ନୂଆଦିଲ୍ଲୀ 10/01 : ଭାରତୀୟ କ୍ରିକେଟର ୟୁଜଭେନ୍ଦ୍ର ଚହଲ ଏବଂ ତାଙ୍କ ପତ୍ନୀ, କୋରିଓଗ୍ରାଫର ଧନଶ୍ରୀ ବର୍ମାଙ୍କ ମଧ୍ୟରେ ଛାଡପତ୍ର ଗୁଜବ ବହୁତ ଦିନ ଧରି ଚର୍ଚ୍ଚାରେ ରହିଛି। ଯଦିଓ, ଏହାର ସତ୍ୟାସତ୍ୟ ଏପର୍ଯ୍ୟନ୍ତ ଜଣା ପଡ଼ିନି। କିନ୍ତୁ ନିକଟରେ ୟୁଜଭେନ୍ଦ୍ର ଚହଲଙ୍କୁ ଜଣେ 'ମିଷ୍ଟ୍ରି ଗାର୍ଲ' ସହିତ ଦେଥିବାକୁ ମିଳିଥିଲା। ଯାହା ଏହି ଗୁଜବକୁ ଯାଗାଇଛି ଖୋରାକ। ଭାଇରାଲ ଫଟୋ ସୋସିଆଲ ମିଡିଆରେ ଖୁବ୍ ଜୋରେ ଭାଇରାଲ୍ ହେବାରେ ଲାଗିଛି। ୟୁଜର ମାନେ ସେ ରହସ୍ୟମୟୀ ଝିଅ ବିଷୟରେ ଜାଣିବାକୁ ଆଗ୍ରହ ପ୍ରକାଶ କରିଛନ୍ତି।

ମୁମ୍ବାଇର ଏକ ହୋଟେଲରେ ୟୁଜଭେନ୍ଦ୍ର ଚହଲ ଜଣେ ମିଷ୍ଟ୍ରୀ ଗର୍ଲଙ୍କ ସହ ନଜର ଆସିଥିଲେ। ଯାହାର ଫଟୋ ଏବେ ଭାଇରାଲ ହୋଇଛି। ଯେଉଁଥିରେ ୟୁଜଭେନ୍ଦ୍ର ଏକ କାଜୁଆଲ୍ ପୋଷାକ ପିନ୍ଧିଥିଲେ ଏବଂ ରହସ୍ୟମୟୀ ଝିଅଟି ସବୁଜ ରଙ୍ଗର ଓଭରସାଇଜ୍ ସ୍ୱେଟସାର୍ଟ ପିନ୍ଧିଥିଲେ। ଏହି ଫଟୋ ଦେଖି ପ୍ରଶଂସକମାନଙ୍କ ମନରେ ପ୍ରଶ୍ନ ଏହି ଝିଅଟି ଆଉ ୟୁଜଭେନ୍ଦ୍ର ଏବଂ ଧନଶ୍ରୀଙ୍କ ସମ୍ପର୍କରେ ଫାଟ ସୃଷ୍ଟି କରିବାର କାରଣ ନୁହେଁତ?

ତେବେ ଆସନ୍ତୁ ଜାଣିବା ସେହି ରହସ୍ୟମୟ ଝିଅଟି କିଏ?

Redditର ଜଣେ ୟୁଜର ସେହି ରହସ୍ୟମୟ ଝିଅର ପରିଚୟ ପ୍ରକାଶ କରିଛନ୍ତି। ୟୁଜିଙ୍କ ସହିତ ଦେଖାଯାଇଥିବା ରହସ୍ୟମୟୀ ଝିଅଟି ଆଉ କେହି ନୁହେଁ ବରଂ ଆର୍ ଜେ ମହୱାସ୍। ଏହି ୟୁଜର ମହୱାଶଙ୍କ ଇନଷ୍ଟାଗ୍ରାମ ପୋଷ୍ଟ ମାଧ୍ୟମରେ ପ୍ରମାଣ କରିଛନ୍ତି ଯେ ସେ , ୟୁଜଭେନ୍ଦ୍ର ଚହଲ  ସେମାନଙ୍କ ବନ୍ଧୁ ଏକାଠି ଖ୍ରୀଷ୍ଟମାସ ଲଞ୍ଚ୍ କରିଥିଲେ। ତେବେ ମହୱାଶଙ୍କ ସହ ୟୁବେନ୍ଦ୍ର ସଂପର୍କକୁ ନେଇ ସେମିତି କିଛି କହିବା ଠିକ୍ ହବନି। ପ୍ରକୃତ କଥା ତ ସମୟ କହିବ। 

ଅନ୍ୟପଟେ,  ଛାଡପତ୍ର ଗୁଜବ ମଧ୍ୟରେ ଧନଶ୍ରୀ ବର୍ମା ତାଙ୍କର ନୀରବତା ଭାଙ୍ଗିଛନ୍ତି। ସେ ଇନଷ୍ଟାଗ୍ରାମରେ ଏକ ଲମ୍ବା ନୋଟ୍ ପୋଷ୍ଟ କରିଛନ୍ତି, ଯେଉଁଥିରେ ସେ ଛାଡପତ୍ର ଗୁଜବକୁ ଖଣ୍ଡନ କରିଛନ୍ତି। ଧନଶ୍ରୀ ଲେଖିଛନ୍ତି, "ମୋ ବିଷୟରେ ମିଥ୍ୟା କଥା ଲେଖାଯାଉଛି ଏବଂ ମୋର ପ୍ରତିଷ୍ଠା ନଷ୍ଟ ହେଉଛି। ମୁଁ ବର୍ଷ ବର୍ଷ ଧରି ମୋର ନାମ ଏବଂ ପ୍ରତିଷ୍ଠା ତିଆରି କରିବାକୁ କଠିନ ପରିଶ୍ରମ କରିଛି। ମୋର ନୀରବତା ଦୁର୍ବଳତାର ଲକ୍ଷଣ ନୁହେଁ, ବରଂ ଶକ୍ତିର ଲକ୍ଷଣ।"

