ନୂଆଦିଲ୍ଲୀ: ଟେନିସ୍ରେ ଆଉ ଏକ ଯୁଗର ଅନ୍ତ ଘଟିଛି । ଅନ୍ୟତମ ମହାନ ଖେଳାଳି ୨୨ ଥରର ଗ୍ରାଣ୍ଡ ସ୍ଲାମ୍ ଚାମ୍ପିଅନ ରାଫେଲ୍ ନାଡାଲ ଟେନିସ୍ରୁ ଅବସର ଘୋଷଣା କରିଛନ୍ତି । ଚଳିତ ସିଜିନ୍ ତାଙ୍କ ଟେନିସ୍ କ୍ୟାରିୟରର ଶେଷ ସିଜିନ୍ ହେବ । ୩୮ ବର୍ଷୀୟ ନାଡାଲ ଏକ ଭିଡିଓ ବାର୍ତ୍ତାରେ ଟେନିସରୁ ରିୟାରମେଣ୍ଟ ଘୋଷଣା କରିଛନ୍ତି । ନାଡାଲ କହିଛନ୍ତି ଯେ ଚଳିତ ବର୍ଷ ନଭେମ୍ୱରରେ ହେବାକୁ ଥିବା ଡେଭିସ କପ୍ ଖେଳିବେ । ଏହି ଟୁର୍ଣ୍ଣାମେଣ୍ଟରେ ସେ ନିଜ ଦେଶ ସ୍ପେନକୁ ପ୍ରତିନିଧିତ୍ୱ କରିବେ । ଡେଭିସ୍ କପ୍ ଫାଇନାଲ୍ସ ଚଳିତ ଥର ସ୍ପେନର ମେଲାଗାରେ ଖେଳାଯିବ ।
ନାଡାଲ କହିଛନ୍ତି, 'ମୁଁ ପ୍ରଫେସନାଲ ଟେନିସରୁ ଅବସର ନେଉଛି । ଗତ କିଛି ବର୍ଷ ବେଶ ଆହ୍ୱାନପୂର୍ଣ୍ଣ ଥିଲା । ଖାସ୍ କରି ଗତ ୨ ବର୍ଷ ଅଧିକ ସଂଘର୍ଷପୂର୍ଣ୍ଣ ଥିଲା । ଏହା ଏକ କଠିନ ନିଷ୍ପତ୍ତି । କିନ୍ତୁ ଜୀବନରେ ସବୁ କିଛିର ଆରମ୍ଭ ଏବଂ ଅନ୍ତ ରହିଥାଏ ।'
Mil gracias a todos
— Rafa Nadal (@RafaelNadal) October 10, 2024
Many thanks to all
Merci beaucoup à tous
Grazie mille à tutti
谢谢大家
شكرا لكم جميعا
תודה לכולכם
Obrigado a todos
Vielen Dank euch allen
Tack alla
Хвала свима
Gràcies a tots pic.twitter.com/7yPRs7QrOi
ରାଫେଲ୍ ନାଡାଲ ନିଜ କ୍ୟାରିୟରରେ ଅନେକ ସମୟରେ ଶାରୀରିକ ଆଘାତର ସାମନା କରିଛନ୍ତି । ନାଡାଲ ନିଜ କ୍ୟାରିୟରରେ ୧୬ ଥର ବଡ଼ ଆଘାତର ସାମନା କରିଛନ୍ତି । ଏହା ପରେ ବି ସେ ଟେନିସ୍ ଖେଳିବା ଜାରି ରଖିଥିଲେ ଏବଂ ଅନେକ ଟାଇଟଲ୍ ଜିତିବାରେ ସଫଳ ହୋଇଥିଲେ । ଗତ ମାସରେ ନାଡାଲ ଲଭେର କପ୍ ୨୦୨୪ରୁ ନିଜ ନାଁ ଫେରାଇ ନେଇଥିଲେ । ଏହା ପ୍ରଫେସନାଲ ଟେନିସରେ ଥିଲା ତାଙ୍କର ଶେଷ ଇଭେଣ୍ଟ । ପ୍ୟାରିସ୍ ଅଲିମ୍ପିକ୍ସ ପରେ ନାଡାଲ ସ୍ପଷ୍ଟ କରିଥିଲେ ଯେ ୨୦୨୪ ଲେବର କପ୍ ତାଙ୍କର ପରବର୍ତ୍ତୀ ଟୁର୍ଣ୍ଣାମେଣ୍ଟ ହେବ । ନାଡାଲ ଲଭେର କପରେ ୨୦୧୭ରେ ପ୍ରାଗ, ୨୦୧୯ରେ ଜେନେଭା ଏବଂ ପରେ ୨୦୨୨ରେ ଇଂଲଣ୍ଡରେ ଭାଗ ନେଇଥିଲେ ।
ରାଫେଲ ନାଡାଲ ଫ୍ରାନ୍ସରେ ଖେଳାଯାଉଥିବା ଗ୍ରାଣ୍ଡ ସ୍ଲାମ୍ ଫ୍ରେଞ୍ଚ ଓପନକୁ ରେକର୍ଡ ୧୪ ଥର ଜିତିଥିଲେ । ଏହି ଟୁର୍ଣ୍ଣାମେଣ୍ଟ ଲାଲ୍ ମାଟିର କୋର୍ଟରେ ଖେଳାଯାଏ । ଏହି କାରଣରୁ ନାଡାଲଙ୍କୁ ଏହି କୋର୍ଟର ବାଦଶାହ ବୋଲି କୁହାଯାଏ ।
ରାଫେଲ ନାଡାଲ ୨୨ ଗ୍ରାଣ୍ଡ ସ୍ଲାମ୍ କେବେ କେବେ ଜିତିଛନ୍ତି
ଅଷ୍ଟ୍ରେଲିଆ ଓପନ-୨୦୦୯, ୨୦୨୨
ଫ୍ରେଞ୍ଚ ଓପନ- ୨୦୦୫, ୨୦୦୬, ୨୦୦୭, ୨୦୦୮, ୨୦୧୦, ୨୦୧୧,୨୦୧୨, ୨୦୧୩, ୨୦୧୪, ୨୦୧୭, ୨୦୧୮, ୨୦୧୯, ୨୦୨୦, ୨୦୨୨
ୱିମ୍ୱଲଡନ୍- ୨୦୦୮, ୨୦୧୦
ୟୁଏସ୍ ଓପନ- ୨୦୧୦, ୨୦୧୩, ୨୦୧୭, ୨୦୧୯
ଉଲ୍ଲେଖଯୋଗ୍ୟ ଯେ ନାଡାଲଙ୍କ ପୂର୍ବରୁ ୪ ବର୍ଷ ତଳେ ଟେନିସରେ ତାଙ୍କର ପ୍ରତିଦ୍ୱନ୍ଦ୍ୱୀ କୁହାଯାଉଥିବା ଜୋରର ଫେଡରର ସନ୍ନ୍ୟାସ ନେଇଥିଲେ । ସ୍ୱିଜରଲାଣ୍ଡର ମହାନ ଟେନିସ ଖେଳାଳି ଫେଡରର ୨୦ ଥର ଗ୍ରାଣ୍ଡ ସ୍ଲାମ ଜିତିଥିଲେ । ନାଡାଲ ଏହି ସୂଚୀରେ ଦ୍ୱିତୀୟ ସ୍ଥାନରେ ଅଛନ୍ତି । ସବୁଠାରୁ ଅଧିକ ଗ୍ରାଣ୍ଡ ସ୍ଲାମ୍ ସର୍ବିଆର ନୋଭାକ ଜୋକୋଭିଚଙ୍କ ନାଁରେ ରହିଛି । ସେ ବର୍ତ୍ତମାନ ସୁଦ୍ଧା ୨୪ ଗ୍ରାଣ୍ଡ ସ୍ଲାମ୍ ଟାଇଟଲ୍ ଜିତିଛନ୍ତି ।
