ନୂଆଦିଲ୍ଲୀ: ଓ୍ଵେଷ୍ଟଇଣ୍ଡିଜ ଓ ଆମେରିକାରେ ଟି-୨୦ ବିଶ୍ଵକପ୍ ଆୟୋଜନ ହେବାକୁ ଯାଉଛି। ଆଉ ୨ ମାସରୁ କମ ସମୟ ଥିବାରୁ ପ୍ରସ୍ତୁତି ଜୋରସୋରରେ ଆଗେଇ ଚାଲିଛି। ଭାରତୀୟ ଦଳ ଜୁନ ୫ ତାରିଖରେ ଆୟରଲାଣ୍ଡ ବିପକ୍ଷରେ ନିଜର ଅଭିଯାନ ଆରମ୍ଭ କରିବ। ଜୁନ ୯ ତାରିଖରେ ପାକିସ୍ତାନ ବିପକ୍ଷରେ ରହିଛି ମୁକାବିଲା। ତେବେ କେମିତି ରହିବ ଭାରତୀୟ ଦଳ ? କାହାକୁ ମିଳିବ ଚୂଡ଼ାନ୍ତ ଏକାଦଶରେ ସ୍ଥାନ ? ଯଦି ଆଇପିଏଲ୍‌ର ପ୍ରଦର୍ଶନକୁ ଦେଖିବା ତେବେ ଅନେକ ବଡ଼ ବଡ଼ ଖେଳାଳିଙ୍କ ନାଁ କଟିପାରେ। ବିଶେଷ କରି ଏହି ୫ ଖେଳାଳିଙ୍କୁ ଟି-୨୦ ବିଶ୍ଵକପ୍ ଦଳରେ ସ୍ଥାନ ମିଳିବା ମୁସ୍କିଲ ଲାଗୁଛି।

Also read: ଟି-୨୦ ବିଶ୍ଵକପ୍‌ରେ ହାର୍ଦ୍ଦିକ ପାଣ୍ଡ୍ୟାଙ୍କୁ ମିଳିବନି ଜାଗା ? ପୂର୍ବତନ ମୁଖ୍ୟ ଚୟନକର୍ତ୍ତାଙ୍କ ବଡ଼ ବୟାନ

ଲକ୍ଷ୍ନୌ ସୁପର ଜିଆଣ୍ଟର ଅଧିନାୟଲ କେଏଲ ରାହୁଲଙ୍କୁ ବିଶ୍ଵକପ୍ ଦଳରୁ ଦୂରରେ ରହିବାକୁ ପଡ଼ିପାରେ। ଆଇପିଏଲ୍‌ରେ କେଏଲ ରାହୁଲ ସଂଘର୍ଷ କରୁଛନ୍ତି। ଏହା ସହିତ ନିଜର ଷ୍ଟ୍ରାଇକ ରେଟ୍‌ ମଧ୍ୟ ସୁଧାରି ପାରୁ ନାହାନ୍ତି। ତେଣୁ ରାହୁଲଙ୍କୁ  ବିଶ୍ଵକପ୍ ଦଳରେ ସ୍ଥାନ ମିଳିବା ସହଜ ନୁହେଁ। କୋଲକାତା ନାଇଟ୍ ରାଇଡର୍ସର ଅଧିନାୟକ ଶ୍ରେୟସ ଆୟରଙ୍କ ଖରାପ ଫର୍ମ ଜାରି ରହିଛି। ଗତ ଦିନରେ ବିସିସିଆଇ କେନ୍ଦ୍ରୀୟ ଚୁକ୍ତିରେ ମଧ୍ୟ ଶ୍ରେୟସଙ୍କୁ ସ୍ଥାନ ମିଳି ନ ଥିଲା। ତେଣୁ ବିଶ୍ଵକପ୍ ଦଳରେ ଶ୍ରେୟସ ଆୟର ମଧ୍ୟ ନିଜର ସ୍ଥାନ ହରାଇ ପାରନ୍ତି। 

ଏହା ବ୍ୟତୀତ ଦିଲ୍ଲୀ କ୍ୟାପିଟାଲ୍ସର ଅଲରାଉଣ୍ଡର ଅକ୍ଷର ପଟେଲ୍‌ଙ୍କ ମଧ୍ୟ ଟି-୨୦ ବିଶ୍ଵକପ୍ ଦଳରେ ସ୍ଥାନ ମିଳିବାର ସମ୍ଭାବନା କମ ରହିଛି। ଆଇପିଏଲ୍‌ରେ ଅକ୍ଷର ପଟେଲ୍ ବୋଲିଂରେ ପ୍ରଭାବଶାଳୀ ପ୍ରଦର୍ଶନ କରିଛନ୍ତି। ମାତ୍ର ବ୍ୟାଟିଂରେ ନିରାଶଜନକ ପ୍ରଦର୍ଶନ କରିଛନ୍ତି। ମୁମ୍ବାଇ ଇଣ୍ଡିଆନ୍ସର ଓ୍ଵିକେଟ୍ କିପର ବ୍ୟାଟର ଇଶାନ କିଶନ ଓ ପଞ୍ଜାବ କିଙ୍ଗ୍ସର ଜିତେଶ ଶର୍ମାଙ୍କୁ ମଧ୍ୟ ଟି-୨୦ ବିଶ୍ଵକପ୍ ଦଳରୁ ବାହାରେ ରହିବାକୁ ପଡ଼ିପାରେ। କିନ୍ତୁ ଓ୍ଵିକେଟ୍ କିପର ବ୍ୟାଟର ଭାବେ ସଞ୍ଜୁ ସାମସନ ନିଜର ଛାପ ଛାଡ଼ିବାରେ ସଫଳ ହୋଇଛନ୍ତି। ତେଣୁ ତାଙ୍କ ନାଁ ଉପରେ ଚୟନକର୍ତ୍ତା ବିଚାର କରି ପାରନ୍ତି।