ନୂଆଦିଲ୍ଲୀ: ବ୍ୟାଗ୍ରେ ମହିଳାଙ୍କ ମୃତଦେହ ଭର୍ତ୍ତି କରି ଜାଳିଦେଲେ ଦୁର୍ବୃତ୍ତ । ଏଭଳି ଏକ ଭୟଙ୍କର ଘଟଣା ଘଟିଛି ଦିଲ୍ଲୀ ଗାଜୀପୁର ଅଞ୍ଚଳରେ । ରବିବାର ଘଟଣା ସାମ୍ନାକୁ ଆସିବା ପରେ ସ୍ଥାନୀୟ ଅଞ୍ଚଳରେ ହଇଚଇ ସୃଷ୍ଟି ହୋଇଛି। ପୋଲିସ ଅଭିଯୁକ୍ତକୁ ଖୋଜିବାକୁ ସର୍ଚ୍ଚ ଅପରେସନ ଜାରି ରଖିଛି।
ସୂଚନା ଅନୁଯାୟୀ, ରବିବାର ସକାଳେ ଗାଜୀପୁର ପେପର ମାର୍କେଟ ଅଞ୍ଚଳରୁ ମହିଳାଙ୍କ ଖଣ୍ଡ ବିଖଣ୍ଡିତ ମୃତଦେହ ଥିବା ଏକ ବ୍ୟାଗ୍ ମିଳିଥିଲା। ବ୍ୟାଗ ସହ ଶବ ପ୍ରାୟ ସଂପୂର୍ଣ୍ଣ ପୋଡ଼ିଯାଇଥିଲା। ତେବେ ସ୍ଥାନୀୟ ଲୋକଙ୍କଠାରୁ ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ପୋଷ୍ଟମର୍ଟମ ପାଇଁ ପଠାଇବା ସହ ତଦନ୍ତ ଆରମ୍ଭ କରିଥିଲା।
ତେବେ ପ୍ରାଥମିକ ତଦନ୍ତରୁ ପୋଲିସ ଅନୁମାନ କରୁଛି ଯେ, କେହି ଦୁର୍ବୃତ୍ତ ପ୍ରଥମେ ମହିଳାଙ୍କୁ ହତ୍ୟା କରି ବ୍ୟାଗ୍ରେ ଭର୍ତ୍ତି କରି ଫିଙ୍ଗିଦେଇଥିଲା। ଆଉ ପ୍ରମାଣ ନଷ୍ଟ କରିବାକୁ ବ୍ୟାଗ୍ରେ ନିଆଁ ଲଗାଇଦେଇଥିଲା। ଯେଉଁଥିରେ ମୃତଦେହ ପ୍ରାୟ ସଂପୂର୍ଣ୍ଣ ଜଳିଯାଇଛି।ଘଟଣାସ୍ଥଳରେ କୌଣସି ଡକ୍ୟୁମେଣ୍ଟ ମିଳିନାହିଁ। ସ୍ଥାନୀୟ ପୋଲିସ ପ୍ରତ୍ୟକ୍ଷଦର୍ଶୀଙ୍କ ବୟାନ ରେକର୍ଡ କରିଛି। ଫରେନସିକ୍ ଟିମ୍ ସହାୟତାରେ ମହିଳାଙ୍କ ଚିହ୍ନଟ କରିବାକୁ ଚେଷ୍ଟା ଜାରି ରହିଛି।
ପୋଲିସ ଉପାୟୁକ୍ତ ଅଭିଷେକ ଧନିଆ କହିଛନ୍ତି ରବିବାର ସକାଳେ ଏହି ଶବ ମିଳିଥିବା ନେଇ ପିସିଆରକୁ କଲ୍ ଆସିଥିଲା। ଏହା ପରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ପୋଷ୍ଟମର୍ଟମ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଥିଲା।ପୋଲିସ ଶବର ଚିହ୍ନଟ ଏବଂ ଅଭିଯୁକ୍ତଙ୍କ ଚିହ୍ନଟ ପାଇଁ ଆଖ ପାଖ ଅଞ୍ଚଳର ସିସିଟିଭି ଫୁଟେଜ ଯାଞ୍ଚ କରୁଛି। ପୋଲିସର କହିବା ଅନୁଯାୟୀ, ଖୁବଶୀଘ୍ର ଗିରଫ ହେବ।
