ଭୁବନେଶ୍ୱର ୦୨/୧୧: ଭୁବନେଶ୍ୱର ବାୟୁମଣ୍ଡଳ କାଲି ସନ୍ଧ୍ୟା ଯାଏଁ ଠିକଠାକ ଥିଲା । ରାତିରେ ଦୁଇ ଘଣ୍ଟା ବାଣ ଫୁଟିବା ପରେ ହଠାତ୍ ବିଗିଡ଼ିଗଲା ପବନ । ନୂଆପଲ୍ଲୀ, ୟୁନିଟ୍-୮, ପଳାଶୁଣି ଅଞ୍ଚଳରେ ପବନ ବାରୁଦିଆ ଗନେ୍ଧଇଲା । ନିମ୍ନସ୍ତର ଖସିଗଲା ବାୟୁର ମାନ । ଏକ୍ୟୁଆଇ (ଏୟାର କ୍ୱାଲିଟି ଇନଡେକ୍ସ) ପାଲଟିଗଲା ନିମ୍ନମାନର । ଏଥର ଦୀପାବଳିରେ ଡବଲ୍ ବାଣ ଫୁଟାଇଛନ୍ତି ଅନେକ ।
ଗୁରୁବାର ଓ ଶୁକ୍ରବାରରେ ବାଣ ମନଇଚ୍ଛା ଫୁଟୁଛି । ପୁଲିସ କି ପ୍ରଦୂଷଣ ନିୟନ୍ତ୍ରଣ ବୋର୍ଡ କେହି କିଛି କରିପାରିନାହାନ୍ତି । ସବୁ ହାତ ବାନ୍ଧି ବସିଛନ୍ତି । ଦୀପାବଳିର ୨ ଘଣ୍ଟା ଆତସବାଜି ଅବଧି ଦୁଇ ଦିନ ମନାଇଛନ୍ତି ରାଜ୍ୟବାସୀ । ପରିଣାମ ଭୁବନେଶ୍ୱର ସମେତ ବଡ଼ବଡ଼ ସହର ବାରୁଦିଆ ଗନ୍ଧାଉଛି । କେବଳ ଭୁବନେଶ୍ୱର ନୁହେଁ, ଅନୁଗୁଳ, ତାଳଚେରରେ ବି ଏକ୍ୟୁଆଇ ନିମ୍ନ ସ୍ତରକୁ ଖସି ଯାଇଛି ଦୀପାବଳି ଆତସବାଜିରେ ।
କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ତଥ୍ୟ କହୁଛି, ଶୁକ୍ରବାର ଅପରାହ୍ନ ୪ଟାବେଳେ ତାଳଚେର ଏକ୍ୟୁଆଇ ୨୩୭, ଅନୁଗୁଳ ୨୫୯ ଥିଲା । ବାୟୁର ଏ ମାନ ଖରାପ ଶ୍ରେଣୀ ଭାବେ ଚିହ୍ନଟ କରାଯାଇଛି । ଏଭଳି ପ୍ରଦୂଷିତ ବାୟୁମଣ୍ଡଳରେ ଶ୍ୱାସକ୍ରିୟାରେ କଷ୍ଟ ହୋଇଥାଏ । ଶ୍ୱାସ ରୋଗୀଙ୍କ ପାଇଁ ପରିସ୍ଥିତି ସାଂଘାତିକ ହୋଇ ପଡ଼େ । ଭୁବନେଶ୍ୱର, କଟକ ସମେତ ବିଭିନ୍ନ ସ୍ଥାନରେ ବର୍ଷା ଯୋଗୁ ବାୟୁମଣ୍ଡଳରେ ପ୍ରଦୂଷଣ ଚାଦର କିଛି ମାତ୍ରାରେ ହଟିଛି ।
ଶୁକ୍ରବାର ଅପରାହ୍ନ ୪ଟାରେ ବାୟୁମଣ୍ଡଳରେ ଏକ୍ୟୁଆଇ ସ୍ତର ବାରିପଦାରେ ୧୫୯, ରାଉରକେଲାରେ ୧୬୨, ବଡ଼ବିଲରେ ୧୩୮, ଭୁବନେଶ୍ୱରରେ ୧୩୫, ବାଲେଶ୍ୱରରେ ୧୦୪, କଟକ ୧୦୧ ଥିଲା । ଏକ୍ୟୁଆଇ ୧୦୦ରୁ ୨୦୦ ଭିତରେ ରହିଲେ ଏହାକୁ ମଧ୍ୟମ ଧରଣର ପ୍ରଦୂଷଣ କୁହାଯାଏ । ଏଭଳି ପରିବେଶ ଫୁସଫୁସ ରୋଗୀ, ହୃଦରୋଗୀ, ଶିଶୁଙ୍କ ପାଇଁ ଶ୍ୱାସକ୍ରିୟାରେ ସମସ୍ୟା ଆଣିପାରେ । ଭାଗ୍ୟ ଭଲ, ସକାଳେ ଭୁବନେଶ୍ୱର, କଟକ ସମେତ ବିଭିନ୍ନ ଅଞ୍ଚଳରେ କିଛି କିଛି ବର୍ଷା ହୋଇଛି ।
ବର୍ଷା ଯୋଗୁ ବାୟୁମଣ୍ଡଳରେ ଜମାଟ ବାନ୍ଧି ଥିବା ଏସବୁ ବିଷାକ୍ତ ଗ୍ୟାସ ଓ ଧୂଳିକଣା ଆସ୍ତରଣ ଖସିବା ସହ ପ୍ରଦୂଷଣ ସ୍ତର କମିଥିଲା । ମାତ୍ର ଏ ବର୍ଷ ଲୋକେ ଦୁଇଦିନ ଦୀପାବଳି ପାଳନ କରୁଥିବାରୁ ପୁଣି ରାତିରେ ପ୍ରବଳ ଆତସବାଜି ହୋଇଛି । ଏଥିପାଇଁ ରାଜଧାନୀରେ ପ୍ରଦୂଷଣର ମାତ୍ରା ପୁଣି ବଢ଼ିବାକୁ ଲାଗିଲା ।
ରାତି ୮ଟାବେଳେ ଭୁବନେଶ୍ୱର ଲିଙ୍ଗରାଜ ମନ୍ଦିର ଅଞ୍ଚଳରେ ଏକ୍ୟୁଆଇ ୧୬୦ ଓ ପଟିଆରେ ୧୨୦ ଛୁଇଁଗଲା । ଅନୁଗୁଳ ସହରରେ ଗୁରୁବାର ସନ୍ଧ୍ୟା ଏକ୍ୟୁଆଇ ୯୧ ଥିଲା । ରାତି ୧୨ଟାବେଳକୁ ୧୬୫, ଭୋର ୫ଟାରେ ୨୦୯ । ଆଜି ରାତି ୮ଟାରେ ୨୪୦ । ତାଳଚେରରେ ଗୁରୁବାର ସନ୍ଧ୍ୟା ୬ଟାରେ ଥିଲା ୧୨୫, ଆଜି ରାତି ୮ଟାରେ ୨୩୮ । ସବୁଠି ଏଭଳି ଅବସ୍ଥା।
