ନୂଆଦିଲ୍ଲୀ: ଭାରତର ସମ୍ୱିଧାନ ନିର୍ମାଣ ପାଇଁ ଯେଉଁ ଡ୍ରାଫ୍ଟିଂ କମିଟି ଗଠନ କରାଯାଇଥିଲା, ସେଥିର ଥିବା ୭ ସଦସ୍ୟଙ୍କ ମଧ୍ୟରେ ତିନି ଜଣ ବ୍ରାହ୍ମଣ ଥିଲେ । ସମ୍ୱିଧାନ ନିର୍ମାଣରେ ଏମାନଙ୍କ ଯୋଗଦାନ ଗୁରୁତ୍ୱପୂର୍ଣ୍ଣ ଥିଲା । କମିଟିର ସଦସ୍ୟ ଥିବା ବିଏନ ରାଓଙ୍କୁ ନିଜେ ଆମ୍ୱେଦକର ପ୍ରଶଂସା କରିଥିଲେ । ବ୍ରାହ୍ମଣ ମହାସଭାର କାର୍ଯ୍ୟକ୍ରମରେ ସାମିଲ ହୋଇ କର୍ଣ୍ଣାଟକ ହାଇକୋର୍ଟର ଜଷ୍ଟିସ୍ କ୍ରିଷ୍ଣ ଏନ୍.ଦୀକ୍ଷିତ ଏହା କହିଛନ୍ତି । ତାଙ୍କ ସହ ଅନ୍ୟ ଜଣେ ଜଜ୍ ଭି.ଶ୍ରୀସାନନ୍ଦ ମଧ୍ୟରେ ଆୟୋଜନରେ ସାମିଲ ହୋଇଥିଲେ । ବେଙ୍ଗାଲୁରୁରେ ଚାଲିଥିବା ଦୁଇ ଦିନିଆ କାର୍ଯ୍ୟକ୍ରମରେ ଜଷ୍ଟିସ୍ କୃଷ୍ଣ ଏନ୍.ଦୀକ୍ଷିତ କହିଛନ୍ତି ଯେ ବ୍ରାହ୍ମଣ ସମାଜ ଦେଶର ବିକାଶରେ ବହୁତ ବଡ଼ ଯୋଗଦାନ ଦେଇଛି । ସେ କହିଛନ୍ତି ଯେ ବାବା ସାହେବ ଆମ୍ୱେଦକର କହିଥିଲେ ଯେ ଯଦି ବିଏନ୍ ରାଓ ସମ୍ୱିଧାନର ଡ୍ରାଫ୍ଟିଂ କରିନଥାନ୍ତେ ତେବେ ଏହାକୁ ପ୍ରସ୍ତୁତ କରିବା ପାଇଁ ୨୫ ବର୍ଷ ଲାଗିଥାନ୍ତା ।
ଏହା ବ୍ୟତୀତ ଭୀମରାଓ ଆମ୍ୱେଦକରଙ୍କ ଜୀବନରେ ବି ତାଙ୍କ ବ୍ରାହ୍ମଣ ଶିକ୍ଷକଙ୍କ ଯୋଗାଦନ କଥା ଉଲ୍ଲେଖ କରିଛନ୍ତି । ସେ କହିଛନ୍ତି ଯେ ଭୀମରାଓ ଆମ୍ୱେଦକରଙ୍କ କୃଷ୍ଣାଜୀ ନାମକ ଜଣେ ଶିକ୍ଷକ ତାଙ୍କୁ ଆମ୍ୱେଦକର ଉପନାମ ଦେଇଥିଲେ । ଭୀମରାଓ ଆମ୍ୱେଦକରଙ୍କ ଜନ୍ମ ପରେ ତାଙ୍କ ନାଁ ଭୀମରାଓ ରାମଜୀ ଅମ୍ୱାଭାଡେକର ରଖାଯାଇଥିଲା । ସେ କହିଛନ୍ତି ଯେ ଆମ୍ୱେଦକରଙ୍କ ବ୍ରାହ୍ମଣ ଶିକ୍ଷକ ତାଙ୍କୁ ଆର୍ଥିକ ସହଯୋଗ ଦେଇଥିଲେ, ଯେଉଁଥି ପାଇଁ ସେ ନିଜର ପାଠପଢା ଜାରି ରଖିପାରିଥିଲେ । ଏହା ସ୍ପଷ୍ଟ କରୁଛି ଯେ ବ୍ରାହ୍ମଣ ସମାଜ ସମସ୍ତଙ୍କ ସମ୍ମାନ କରୁଛି । ସେ କହିଛନ୍ତି ଯେ ଭାରତ ରତ୍ନ ପାଇଥିବା ଜଣେ ବ୍ରାହ୍ମଣ ପିଭି କାଣେ ଧର୍ମଶାସ୍ତ୍ରର ରଚନା ସାତ ଖଣ୍ଡରେ କରିଥିଲେ । ଏହି ଗ୍ରନ୍ଥରେ ସେ ଅଣ-ବ୍ରାହ୍ମଣଙ୍କ ଯୋଗଦାନ କଥା ଉଲ୍ଲେଖ କରିଛନ୍ତି ।
ଜଷ୍ଟିସ୍ କ୍ରିଷ୍ଣ ଏନ୍.ଦୀକ୍ଷିତ କହିଛନ୍ତି ଯେ ବ୍ରାହ୍ମଣ କୌଣସି ଜାତି ନୁହେଁ ବରଂ ବର୍ଣ୍ଣ ଅଟେ । ସେ କହିଛନ୍ତି ଯେ ବେଦ ବ୍ୟାସ ଜଣେ ମତ୍ସ୍ୟଜୀବୀର ପୁଅ ଥିଲେ ଏବଂ ବାଲ୍ମୀକି ଏସସି କିମ୍ୱା ଏସଟି ସମାଜରୁ ଆସୁଥିଲେ । ତଥାପି ସେମାନେ ରାମାୟଣ ଲେଖିଥିଲେ ଏବଂ ଆମେ ଆଜି ଯାଏ ତାଙ୍କୁ ପୂଜା କରୁଛୁ । ସେ ଲେଖିଥିବା ରାମାୟଣକୁ ହିଁ ସମ୍ୱିଧାନରେ ସ୍ଥାନ ଦିଆଯାଇଛି । ସମ୍ୱିଧାନରେ ଯେଉଁ ୩୨ ଚିତ୍ରଙ୍କୁ ସ୍ଥାନିତ କରାଯାଇଛି, ସେଥିରୁ ଗୋଟିଏ ଭଗବାନ ରାମଙ୍କ ରହିଛି ।
