ପୁରୀ ୩।୪: ଐତିହ୍ୟ ଗ୍ରାମ ରଘୁରାଜପୁରକୁ ନୂଆ ରୂପ ଦେବା ପାଇଁ ପ୍ରୟାସ ଆରମ୍ଭ କରିଛି ରାଜ୍ୟ ପର୍ଯ୍ୟଟନ ବିଭାଗ । ରଘୁରାଜପୁରର ବିକାଶ ସହିତ ଅଧିକରୁ ଅଧିକ ପର୍ଯ୍ୟଟକମାନଙ୍କୁ କିଭଳି ଏହି କଳା ଗ୍ରାମ ଆକର୍ଷିତ କରିବ ସେନେଇ ଏକ ସ୍ବତନ୍ତ୍ର ପ୍ରକଳ୍ପ ଖୁବଶୀଘ୍ର କାର୍ଯ୍ୟକାରୀ ହେବ । ରଘୁରାଜପୁରର ରୂପରେଖକୁ ନୂଆ ରୂପ ଦିଆଯିବ । ରଘୁରାଜପୁରରେ ନିର୍ମିତ ହେବ ବ୍ୟାଖ୍ୟାନ କେନ୍ଦ୍ର ଏବଂ ଆକର୍ଷଣୀୟ ତୋରଣ । ଏଥିସହିତ ମୁକ୍ତାକାଶ ମାର୍କେଟ ସହ କିଣାକିଣି ସୁବିଧା ପାଇଁ ରହିବ ପାଥ୍ ଓ୍ବେ । ଗ୍ରାମର ମଧ୍ୟ ଭାଗରେ ଥିବା ମନ୍ଦିର ଗୁଡ଼ିକର ପୁନରୁଦ୍ଧାର ସହ ଏକ ସ୍ବତନ୍ତ୍ର ଥିମ୍ ଆଧାରରେ ବିକଶିତ କରାଯିବ । ଏନେଇ ଡିଜାଇନ୍ ପ୍ରସ୍ତୁତି ପାଇଁ ପ୍ରକ୍ରିୟା ଆରମ୍ଭ ହୋଇଛି ।
ପର୍ଯ୍ୟଟକଙ୍କୁ ଆକର୍ଷିତ କରିବା ଲାଗି ପ୍ରବେଶ ତୋରଣକୁ ଆକର୍ଷିତ ମଧ୍ୟ କରାଯିବ । ଗ୍ରାମରେ ରହିଥିବା ଗ୍ୟାଲେରୀ ଏବଂ ପ୍ରଦର୍ଶନୀ ହଲ୍ର ଉନ୍ନତି କରାଯିବ । ଫଳରେ ଶିଳ୍ପୀ ମାନଙ୍କର କଳାଚାତୁରି ସିଧାସଳଖ ପର୍ଯ୍ୟଟକ ମାନେ ଦେଖିପାରିବେ । ସେହିପରି ରଘୁରାଜପୁରକୁ ସଂଯୋଗ କରୁଥିବା ମୁଖ୍ୟ ରାସ୍ତାର ସଂପ୍ରସାରଣ କରାଯିବା ସହ ଗ୍ରାମରେ ପର୍ଯ୍ୟଟକ ମାନଙ୍କ ପାଇଁ ପର୍ଯ୍ୟାପ୍ତ ପାନୀୟ ଜଳ ବ୍ୟବସ୍ଥା ସହିତ ଏକ କ୍ୟାଫେଟେରିଆ ମଧ୍ୟ ନିର୍ମାଣ କରାଯିବ । ରାଜ୍ୟ ସରକାର ରଘୁରାଜପୁରର ଉନ୍ନତି ପାଇଁ ପଦକ୍ଷେପ ନେଇଥିବାରୁ ଚିତ୍ରଶିଳ୍ପୀ ଏବଂ ଗ୍ରାମର ସରପଞ୍ଚ ଏହାକୁ ସ୍ବାଗତ କରିଛନ୍ତି । ଏହାଦ୍ବାରା ଆଗାମୀ ଦିନରେ ରଘୁରାଜପୁରର ଉନ୍ନତି ହେବା ସହ ଆହୁରି ଅଧିକରୁ ଅଧିକ ଦେଶୀ ବିଦେଶୀ ପର୍ଯ୍ୟଟକଙ୍କୁ ଆକର୍ଷିତ କରିବ ଐତିହ୍ୟ ଗ୍ରାମ ରଘୁରାଜପୁର ।
ପର୍ଯ୍ୟଟନସ୍ଥଳୀ ପରେ ପଟ୍ଟଚିତ୍ର, ତାଳପତ୍ର, ପୋଥିଚିତ୍ର ଓ ଗୋଟିପୁଅ ନୃତ୍ୟ ପାଇଁ ପ୍ରସିଦ୍ଧି ଅର୍ଜନ କରିଛି କଳାଗ୍ରାମ ରଘୁରାଜପୁର । ଏଣୁ ରଘୁରାଜପୁର ବୁଲିବା ପାଇଁ ପର୍ଯ୍ୟଟକମାନେ ବେଶ୍ ପସନ୍ଦ କରୁଛନ୍ତି । ତେବେ ପର୍ଯ୍ୟଟକମାନଙ୍କ ଆଗମନକୁ ନଜରରେ ରଖି ରଘୁରାଜପୁରର ବିକାଶ ପାଇଁ ପର୍ଯ୍ୟଟନ ବିଭାଗ ପକ୍ଷରୁ ପ୍ରୟାସ ଆରମ୍ଭ ହୋଇଛି । ସେପଟେ ରଘୁରାଜପୁରର ଉନ୍ନତି କରାଯାଉ କିନ୍ତୁ ଗ୍ରାମର ମୌଳିକତା ଯେଭଳି ନଷ୍ଟ ନହୁଏ ସେ ଦିଗରେ ଦୃଷ୍ଟି ଦେବାକୁ ମତ ଦେଇଛନ୍ତି ଐତିହ୍ୟ ସଂରକ୍ଷଣ ପରିଷଦର ସମ୍ପାଦକ । ଅନ୍ୟପଟେ ପୁରୀ ଜିଲ୍ଲାପାଳ କହିଛନ୍ତି ଐତିହ୍ୟ ଗ୍ରାମ ରଘୁରାଜପୁର ହେଉଛି ଓଡ଼ିଶାର ଗର୍ବ ଓ ଗୌରବ । ତେଣୁ ଏହାର ବିକାଶ ପାଇଁ ରାଜ୍ୟ ପର୍ଯ୍ୟଟନ ବିଭାଗ ସ୍ବତନ୍ତ୍ର ପଦକ୍ଷେପ ନେଇଛନ୍ତି ।
You Can Read:
IOCL ପ୍ଲାଷ୍ଟିକ୍ ପାର୍କ ନିକଟରେ ଲାଗିଲା ନିଆଁ, ଧୂଆଁମୟ ହେଲା ସ୍ଥାନୀୟ ଅଞ୍ଚଳ
