ନୂଆଦିଲ୍ଲୀ: ସୁପ୍ରିମକୋର୍ଟ ଆଜି (ଜାନୁଆରୀ ୧୦) ଅନଲାଇନ୍ ଗେମିଂ କମ୍ପାନୀଗୁଡ଼ିକ ଉପରେ ଜିଏସ୍ଟି ପାଇଁ ଜାରି କରାଯାଇଥିବା ୧.୧୨ ଲକ୍ଷ କୋଟି ଟଙ୍କାର କାରଣ ଦର୍ଶାଅ ନୋଟିସକୁ ସ୍ଥଗିତ ରଖିଛନ୍ତି। ନିର୍ଦ୍ଦିଷ୍ଟ ସମାଧାନ ନହେବା ପର୍ଯ୍ୟନ୍ତ ଜିଏସ୍ଟି ନୋଟିସ ଉପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ସ୍ଥଗିତ ରଖାଯିବ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି।
୨୦୨୨-୨୩ ଆର୍ଥିକ ବର୍ଷ ଏବଂ ୨୦୨୩-୨୪ ଆର୍ଥିକ ବର୍ଷର ପ୍ରଥମ ସାତ ମାସକୁ ନେଇ ଏହି ମାମଲା ହୋଇଛି। ଅନଲାଇନ୍ ଗେମିଂ କମ୍ପାନୀଗୁଡ଼ିକ କହିଛନ୍ତି ଯେ ୧ ଅକ୍ଟୋବର, ୨୦୨୩ ପର୍ଯ୍ୟନ୍ତ ୨୮% ପରିବର୍ତ୍ତେ ୧୮% ହାରରେ ଜିଏସ୍ଟି ଲାଗୁ କରାଯିବା ଉଚିତ। କାରଣ ୨୮% ହାରରେ ଟିକସ ନିୟମ ୧ ଅକ୍ଟୋବରରୁ କାର୍ଯ୍ୟକାରୀ ହେବାର ଥିଲା। ହେଲେ ସରକାର କହିଛନ୍ତି ଯେ ଅକ୍ଟୋବର ୧ ରେ କରାଯାଇଥିବା ସଂଶୋଧନ ପୂର୍ବରୁ ବଳବତ୍ତର ଆଇନର ସ୍ପଷ୍ଟୀକରଣ ଥିଲା।
ଗେମିଂ କମ୍ପାନୀଗୁଡ଼ିକ ସହ ଜଡିତ ମାମଲାଗୁଡ଼ିକୁ ଏକାଠି କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି। ପ୍ରକୃତରେ, ଦେଶର ବିଭିନ୍ନ ହାଇକୋର୍ଟରେ ଏହି ମାମଲାରେ ଅନେକ ଆବେଦନ ଦାଖଲ ହୋଇଥିଲା। କୋର୍ଟ ଏହି ସମସ୍ତ ମାମଲାକୁ ନିଜ କୋର୍ଟକୁ ସ୍ଥାନାନ୍ତର କରିଛନ୍ତି ଏବଂ ଯାହା ନିଷ୍ପତ୍ତି ନିଆଯିବ ତାହା ସମସ୍ତଙ୍କ ପାଇଁ ହେବ। ଏବେ ଏହି ମାମଲାଗୁଡ଼ିକର ପରବର୍ତ୍ତୀ ଶୁଣାଣି ୧୮ ମାର୍ଚ୍ଚ ୨୦୨୫ରେ ହେବ ବୋଲି କୋର୍ଟ କହିଛନ୍ତି।
