ନୂଆଦିଲ୍ଲୀ ୧୫।୦୨: ଚାମ୍ପିଅନ୍ସ ଟ୍ରଫି ୨୦୨୫ । ଆରମ୍ଭ ହେବାକୁ ଗୋଟିଏ ସପ୍ତାହରୁ କମ୍ ସମୟ ବାକି । ଭାରତ-ଅଷ୍ଟ୍ରେଲିଆଠାରୁ ପାକିସ୍ତାନ ଏବଂ ଦକ୍ଷିଣ ଆଫ୍ରିକା ପର୍ଯ୍ୟନ୍ତ, ସମସ୍ତେ ନିଜର ଚୂଡ଼ାନ୍ତ ଟିମ୍ ଘୋଷଣା କରିଛନ୍ତି । ଟ୍ରାଇ ସିରିଜ୍ ପ୍ରମାଣ ଦେଇଛି ପ୍ଲେୟରଙ୍କ ଫର୍ମ । ଖାସ୍ କରି ଦ୍ରୁତ ବୋଲରଙ୍କୁ ନେଇ ଜୋରଦାର ଚର୍ଚ୍ଚା । ପାକିସ୍ତାନ ପିଚ୍ରେ ବୋଲର ଏବଂ ସ୍ପିନରଙ୍କୁ ସୁହାଇବ । ଏମାନେ ପାକିସ୍ତାନୀ ପିଚ୍ରେ ଘାତକ ସାବ୍ୟସ୍ତ ହୋଇପାରନ୍ତି ।
ତେବେ ଚାମ୍ପିଅନ୍ସ ଟ୍ରଫିରେ କେଉଁ ଟିମ୍ର ବୋଲିଂ ଲାଇନ୍ ଅପ୍ ସବୁଠାରୁ ଘାତକ ? ଅଷ୍ଟ୍ରେଲିଆର ସବୁଠାରୁ ଘାତକ ବୋଲିଂ ଲାଇନ ଅପ୍ ରହିଛି । କିନ୍ତୁ ଏହାର ଅନେକ ପ୍ରମୁଖ ପ୍ଲେୟର ହୋଇଛନ୍ତି । ଯେଉଁଥିପାଇଁ ଅଷ୍ଟ୍ରେଲିଆ ଓ୍ବିକ୍ ହୋଇଯାଇଛି । ଅଷ୍ଟ୍ରେଲିଆର ପ୍ୟାଟ୍ କମିନ୍ସ,, ଜୋଶ୍ ହାଜେଲଉଡ୍ ଏବଂ ମିଚେଲ୍ ଷ୍ଟାର୍କ ଚାମ୍ପିଅନ୍ସ ଟ୍ରଫିରୁ ପଡ଼ିଛନ୍ତି ବାଦ ।
ଏହାପଛକୁ ରହିଛନ୍ତି ଟିମ୍ ଇଣ୍ଡିଆ ପ୍ଲେୟର । ଫାଷ୍ଟ ବୋଲର ଜସପ୍ରୀତ ବୁମରା ଖେଳିବେନି । ସେ ପିଠିରେ ଆଘାତ କାରଣରୁ ଚାମ୍ପିଅନ୍ସ ଟ୍ରଫିରୁ ବାଦ ପଡ଼ିଛନ୍ତି । କିନ୍ତୁ ଟିମ୍ରେ ଅଛନ୍ତି ମହମ୍ମଦ ଶାମି। ସାମି ୨୦୨୩ ଦିନିକିଆ ବିଶ୍ୱକପର ୭ଟି ମ୍ୟାଚ୍ରେ ନେଇଥିଲେ ୨୪ ୱିକେଟ୍ । ଖାସ୍ କରି ICC ଟୁର୍ଣ୍ଣାମେଣ୍ଟରେ ଶାମି ବହୁତ ଘାତକ ପ୍ରମାଣିତ ହୋଇଛନ୍ତି । ପୂର୍ବରୁ ଶାମି ୨୦୧୯ ବିଶ୍ୱକପରେ ମଧ୍ୟ ୪ଟି ମ୍ୟାଚ୍ ଖେଳି ୧୪ଟି ୱିକେଟ ନେଇଥିଲେ । ବାମହାତୀ ପେସର ଅର୍ଶଦୀପ ସିଂହ ଟିମ୍ ଇଣ୍ଡିଆ ପାଇଁ ଏକ୍ସ-ଫ୍ୟାକ୍ଟର ହୋଇପାରନ୍ତି ।
