ନୂଆଦିଲ୍ଲୀ: ଉତ୍ଥାନ-ପତନ ଭିତରେ ସେୟାର ବଜାର ଆଜି ଜାନୁଆରୀ ୧୦ରେ ଲଗାତାର ତୃତୀୟ ଦିନରେ ହ୍ରାସ ସହ ବନ୍ଦ ହୋଇଛି । ସେନସେକ୍ସ ୨୪୧ ଅଙ୍କ ଖସି ବନ୍ଦ ହୋଇଛି । ଅନ୍ୟପଟେ ନିଫ୍ଟି ୨୩,୫୦୦ ପଏଣ୍ଟର ଗୁରୁତ୍ୱପୂର୍ଣ୍ଣ ସପୋର୍ଟ ସ୍ତର ତଳକୁ ଖସି ଆସିଛି । ବ୍ରଡର ମାର୍କେଟରେ ସ୍ଥିତି ଆହୁରି ଖରାପ ହୋଇଛି । ଛୋଟ ଏବଂ ମଧ୍ୟମ ଧରଣ ସେୟାର ଆଜି ଧରାଶାୟୀ ହୋଇଛନ୍ତି । ବିଏସ୍ଇ ମିଡ୍କ୍ୟାପ୍ ଏବଂ ସ୍ମଲ୍କ୍ୟାପ୍ ଯଥାକ୍ରମେ ୨.୧୩ ପ୍ରତିଶତ ଏବଂ ୨.୪୦ ପ୍ରତିଶତ ହ୍ରାସ ପାଇ ବନ୍ଦ ହୋଇଛି । ଆଜିର ଏହି ହ୍ରାସ ଯୋଗୁ ସେୟାର ବଜାର ନିବେଶକଙ୍କୁ ପ୍ରାୟ ୫.୭ ଲକ୍ଷ କୋଟି ଟଙ୍କା କ୍ଷତି ହୋଇଛି । ଆଇଟି ସେୟାରକୁ ଛାଡ଼ି ଅନ୍ୟ ସବୁ ସେକ୍ଟର ଲାଲ୍ ସଂକେତରେ ବନ୍ଦ ହୋଇଛି । ସବୁଠୁ ଅଧିକ ଚାପ ବ୍ୟାଙ୍କିଂ, ରିୟଲ୍ଟିଂ, ପାୱାର, ଫାର୍ମା ଏବଂ ୟୁଟିଲିଟି ସେୟାରରେ ଉପରେ ଦେଖିବାକୁ ମିଳିଥିଲା ।
କାରବାର ଶେଷରେ ବିଏସଇ ସେନସେକ୍ସ ୨୪୧.୩୦ ଅଙ୍କ ବା ୦.୩୧ ପ୍ରତିଶତ ହ୍ରାସ ପାଇ ୭୭,୩୭୮.୯୧ ସ୍ତରରେ ବନ୍ଦ ହୋଇଛି । ଅନ୍ୟପଟେ ଏନ୍ଏସ୍ଇର ୫୦ ସେୟାର ବିଶିଷ୍ଟ ସୂଚକାଙ୍କ ନିଫ୍ଟି ୮୬.୫୦ ଅଙ୍କ ବା ୦.୩୭ ପ୍ରତିଶତ ହ୍ରାସ ପାଇ ୨୩,୪୪୦.୦୦ ସ୍ତରରେ ବନ୍ଦ ହୋଇଛି ।
ବିଏସ୍ଇରେ ସୂଚୀବଦ୍ଧ କମ୍ପାନିଗୁଡ଼ିକର ମାର୍କେଟ୍ କ୍ୟାପ୍ ଆଜି ହ୍ରାସ ପାଇ ୪୨୯.୭୯ ଲକ୍ଷ କୋଟି ଟଙ୍କା ହୋଇଛି । ଯାହା ପୂର୍ବ କାରବାର ଦିନ ଅର୍ଥାତ୍ ଗୁରୁବାର ୪୩୫.୪୯ ଲକ୍ଷ କୋଟି ଟଙ୍କା ଥିଲା । ଏହିପରି ବିଏସ୍ଇରେ ସୂଚୀବଦ୍ଧ କମ୍ପାନିଗୁଡ଼ିକର ମାର୍କେଟ୍ କ୍ୟାପ୍ ଆଜି ପ୍ରାୟ ୫.୭ ଲକ୍ଷ କୋଟି ଟଙ୍କା ହ୍ରାସ ପାଇଛି । ଅନ୍ୟ ଶବ୍ଦରେ କହିବାକୁ ଗଲେ ନିବେଶକଙ୍କୁ ଆଜି ଗୋଟିଏ ଦିନରେ ୫.୭ ଲକ୍ଷ କୋଟି ଟଙ୍କା କ୍ଷତି ହୋଇଛି । ସେନସେକ୍ସର ଆଜି ୨୧ ସେୟାର ଲାଲ୍ ସଂକେତରେ ବନ୍ଦ ହୋଇଛି । ଇଣ୍ଡସଇଣ୍ଡ ବ୍ୟାଙ୍କରେ ସବୁଠୁ ଅଧିକ ୪.୪୧ ପ୍ରତିଶତ ହ୍ରାସ ଘଟିଛି । ଅନ୍ୟପଟେ ଟିସିଏସରେ ସବୁଠୁ ଅଧିକ ୫.୬୭ ପ୍ରତିଶତ ବୃଦ୍ଧି ଘଟିଛି ।
