ଆଠଗଡ ୦୪/୦୪: ବୁଣାକାରଙ୍କ ଅଗୋଚରରେ ଅଢେଇ କୋଟିର ଘୋଟାଲା। ଭୂତ ହିତାଧିକାରୀଙ୍କ ଆକାଉଣ୍ଟକୁ ଯାଇଛି ଲକ୍ଷ ଲକ୍ଷ ଟଙ୍କା । ଜମି ଜାଲିଆତିରେ କୋଟି କୋଟି ଟଙ୍କା ହେରଫେର। କେନ୍ଦ୍ର ସରକାରଙ୍କ ଅଣୁ କ୍ଷୁଦ୍ର ଓ ମଧ୍ୟମ ଶିଳ୍ପ ବିଭାଗ ଅଧିନରେ ସ୍ଫୁର୍ତି ( ଏସ ଏଫ୍ ୟୁ ଆର୍ ଆଇ ଟି) କ୍ଲଷ୍ଟର ଯୋଜନାରେ ଏହି ହରିଲୁଟ ହୋଇ ଥିବା ଆଠଗଡ଼ ଉପଜିଲ୍ଲାପାଳଙ୍କ ନିକଟରେ ଅଭିଯୋଗ ହୋଇଛି।
ଗତ ୨୦୦୬-୦୭ ମସିହାରେ କଟକ ବଡ଼ମ୍ବା ବ୍ଲକ ଅନ୍ତର୍ଗତ ମାଣିଆ ବନ୍ଧ ଠାରେ କେନ୍ଦ୍ର ସରକାରଙ୍କ ବୟନଶିଳ୍ପ ମନ୍ତ୍ରଣାଳୟ ଦ୍ବାରା ମାଣିଆ ବନ୍ଧ ହାଣ୍ଡଲୁମ ପ୍ରତିଷ୍ଠା କରାଯାଇଥିଲା । ୨୦୨୧ ମସିହା ରେ ଅଣୁ କ୍ଷୁଦ୍ର ଓ ମଧ୍ୟମ ଶିଳ୍ପ ଉଦ୍ୟୋଗ ମନ୍ତ୍ରଣାଳୟ ତରଫରୁ ମାଣିଆ ବନ୍ଧ ହ୍ୟାଣ୍ଡଲୁମ କ୍ଲଷ୍ଟର ନାମରେ ବୁଣାକାର ମାନଙ୍କ ଅଗୋଚରରେ କାର୍ଯ୍ୟକାରୀ ହେଉଥିବା ଜଣାପଡିଛି । ଏହି କ୍ଲଷ୍ଟରଟି ସୋସାଇଟ ଆକ୍ଟ ଅନୁସାରେ ପଞ୍ଜିକୃତ ମଧ୍ୟ ହୋଇଥିବା ଜଣାପଡିଛି।
ବଡ଼ମ୍ବା ତହସିଲ କିରିକିଚା, ମହୁଲିଆ ମୌଜା ଖାତା ନଂ ୨୯୫/୨୭୨ ପ୍ଲଟ ନଂ ୧୬୨୮,୧୮୩୦,୧୮୮୧ ର ୧୬ ଡେସିମିଲି ବା ୬୯୬୮ ବର୍ଗଫୁଟ ଜାଗାକୁ ୨୦୨୧ ମସିହାରେ ୨୦୩୬ ମସିହା ପର୍ଯ୍ୟନ୍ତ ସୋସାଇଟ ବା ସ୍ଫୁର୍ତି ନାମରେ ଲିଜ ଦିଆଯାଇଛି। ତେବେ ଏହାର ମାନେଜିଂ ଟ୍ରଷ୍ଟି ଜୟଶ୍ରୀ ରାଉତ ଏବଂ ତାଙ୍କ ସ୍ବାମୀ ମାଣିଆ ବନ୍ଧ ବୁଣାକାର ସମବାୟ ସମିତିର ସମ୍ପାଦକ ତଥା ଲିଜ ଜମିର ମାଲିକ ସଚିପ ରାଉତ ଏହି ଚୁକ୍ତି ଖିଲାପ କରି ଉକ୍ତ ଜମିକୁ ଅନ୍ୟତ୍ର ବିକ୍ରୀ କରିଥିବା ଅଭିଯୋଗ ହୋଇଛି।
ଏଥିସହିତ ଚଞ୍ଚକତା କରି ଭୂତ ହିତାଧିକାରୀଙ୍କ ନାମରେ ୨ କୋଟି ୫୪ ଲକ୍ଷ ଟଙ୍କା ହରି ଲୁଟ୍ କରିଥିବା ଅଭିଯୋଗ ହୋଇଛି। ଏଥି ସହିତ ବାହାରୁ କପଡା କିଣି ଆଣି ସ୍ଥାନୀୟ ଦରଜୀଙ୍କ ପାଖରେ ସିଲେଇ କରି ଏହାକୁ ହସ୍ତତନ୍ତ କହି ସୋସାଇଟ ନାମରେ ବୟନିକା କୁ ବିକ୍ରୀ କରୁଥିବା ଅଭିଯୋଗ ହୋଇଛି। ସୂଚନା ଅଧିକାର ଆଇନ ବଳରେ ଏହାର ସାଙ୍ଘାତିକ ତଥ୍ୟ ସାମ୍ନାକୁ ଆସିବା ପରେ ସାଧାରଣ ରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
ଏ ବାବଦରେ ଉଚ୍ଚସ୍ତରୀୟ ତଦନ୍ତ ସହିତ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମାଣିଆ ବନ୍ଧର ବୁଣାକାର ମାନେ ଆଠଗଡ଼ ଉପଜିଲ୍ଲାପାଳ ପ୍ରହଲ୍ଲାଦ ନାରାୟଣ ଶର୍ମାଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି । ସେପଟେ ଆସିଷ୍ଟାଣ୍ଟ ଡ଼ାଇରେକ୍ଟର ଟେକ୍ସଟାଇଲ କହିଛନ୍ତି ଏ ନେଇ ତଦନ୍ତ ଚାଲିଛି ରିପୋର୍ଟ ଆସିବା ପରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ।