ଟି-୨୦ରେ ରହିଛି ତାଙ୍କର ଶାନଦାର ପର୍ଫମାନ୍ସ । ସେ ୨୦୨୪ ଟି-୨୦ ବିଶ୍ୱକପରେ ମୋଟ ୧୭ ୱିକେଟ୍ ନେଇଥିଲେ । ସ୍ପିନ୍ ବୋଲିଂରେ ବରୁଣ ଚକ୍ରବର୍ତ୍ତୀ ଅବିଶ୍ୱସନୀୟ ଫର୍ମରେ ରହିଛନ୍ତି । ଗତ ୯ଟି ଟି-20 ଇନିଂସରେ ୨୬ ୱିକେଟ୍ ନେବା ପରେ ସେ ଏବେ ଖେଳିବେ ଚାମ୍ପିଅନ୍ସ ଟ୍ରଫି । ଇଂଲଣ୍ଡ ବିପକ୍ଷରେ ୨ଟି ଦିନିକିଆରେ ୬ ୱିକେଟ୍ ନେଇଥିବା ରବିନ୍ଦ୍ର ଜାଡେଜା ମଧ୍ୟ ବହୁତ ଭଲ ଫର୍ମରେ ଅଛନ୍ତି । ହାର୍ଦ୍ଦିକ ପାଣ୍ଡ୍ୟା, ୱାଶିଂଟନ ସୁନ୍ଦର, ଅକ୍ଷର ପଟେଲ ଏବଂ କୁଲଦୀପ ଯାଦବଙ୍କ ଉପସ୍ଥିତି ମଧ୍ୟ ଟିମ୍ ଇଣ୍ଡିଆର ବୋଲିଂ ଲାଇନ-ଅପ୍କୁ ମଜବୁତ କରିଛି ।
ତେବେ ବୋଲିଂ ଲାଇନଅପ୍ରେ ମଧ୍ୟ ପଛରେ ନାହିଁ ପାକିସ୍ତାନ ଏବଂ ଇଂଲଣ୍ଡ । ଇଂଲଣ୍ଡ ଟିମ୍ ଇଣ୍ଡିଆ ବିପକ୍ଷରେ ODI ଏବଂ T20ରେ ଯଦିଓ ହାରିଛି, କିନ୍ତୁ ଜୋଫ୍ରା ଆର୍ଚର, ମାର୍କ ଉଡ୍ ଏବଂ ସାକିବ୍ ମହମୁଦ ନିୟମିତ ଟିମ୍ ଇଣ୍ଡିଆ ବ୍ୟାଟରଙ୍କୁ ଅକଡ଼ରେ ପକାଇଥିଲେ । ଅନ୍ୟପଟେ ଆଦିଲ ରସିଦ ଭାରତ ବିପକ୍ଷ ସିରିଜରେ ୭ ୱିକେଟ୍ ନେଇଥିଲେ । ତାଙ୍କର ସ୍ପିନ୍ ବଲ୍ ପାକିସ୍ତାନୀ ପିଚ୍ରେ ହୋଇପାରେ ପ୍ରଭାବଶାଳୀ ।
ସେହିପରି ପାକିସ୍ତାନର ଶାହିନ ଆଫ୍ରିଦି ବର୍ତ୍ତମାନ ଟ୍ରାଇ-ସିରିଜରେ ମ୍ୟାଟ୍ ହେନରୀଙ୍କ ସହ ମିଶି ସର୍ବାଧିକ ୱିକେଟ୍ ନେଇଥିବା ବୋଲର ହୋଇଛନ୍ତି । ପାକ୍ ଟିମ୍ରେ ହାରିସ୍ ରୌଫ୍ ମଧ୍ୟ ଅଛନ୍ତି । ଯିଏ ଟ୍ରାଇ ସିରିଜରେ ୩.୬୩ ଇକୋନୋମି ରେଟରେ ବୋଲିଂ କରିଛନ୍ତି । ତଥାପି ପାକିସ୍ତାନ ଟିମ୍ ସ୍ପିନ୍ ବୋଲିଂ ବିଭାଗରେ ଦୁର୍ବଳ ମନେ ହେଉଛି। ଖୁସଦିଲ ଶାହ ଏବଂ ଅବରାର ଅହମ୍ମଦଙ୍କ ବୋଲିଂ ରେକର୍ଡ ଆଦୌ ଭଲ ନୁହେଁ।
