ସମ୍ବଲପୁର ୧୬।୮: କୋଲକାତାର ଆରଜି କର ମେଡିକାଲ କଲେଜ ଆଣ୍ଡ ହସ୍ପିଟାଲରେ ଟ୍ରେନି ଡାକ୍ତରୀ ଛାତ୍ରୀଙ୍କ ସହ ଗଣଦୁଷ୍କର୍ମ ଓ ହତ୍ୟା ଘଟଣାକୁ ବିରୋଧ କରି ଆନ୍ଦୋଳନରେ ବସିଲେ ଭୀମସାର ଡାକ୍ତର । ଭୀମସାର ଡାକ୍ତରୀ ଛାତ୍ରଛାତ୍ରୀ ଡାକ୍ତରଙ୍କ ସହ ଘଟିଥିବା ଅମାନୁଷିକ କାଣ୍ଡକୁ ଦୃଢ ବିରୋଧ କରିଛନ୍ତି । ଦୋଷୀଙ୍କୁ ଦଣ୍ଡ ଓ ଡାକ୍ତରଙ୍କ ସୁରକ୍ଷା ପାଇଁ ଆଇନ ଆଣିବା ପାଇଁ ଛାତ୍ରଛାତ୍ରୀ ଦାବି କରିଛନ୍ତି । ଏଥିରେ ଆରଡିଏ, ଜେଡିଏ, ଏଚଏସ, ୟୁଜି ସଂଘର ଛାତ୍ରଛାତ୍ରୀ ସାମିଲ ହୋଇଛନ୍ତି ।
ସେପଟେ ଏହି ଘଟଣାର ପ୍ରତିବାଦରେ ଇଣ୍ଡିଆନ ମେଡିକାଲ୍ ଆସୋସିଏସନ୍ (ଆଇଏମଏ) ଦେଶବ୍ୟାପୀ ୨୪ ଘଣ୍ଟିଆ କରୁଛି । ସ୍ଵାସ୍ଥ୍ୟ ସେବା ଉପରେ ଏହାର ବଡ଼ ପ୍ରଭାବ ପଡିପାରେ ବୋଲି ଆକଳନ କରାଯାଉଛି ।
ଆଇଏମଏ ପକ୍ଷରୁ ଜାରି ପ୍ରେସ୍ ବିଜ୍ଞପ୍ତିରେ କୁହାଯାଇଛି ଯେ, ମୋଡେର୍ଣ୍ଣ ମେଡିସିନର ଡାକ୍ତରମାନେ ଅଗଷ୍ଟ ୧୭ ତାରିଖ ସକାଳ ୬ଟାରୁ ଅଗଷ୍ଟ ୧୮ ତାରିଖ ସକାଳ ୬ଟା ପର୍ଯ୍ୟନ୍ତ କାର୍ଯ୍ୟବନ୍ଦ ଆନ୍ଦୋଳନ କରିବେ । ଏହି ସମୟରେ ରୋଗୀଙ୍କୁ କେବଳ ଜରୁରୀ ସେବା ପ୍ରଦାନ କରାଯିବ । ଟ୍ରେନି ମହିଳା ଡାକ୍ତରଙ୍କ ସହ ହୋଇଥିବା ଏହି ଅମାନବୀୟ ବର୍ବରକାଣ୍ଡକୁ ନେଇ ଜନସାଧାରଣରେ ଆକ୍ରୋଶ ଦେଖିବାକୁ ମିଳିଛି । ପଶ୍ଚିମବଙ୍ଗ ରାଜଧାନୀ କୋଲାକାତାରେ ବ୍ୟାପକ ବିକ୍ଷୋଭ ପ୍ରଦର୍ଶନ ଦେଖିବାକୁ ମିଳିଛି । ବହୁ ସଂଖ୍ୟାରେ ମହିଳା ରାଜରାସ୍ତାକୁ ଓହ୍ଲାଇ ପୀଡ଼ିତାଙ୍କ ପାଇଁ ନ୍ୟାୟ ଦାବି କରିଛନ୍ତି ।
ତେବେ ଦେଶରେ ଚାଞ୍ଚଲ୍ୟ ଖେଳାଇଥିବା ଏହି ସମ୍ବେଦନଶୀଳ ମାମଲାରେ ଏ ପର୍ଯ୍ୟନ୍ତ ୧୨ ଜଣ ଗିରଫ ହୋଇଛନ୍ତି । ଘଟଣାକୁ ନେଇ ବ୍ୟାକଫୁଟ୍ରେ ମମତା ବାନାର୍ଜୀଙ୍କ ଟିଏମ୍ସି ସରକାର । ହାଇକୋର୍ଟଙ୍କ ନିର୍ଦ୍ଦେଶକ୍ରମେ ସିବିଆଇକୁ ମାମଲା ହସ୍ତାନ୍ତର ହୋଇସାରିଛି ।
You Can Read:
ବିଜେଡି ଛାଡ଼ିଲେ BMC କର୍ପୋରେଟର ବନ୍ଦିତା ପାଲ୍, ସ୍ବାମୀ ବି ଦଳକୁ କଲେ ବାଏ ବାଏ
