ମୁମ୍ଵାଇ ୨୭।୦୮: କ୍ୟାରିଅର୍ରେ ନୂଆ ଅଧ୍ୟାୟ ଆରମ୍ଭ କରିଛନ୍ତି ଅଭିନେତ୍ରୀ ଶର୍ଭରୀ ୱାଗ । ଅପ୍କମିଙ୍ଗ ଫିଲ୍ମ ‘ଆଲ୍ଫା’ର ସୁଟିଂରେ ସେ ଏବେ ବ୍ୟସ୍ତ । ଫିଲ୍ମର ୨ୟ ସିଡ୍ୟୁଲର ସୁଟିଂ ଏବେ କାଶ୍ମୀରରେ ଆରମ୍ଭ ହୋଇଛି । ଏଥିପାଇଁ ଶର୍ଭରୀ ଜିମ୍ରେ ଘଣ୍ଟା ଘଣ୍ଟା ଝାଳବୁହା ପରିଶ୍ରମ କରୁଛନ୍ତି । ନିକଟରେ ସେ ନିଜର କଠିନ କସରତର ଏକ ରୁଟିନ୍ ଇନ୍ଷ୍ଟାଗ୍ରାମ୍ରେ ସେୟାର କରିଥିଲେ ।
ଏଥିରେ କ୍ୟାପ୍ସନ ଲେଖିଥିଲେ ‘ମନର ଆଲ୍ଫା ସ୍ଥିତି’ । ଏହା ଜରିଆରେ ସେ ଫିଲ୍ମରେ ନିଜ ଭୂମିକାକୁ ନେଇ ପ୍ରସ୍ତୁତି ଓ ସମର୍ପଣ ଭାବର ଝଲକ୍ ଦେଖାଇଥିଲେ । କାଶ୍ମୀରର ପ୍ରାକୃତିକ ସୌନ୍ଦର୍ଯ୍ୟ ମଧ୍ୟରେ ଫିଲ୍ମ ସୁଟିଂର ଉତ୍ସାହକୁ ସେ ଫ୍ୟାନ୍ଙ୍କ ସହ ଶେୟାର କରିଛନ୍ତି । ସିନେ କ୍ୟାରିଅର ଆରମ୍ଭରେ ଏଭଳି ଏକ ଗୁରୁତ୍ୱପୂର୍ଣ୍ଣ ପ୍ରୋଜେକ୍ଟର ଅଂଶ ହୋଇଥିବାରୁ ସେ ନିଜକୁ ଅତ୍ୟନ୍ତ ଭାଗ୍ୟଶାଳୀ ମଣୁଛନ୍ତି । ତାଙ୍କର ଉତ୍ସାହ ଏତେ ବଢ଼ିଯାଇଛି ଯେ ନିରନ୍ତର ନିଜ କଳାରେ ସୁଧାର କରିବାକୁ ସେ ସବୁ ପ୍ରକାର ପ୍ରୟାସ କରୁଛନ୍ତି । ତାଙ୍କ ଅଭିନୀତ ଫିଲ୍ମ ‘ମୁଞ୍ଜ୍ୟା’ ବକ୍ସ ଅଫିସ୍ରେ ୧୦୦ କୋଟି କଲେକ୍ସନ କରିବା ପରେ ଶର୍ଭରୀ ଖୁବ୍ ଲୋକପ୍ରିୟତା ପାଇଥିଲେ ।
‘ମହାରାଜ’ ଓ ‘ବେଦା’ରେ ମଧ୍ୟ ତାଙ୍କ ଭୂମିକାକୁ ଲୋକେ ଖୁବ୍ ପସନ୍ଦ କରିଛନ୍ତି । ‘ବେଦା’ ପାଇଁ ସେ ଅନେକ ମାସ ଧରି ବକ୍ସିଂ ଟ୍ରେନିଂ ନେଇଥିଲେ । ଅନେକ ଶାରୀରିକ ଆହ୍ୱାନର ମଧ୍ୟ ସମ୍ମୁଖୀନ ହୋଇଥିଲେ । ‘ଆଲ୍ଫା’ରେ ସେ ଆଲିୟା ଭଟ୍ଟଙ୍କ ସହ ସ୍କ୍ରିନ୍ ଶେୟାର କରିବେ । ଏଥିରେ ତାଙ୍କର ଦମ୍ଦାର ପ୍ରଦର୍ଶନ ଦେଖିବାକୁ ପାଇବେ ସିନେପ୍ରେମୀ।
