ଅହମ୍ମଦାବାଦ, ୧୦/୦୪: ରାଜସ୍ଥାନ ରୟାଲ୍ସର ଓପନର ଯଶସ୍ୱୀ ଜୈସ୍ୱାଲ ଚଳିତ ଆଇପିଏଲରେ ଏ ପର୍ଯ୍ୟନ୍ତ ଭଲ ଫର୍ମକୁ ଫେରିପାରିନାହାନ୍ତି । ଯଦିଓ ସେ ପୂର୍ବ ମ୍ୟାଚ୍ରେ ଅର୍ଦ୍ଧଶତକ ହାସଲ କରିଥିଲେ କିନ୍ତୁ ବୁଧବାର ପୁଣି ବିଫଳ ହୋଇଥିଲେ । ଫଳରେ ରାଜସ୍ଥାନ ରୟାଲ୍ସକୁ ଘରୋଇ ଗୁଜରାଟ ଟାଇଟନ୍ସ ବିପକ୍ଷରେ ଶୋଚନୀୟ ଭାବେ ପରାଜିତ ହେବାକୁ ପଡ଼ିଲା ।
ସିଜନର ପ୍ରଥମ ମ୍ୟାଚ୍ରେ ଜୈସ୍ୱାଲ ସନ୍ରାଇଜର୍ସ ହାଇଦ୍ରାବାଦ ବିପକ୍ଷରେ ଖେଳିଥିଲେ । ୫ଟି ବଲ ଖେଳି ମାତ୍ର ୧ ରନ୍ କରି ବାହୁଡ଼ି ଯାଇଥିଲେ । କୋଲକାତା ନାଇଟ୍ ରାଇଡର୍ସ ବିପକ୍ଷରେ ଯଦିଓ ସେ ଦୁଇ ଅଙ୍କ ଛୁଇଁଥିଲେ କିନ୍ତୁ ବେଶି ସମୟ ତିଷ୍ଠି ପାରିନଥିଲେ । ସେ ୨୪ ବଲରୁ ୨୯ ରନ୍ କରି ଫେରିଥିଲେ । ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ୩ ବଲ ଖେଳି ୪ ରନ୍ କରିଥିଲେ । କ୍ରମାନ୍ୱୟରେ ୩ଟି ମ୍ୟାଚ୍ରେ ବିଫଳ ହେବା ପରେ ପଞ୍ଜାବ କିଙ୍ଗ୍ସ ବିପକ୍ଷରେ ସିଜନର ପ୍ରଥମ ଅର୍ଦ୍ଧଶତକ ହାସଲ କରିଥିଲେ ।
୪୫ ବଲରୁ ସେ ୬୭ ରନ୍ କରିଥିଲେ । ପୂର୍ବ ମ୍ୟାଚ୍ରେ ପ୍ରଦର୍ଶନ ଆଧାରରେ ଆଜି ଟାଇଟନ୍ସ ବିପକ୍ଷରେ ଜୈସ୍ୱାଲ ଦ୍ରୁତ ବ୍ୟାଟିଂ କରିବେ ବୋଲି ଆଶା ରହିଥିଲା । ମାତ୍ର ଅର୍ଶଦ ଖାନଙ୍କ ବଲରେ ସେ ପାଭିଲିୟନ ଫେରିଥିଲେ । ୭ ବଲରୁ ଗୋଟିଏ ଚୌକା ସହ ୬ ରନ୍ କରି ଥିଲେ ।
ଅଧିନାୟକ ନାୟକ ସଞ୍ଜୁ ସାମସନ ଓ ସିମରନ ହେତମାୟରଙ୍କୁ ଛାଡ଼ି ଅନ୍ୟ କୌଣସି ବ୍ୟାଟର ଭଲ ପ୍ରଦର୍ଶନ କରି ପାରି ନଥିଲେ । ଫଳରେ ରାଜସ୍ଥାନ ୨୧୮ ରନର ଲକ୍ଷ୍ୟ ନେଇ ମାତ୍ର ୧୫୯ ରନ୍ରେ ସୀମିତ ରହିଥିଲା । ସିଜନରେ ରାଜସ୍ଥାନ ରୟାଲ୍ସ ଏ ପର୍ଯ୍ୟନ୍ତ ୫ଟି ମ୍ୟାଚ୍ ଖେଳି ମାତ୍ର ୨ଟିରେ ବିଜୟୀ ହେବାରେ ସଫଳ ହୋଇଛି । ୪ ପଏଣ୍ଟ ସହ ଟେବୁଲରେ ଦଳ ସପ୍ତମ ସ୍ଥାନରେ ରହିଛି ।
