ମୁମ୍ବାଇ ୨୫।୧୧: ମହାରାଷ୍ଟ୍ର ବିଧାନସଭା ନିର୍ବାଚନରେ ଜିତିଥିବା ୫ ସ୍ୱାଧୀନ ବିଧାୟକ ସୋମବାର ବିଜେପିକୁ ସେମାନଙ୍କ ସମର୍ଥନ ଜଣାଇଛନ୍ତି। ରାଜ୍ୟର ୨୮୮ ସଦସୀୟ ବିଧାନସଭାରେ ବିଜେପି ୧୩୨ଟି ଆସନ ଜିତିଛି। ଏଥିରେ ୫ ସ୍ୱାଧୀନ ବିଧାୟକଙ୍କ ସମର୍ଥନ ମିଳିବା ପରେ ଦଳ ଆହୁରି ମଜଭୁତ ହୋଇଛି। ବିଜେପିକୁ ସମର୍ଥନ ଜଣାଇଥିବା ସ୍ୱାଧୀନ ବିଧାୟକଙ୍କ ମଧ୍ୟରେ ରତ୍ନାକର ଗୁଟ୍ଟେ, ବିନୟ କୋରେ, ଅଶୋକରାଓ ମାନେ. ରବି ରାଣା ଓ ବିଜୟ ପାଟିଲ ଅଛନ୍ତି।
ନିର୍ବାଚନରେ ସ୍ୱାଧୀନ ଲଢି ଜିତିଥିବା ୫ ଜଣ ବିଧାୟକ ସୋମବାର ମୁମ୍ବାଇରେ ଦେବେନ୍ଦ୍ର ଫଡନବୀଶଙ୍କୁ ଭେଟି ସେମାନଙ୍କ ସମର୍ଥନ ପତ୍ର ପ୍ରଦାନ କରିଛନ୍ତି। ବିଧାନସଭା ନିର୍ବାଚନରେ ଏନଡିଏ ମୋଟ ୨୩୦ଟି ଆସନ ଜିତିଛି। ଏଥିରେ ବିଜେପି ଏକାକୀ ୧୩୨ଟି ଆସନ ଜିତିଥିବା ବେଳେ ଶିବସେନା (ସିନ୍ଦେ) ୫୭ ଓ ଏନସିପି (ଅଜିତ) ୪୧ଆସନରେ ବିଜୟୀ ହୋଇଛି। ବିଜେପି ନେତା ପ୍ରବୀଣ ଦରକରେ କହିଛନ୍ତି ଯେ ଏହା ପୂର୍ବରୁ ଅଧିକ ଆସନ ଥାଇ ମଧ୍ୟ ବିଜେପି ମୁଖ୍ୟମନ୍ତ୍ରୀ ପଦବୀ ଏକନାଥ ସିନ୍ଦେଙ୍କୁ ଦେଇଥିଲା। ହେଲେ ଏଥର ବିଜେପିର ନେତା ମୁଖ୍ୟମନ୍ତ୍ରୀ ହେବା ଦରକାର ବୋଲି ସେ କହିଛନ୍ତି।
ତେବେ ମହାଯୁତୀ ମେଣ୍ଟ ମୁଖ୍ୟମନ୍ତ୍ରୀ ପଦବୀ ନିମନ୍ତେ ଏପର୍ଯ୍ୟନ୍ତ କୌଣସି ନିଷ୍ପତ୍ତିରେ ଉପନୀତ ହୋଇ ନାହିଁ। ଏଥିପାଇଁ କେନ୍ଦ୍ରୀୟ ନେତୃତ୍ୱଙ୍କ ନିଷ୍ପତ୍ତିକୁ ଅପେକ୍ଷା କରାଯାଇଥିବା ବେଳେ ମୁଖ୍ୟମନ୍ତ୍ରୀ ଦୌଡରେ ଏକନାଥ ସିନ୍ଦେ ଥିବାର ମଧ୍ୟ ଜଣାପଡିଛି। ତେବେ ମୁଖ୍ୟମନ୍ତ୍ରୀ ପଦ କୁ ନେଇ ବିଜେପିରେ ମାନସ ମନ୍ଥନ ଚାଲିଥିବା ବେଳେ ମୁଖ୍ୟମନ୍ତ୍ରୀ ପଦ କାହାକୁ ମିଳିବ ସେ ନେଇ ନିଷ୍ପତ୍ତିକୁ ଅପେକ୍ଷା କରାଯାଇଛି।
