ଜାରି ରଖିଛି ଖଲ୍ଲିକୋଟ ପୋଲିସ ।
