ନୂଆଦିଲ୍ଲୀ ୧୭।୦୪: କୋଡିଏକ୍ ଭଳି ଲଗଜରୀ SUV । ତିଆରି କରିଛି ସ୍କୋଡା । ଏବେ ହୋଇଛି ୧୩୦ ବର୍ଷ ପୁରୁଣା। ବର୍ଷ ବର୍ଷ ଧରି ଲୋକଙ୍କର ହୋଇଛି ପ୍ରିୟ । କିନ୍ତୁ ବର୍ତ୍ତମାନର ଏହି ଦିଗ୍ଗଜ କମ୍ପାନୀ, ଦିନେ ସାଇକେଲ୍‌ ତିଆରିରୁ ଆରମ୍ଭ କରିଥିଲା ଯାତ୍ରା । ପରେ ମୋଟର ସାଇକେଲ୍‌ ଆଉ ପରେ କାର୍‌ ତିଆରି କରିଥିଲା । ବିଗତ ୧୩୦ ମଧ୍ୟରେ ଅନେକ ଉତ୍ଥାନ ପତ୍ତନ ଦେଖିଛି କମ୍ପାନୀ । କେତେବେଳେ ଭଲ ଉତ୍ପାଦନ ହୋଇଛି ତ, ଆଉ କେତେବେଳେ କମ୍ପାନୀ ଜଳିପୋଡି ପାଉଁଶ ହୋଇଯାଇଛି । 

ତଥାପି କମ୍ପାନୀ ଲୋକଙ୍କ ନଜରରୁ ହଟିନି । ଯେତେଥର ତଳକୁ ଖସିଛି ସେତେଥର ଉଠିଛି । ଖୁବ୍‌ ରୋଚକ ସ୍କୋଡାର ଐତିହ୍ୟ । କମ୍ପାନୀର କାହାଣୀର ଆରମ୍ଭ ହୋଇଥିଲା ୧୮୯୫ ମସିହାରେ । ଭାକ୍ଲାଭ ଲୌରିନ୍ ଏବଂ ଭାକ୍ଲାଭ କ୍ଲେମେଣ୍ଟ ନାମକ ଉଦ୍ୟୋଗୀ ଏକ ବ୍ୟବସାୟ କରିବାକୁ କରିଥିଲେ ଯୋଜନା । ଆଉ ସେମାନେ ସାଇକେଲ୍ ତିଆରି କରିବାକୁ ଚିନ୍ତା କରିଥିଲେ । ଏହା ସେହି ସମୟ ଥିଲା ଯେତେବେଳେ ୟୁରୋପରେ ଚାଲିଥିଲା ଶିଳ୍ପ ବିପ୍ଳବ । 

କାରଖାନାଟି ପ୍ରଚୁର ପରିମାଣରେ ଉତ୍ପାଦନ ଆରମ୍ଭ କରିଥିଲା । ତେଣୁ ଶ୍ରମିକଙ୍କ ଆବଶ୍ୟକତା ବୃଦ୍ଧି ପାଇଲା। ଶ୍ରମିକମାନଙ୍କୁ କାରଖାନାକୁ ଯିବା ଆସିବା ପାଇଁ ସାଇକେଲର ଆବଶ୍ୟକତା ଥିଲା । କମ୍ପାନୀ ସେହି ସମୟରେ ସାଇକେଲ ତିଆରି କରିବା ଥିଲା ଏକ ଭଲ ବିକଳ୍ପ । କମ୍ପାନୀର ସାଇକେଲ ବ୍ୟବସାୟ ଭଲ ଚାଲିଥିଲା । ତେଣୁ ଉଭୟ ଉଦ୍ୟୋଗୀ ସେମାନଙ୍କର ପୋର୍ଟଫୋଲିଓକୁ ବିସ୍ତାର କରିବା ପାଇଁ ଚାହିଁଥିଲେ । ସେମାନେ 'ମୋଟରବାଇକ୍' ତିଆରି କରିବା ଆରମ୍ଭ କରିଥିଲେ । ୧୮୯୯ ମସିହାରେ ବଜାରକୁ ଆସିଥିଲା ପ୍ରଥମ ମୋଟରବାଇକ । 

