ଭୁବନେଶ୍ଵର: ମହିଳାଙ୍କୁ ନ୍ୟାୟ ଦେବାରେ ଓଡ଼ିଶା କାହିଁକି ପଛରେ ? ଏହି ପ୍ରସଙ୍ଗ ଉଠାଇ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ବର୍ଷିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ମୁଖ୍ୟମନ୍ତ୍ରୀ କହିଛନ୍ତି ଯେ, ଓଡ଼ିଶାରେ ମହିଳା ବିରୋଧୀ ଅପରାଧରେ ଦଣ୍ଡ ବିଧାନ ହାର ମାତ୍ର ୯.୩ ପ୍ରତିଶତ । ୨୪ବର୍ଷ ଧରି ରାଜ୍ୟରେ ଶାସନ କରିଥିବା ନବୀନ ପଟ୍ଟନାୟକଙ୍କ ପାଖରେ ଗୃହ ବିଭାଗ ରହିଥିଲା । ସେ କ’ଣ ଏ କଥାକୁ ଜାଣି ପାରୁନଥିଲେ କି ବୋଲି ପ୍ରଶ୍ନ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ପୂର୍ବ ସରକାର କେବଳ ମହିଳା ସଶକ୍ତିକରଣ ନାଁରେ ଡିଣ୍ଡିମ ପିଟୁଥିଲେ ବୋଲି କହିଛନ୍ତି ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀଙ୍କ ଏଭଳି ଟାର୍ଗେଟର ଜବାବ୍ ରଖିଛି ବିଜେଡି ।
ନବୀନଙ୍କୁ ମୋହନଙ୍କ ଟାର୍ଗେଟ୍ । ପଚାରିଲେ, ମହିଳାଙ୍କୁ ନ୍ୟାୟ ଦେବାରେ ଓଡ଼ିଶା କାହିଁକି ପଛରେ ? ୨୪ ବର୍ଷ ଶାସନରେ ରହି କ’ଣ କରୁଥିଲେ ନବୀନ ? ଭାରତୀୟ ନାଗରିକ ସୁରକ୍ଷା ସଂହିତା ଏବଂ ଭାରତୀୟ ନ୍ୟାୟ ସଂହିତାର ଜାଗୃତିକରଣ କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି ଯେ, ରାଜ୍ୟରେ ମହିଳା ବିରୋଧୀ ଅପରାଧରେ ଦଣ୍ଡ ବିଧାନ ହାର ଏକ ଅଙ୍କ ଭିତରେ ରହିଛି । ଯାହାକି ଲଜ୍ୟାଜନକ । ଜାତୀୟ କ୍ରାଇମ ରେକର୍ଡ଼ ବ୍ୟୁରୋ ରିପୋର୍ଟ ଅନୁଯାୟୀ ଓଡ଼ିଶାରେ ମହିଳା ବିରୋଧୀ ଅପରାଧରେ ଦଣ୍ଡ ବିଧାନ ହାର ମାତ୍ର ୯.୩ ପ୍ରତିଶତ । ୨୪ ବର୍ଷ ଧରି ଶାସନ କରିଥିବା ନବୀନ ପଟ୍ଟନାୟକଙ୍କ ପାଖରେ ଗୃହ ବିଭାଗ ରହିଥିଲା। ସେ ଏକଥାକୁ କ'ଣ ଜାଣି ପାରୁନଥିଲେ କି ବୋଲି ପ୍ରଶ୍ନ କରିଛନ୍ତି ମୁଖ୍ୟମନ୍ତ୍ରୀ ।
