ନୂଆଦିଲ୍ଲୀ: ଜର୍ମାନୀରେ ଖ୍ରୀଷ୍ଟମାସ ମାର୍କେଟ୍କୁ ମାଡ଼ିଗଲା କାର୍ । ଗାଡ଼ି ଧକ୍କାରେ ୨ ମୃତ, ୬୮ଜଣ ଆହତ ହୋଇଛନ୍ତି । ୧୫ଜଣଙ୍କ ଅବସ୍ଥା ସଂକଟାପନ୍ନ ରହିଛନ୍ତି । ସମସ୍ତ ଆହତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ଗୁରୁତରଙ୍କ ସଂଖ୍ୟା ଅଧିକ ଥିବାରୁ ମୃତ୍ୟୁ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି । ଏପଟେ ଦୁର୍ଘଟଣା ଘଟାଇଥିବା କାର୍ ଚାଳକଙ୍କୁ ପୋଲିସ ଗିରଫ କରିଛି । କାର୍ ଡ୍ରାଇଭର ସାଉଦୀ ଆରବର ଜଣେ ଡାକ୍ତର ବୋଲି ଜଣାପଡ଼ିଛି ।
ସୂଚନା ଅନୁଯାୟୀ, ଜର୍ମାନୀରେ ମାଗଡେବର୍ଗରେ ଏହି ଦୁର୍ଘଟଣା ଘଟିଛି । ଖ୍ରୀଷ୍ଟମାସ ମାର୍କେଟ୍ ଭିଡ଼ ଭିତରେ ଲୋକଙ୍କ ଉପରେ କାର୍ ଚଢ଼ାଇ ଦେଇଥିଲେ । ଏହି ଦୁର୍ଘଟଣାରେ ୨ଜଣଙ୍କ ମୃତ୍ୟୁ ହୋଇଛି । ୬୮ଜଣ ଆହତ ହୋଇଛନ୍ତି । ମୃତକ ମଧ୍ୟରେ ଜଣେ ଛୋଟ ପିଲା ରହିଥିବା କୁହାଯାଉଛି । ଏହି ଦୁର୍ଘଟଣାରେ ପ୍ରଥମେ ୧୧ଜଣଙ୍କ ମୃତ୍ୟୁ ହୋଇଥିବା ଖରବ ଆସିଥିଲା । ପରେ ସରକାରୀ ଭାବେ ଦୁଇ ଜଣଙ୍କ ମୃତ୍ୟୁ ହୋଇଥିବା ସ୍ପଷ୍ଟ କରାଯାଇଥିଲା । ଅନ୍ୟପଟେ କାର୍ ଚାଳକ ସାଉଦୀ ଆରବର ଜଣେ ୫୦ ବର୍ଷୀୟ ଡାକ୍ତର । ତାଙ୍କୁ ଜର୍ମାନୀ ପୋଲିସ ତୁରନ୍ତ ଗିରଫ କରି ପଚରାଉଚରା କରୁଛି । ଏହି ଘଟଣାକୁ ଦୃଢ଼ ନିନ୍ଦା କରିଛନ୍ତି ସାଉଦୀ ଆରବ ସରକାର ।