କମ୍ପାନୀ ଆରମ୍ଭ ହେବାର ମାତ୍ର ୪ ବର୍ଷ ପରେ କମ୍ପାନୀ ନିଜ ନାଁ ପରିବର୍ତ୍ତନ କରିଥିଲା । ପ୍ରାରମ୍ଭରେ କମ୍ପାନୀର ନାମ ସ୍କୋଡା ନଥିଲା । ସେତେବେଳେ ଏହାର ନାଁ 'ସ୍ଲାଭିଆ' ଥିଲା। କିନ୍ତୁ ପରେ ଏହାର ନାଁ ପରିବର୍ତ୍ତନ କରାଯାଇ 'ଲରିନ୍ ଆଣ୍ଡ୍ କ୍ଲେମେଣ୍ଟ କମ୍ପାନୀ' କରାଯାଇଥିଲା । କମ୍ପାନୀର ବାଇକ୍ ମଧ୍ୟ ଏକ ବଡ଼ ସଫଳତା ପାଇଥିଲା। ପ୍ରାୟ ୪ ହଜାର ମୋଟରବାଇକ ନିର୍ମାଣ କରିବା ପରେ, ଏହି ଦୁଇ ଉଦ୍ୟୋଗୀ କାର୍ ନିର୍ମାଣରେ ଭାଗ୍ୟ ପରୀକ୍ଷା କରିଥିଲେ । ଏମାନେ ୧୯୦୫ ମସିହାରେ କମ୍ପାନୀ ମୁଖ୍ୟତଃ କାର୍ ନିର୍ମାଣ ଆରମ୍ଭ କରିଥିଲା। 

ଏବେ ପ୍ରଶ୍ନ ଆସୁଛି କମ୍ପାନୀର ନାଁ ସ୍କୋଡା କେବେ ହେଲା ? ବାସ୍ତବରେ ଏହାର କାହାଣୀ ମଧ୍ୟ ବେଶ୍‌ ଆକର୍ଷଣୀୟ। ୧୯୧୪ ରୁ ୧୯୧୮ ମଧ୍ୟରେ ବିଶ୍ୱ ଦେଖିଥିଲା ପ୍ରଥମ ବିଶ୍ୱଯୁଦ୍ଧ । ଏହି ସମୟ ମଧ୍ୟରେ ବିଶ୍ୱର ଅଧିକାଂଶ କମ୍ପାନୀ କାର ନିର୍ମାଣ ବନ୍ଦ କରିଦେଇଥିଲେ । ସମସ୍ତ କମ୍ପାନୀ କାର ବଦଳରେ ସାମରିକ ଯାନ ତିଆରି କରିବା ଆରମ୍ଭ କଲେ । ସ୍କୋଡା ମଧ୍ୟ ସମାନ କାମ କରିଥିଲା । କିନ୍ତୁ ୧୯୨୪ ମସିହାରେ କମ୍ପାନୀର କାରଖାନାରେ ହୋଇଥିଲା ଏକ ଭୟଙ୍କର ଅଗ୍ନିକାଣ୍ଡ । 

ଯେଉଁଥିରେ କମ୍ପାନୀର କାରଖାନାକୁ ପ୍ରାୟ ସବୁ ନଷ୍ଟ ହୋଇଯାଇଥିଲା । ଶେଷରେ ଏହାର ଆର୍ଥିକ ଅବସ୍ଥାକୁ ଉନ୍ନତ କରିବା ପାଇଁ ଲରିନ୍ ଏବଂ କ୍ଲେମେଣ୍ଟ ୧୯୨୫ରେ ଏମିଲ୍ ସ୍କୋଡାଙ୍କ କମ୍ପାନୀ, ସ୍କୋଡା ୱାର୍କ୍ସ ସହିତ ମିଶିଥିଲା । ଏହାପରେ ସ୍କୋଡା ନିଜର ନୂଆ ଲୋଗୋ ଏବଂ ନୂଆ ନାଁ ପାଇଥିଲା ।  ଚେକ୍ ଗଣରାଜ୍ୟ କମ୍ପାନୀ ସ୍କୋଡା ଅଟୋର ଜୀବନରେ ୧୯୯୧ ମସିହାରେ ଆଉ ଏକ ବଡ଼ ପରିବର୍ତ୍ତନ ଆସିଥିଲା । ଏହାପରେ କମ୍ପାନୀଟି ଜର୍ମାନୀର ଫୋକ୍ସୱାଗନ୍ ସହିତ ସହଭାଗୀତା ଆରମ୍ଭ କରିଥିଲା ଏବଂ ଆଜି ଏହା ଦାସ ଅଟୋ ଗ୍ରୁପ୍‌ର ଏକ ଅଂଶ।