ମହିଳା ବିରୋଧୀ ଅପରାଧରେ ଦଣ୍ଡ ବିଧାନ ହାର ଓଡିଶାରେ ସବୁଠୁ କମ୍ ଥିବାବେଳେ ନବୀନ ସବୁଠି ମହିଳା ସଶକ୍ତିକରଣ କଥା କହୁଥିଲେ। କମ୍ ଦଣ୍ଡ ବିଧାନ ହାର ପାଇଁ ୨ଟି କାରଣ ଦାୟୀ । ପ୍ରଥମ କାରଣ ଖାମଖିଆଲି ଢଙ୍ଗରେ ତଦନ୍ତ କରିବା। ଆଉ ଯଦି ଚାପ ପଡିଲା ତାହେଲେ ମାମଲା ହେବ ନାହିଁ । ଦ୍ଵିତୀୟଟି ହେଉଛି ରାଜନୈତିକ ଇଛା ଶକ୍ତିର ଅଭାବ। ପୂର୍ବ ସରକାର କେବଳ ମହିଳା ସଶକ୍ତିକରଣ ନାଁରେ ଡିଣ୍ଡିମ ପିଟୁ ଥିଲେ । କିନ୍ତୁ ଏବେ ଆଉ ଏସବୁ କଥା ଚାଲିବ ନାହିଁ। ମହିଳା ବିରୋଧୀ ଅପରାଧ ଜଡିତ ସବୁ ମାମଲାକୁ ବିଚାର କରି ଦଣ୍ଡ ବିଧାନ ପାଈଁ ନିର୍ଦ୍ଦେଶ ଦିଆଯାଇଛି । ଆବଶ୍ୟକ ହେଲେ ସ୍ପେଶାଲ କୋର୍ଟ ପ୍ରତିଷ୍ଠା କରିବାକୁ ହେବ ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।
ସେପଟେ ମୁଖ୍ୟମନ୍ତ୍ରୀଙ୍କ ଏଭଳି ଅଭିଯୋଗର ଜବାବ ରଖିଛି ବିଜେଡି । ବିଜେଡି ନେତା ଦେବୀ ପ୍ରସାଦ ମିଶ୍ର କହିଛନ୍ତି ମହିଳା ବିରୋଧୀ ଅପରାଧକୁ ନେଇ ମୁଖ୍ୟମନ୍ତ୍ରୀ ଯାହା ମନ୍ତବ୍ୟ ଦେଇଛନ୍ତି ତାହା ଭୁଲ। ସେ କେଉଁ ତଥ୍ୟ କୁ ଦେଖି କହିଲେ ଆମେ ଜାଣିନୁ। କିନ୍ତୁ କୁଚିଣ୍ଡା, ରାଉରକେଲା ନାବାଳିକା ଦୁଷ୍କର୍ମ ଘଟଣା,ଭରତପୁର ଥାନା ଘଟଣାରେ ସାରା ଦେଶ ହୁଲସ୍ତୁଲ ହେଲା। ଆଗ ଏଥିରେ ନ୍ୟାୟ ଦିଅନ୍ତୁ। ମୁଖ୍ୟମନ୍ତ୍ରୀ ହିସାବରେ ତାଙ୍କର ଉତ୍ତରଦାୟିତ୍ଵ ରହିଛି ବୋଲି କହିଛନ୍ତି ଦେବୀ ମିଶ୍ର ।
ମହିଳା ବିରୋଧୀ ଅପରାଧରେ ଦଣ୍ଡ ବିଧାନ କ୍ଷେତ୍ରରେ ଉତ୍ତର ପ୍ରଦେଶ ସବୁଠୁ ଆଗରେ ରହିଛି । ଯାହାକି ୭୦.୮ ପ୍ରତିଶତ । ତା ତଳକୁ ମିଜୋରାମରେ ୬୮. ୬୮ ଓ ବିହାରରେ ୬୦.୯ ପ୍ରତିଶତ ଦଣ୍ଡ ବିଧାନ ହାର ରହିଛି । ସେହି ତୁଳନାରେ ଓଡିଶାରେ ଦଣ୍ଡ ବିଧାନ ହାର ବହୁ ନଗଣ୍ୟ ।