ଧନଶ୍ରୀ ତାଙ୍କ ଇନଷ୍ଟାଗ୍ରାମ ଷ୍ଟୋରୀରେ ଲେଖିଛନ୍ତି, "ଅନଲାଇନରେ ଘୃଣା ପ୍ରସାର କରିବା ସହଜ, କିନ୍ତୁ ଅନ୍ୟମାନଙ୍କୁ ସାହସ ଏବଂ ସହାନୁଭୂତି ଆବଶ୍ୟକ। ମୁଁ ମୋର ସତ୍ୟ ଉପରେ ଧ୍ୟାନ ଦିଏ ଏବଂ ମୋର ମୂଲ୍ୟବୋଧକୁ ଧରି ଆଗକୁ ବଢ଼େ। କୌଣସି ବାହାନା ବିନା ସତ୍ୟ କଥାରେ ହିଁ ନିଜକୁ ପ୍ରମାଣିତ କରେ।"

ତେବେ ଚହଲ ଏବଂ ତାଙ୍କ ପତ୍ନୀ ଧନଶ୍ରୀ ବର୍ମାଙ୍କ ଛାଡ଼ପତ୍ର ନେଇ ଚର୍ଚ୍ଚା ପଛରେ କାରଣ ବି ରହିଛି । ଦୁହେଁ ଦୁହିଁଙ୍କୁ ସୋସିଆଲ ମିଡିଆ ପ୍ଲାଟଫର୍ମ ଇନଷ୍ଟାଗ୍ରାମରେ ଅନ୍ଫଲୋ କରିଛନ୍ତି । ଏପରିକି ୟୁଜବେନ୍ଦ୍ର ଧନଶ୍ରୀଙ୍କ ସହ ଥିବା ଫଟୋ ସବୁ ଡିଲିଟ୍ କରିଦେଇଛନ୍ତି । ସେପଟେ ଧନଶ୍ରୀ ଚହଲଙ୍କୁ ଅନଫଲୋ କରିଥିଲେ ସୁଦ୍ଧା ତାଙ୍କ ସହ ଥିବା ଫଟୋ ଡିଲିଟ୍ କରିନାହାନ୍ତି । କିନ୍ତୁ ଛାଡ଼ପତ୍ର ନେଇ କୌଣସି ଆନୁଷ୍ଠାନିକ ଘୋଷଣା ହୋଇନି ।  ଏହା ପୂର୍ବରୁ ୨୦୨୩ରେ ଧନଶ୍ରୀ ବର୍ମା ଏବଂ ୟୁଜେବନ୍ଦ୍ର ଚହଲଙ୍କ ସଂପର୍କରେ ଫାଟ ସୃଷ୍ଟି ହୋଇଥିଲା । ସେତେବେଳେ ଧନଶ୍ରୀ ନିଜ ଇନଷ୍ଟାଗ୍ରାମରେ ଥିବା ନାଁରୁ ‘ଚହଲ’ ହଟାଇ ଦେଇଥିଲେ । ଏହା ପରଦିନ  ଚହଲ ଏକ ପୋଷ୍ଟ କରି ଲେଖିଥିଲେ, ‘ନୂଆ ଜୀବନ ଆରମ୍ଭ ହେଉଛି।’ କିନ୍ତୁ ଛାଡ଼ପତ୍ର ନେଇ ହେଉଥିବା ଚର୍ଚ୍ଚାକୁ ସେ ଖଣ୍ଡନ କରିଥିଲେ । ସେ ନିଜର ପ୍ରଶଂସକଙ୍କୁ ଏଭଳି ଗୁଜବ ଉପରେ ବିଶ୍ବାସ ନକରିବାକୁ ଅପିଲ୍ କରିଥିଲେ ।  

ୟୁଜବେନ୍ଦ୍ର ଚହଲ ଏବଂ ଧନଶ୍ରୀ ବର୍ମା ୧୧ ଡିସେମ୍ବର ୨୦୨୦ରେ ବିବାହ କରିଥିଲେ ।  ଝଲକ୍ ଦିଖଲା ଯା’ ସିଜନ୍ ୧୧ରେ ଧନଶ୍ରୀ ନିଜର ପ୍ରେମ କାହାଣୀ ସଂପର୍କରେ କହିଥିଲେ ।  ସେପଟେ ୟୁଜବେନ୍ଦ୍ର ଚହଲଙ୍କ କ୍ରିକେଟ କ୍ୟାରିୟର କଥା କହିଲେ, ସେ ଦୀର୍ଘ ଦିନ ହେଲା ଟିମ୍ ଇଣ୍ଡିଆରୁ ବାହାରେ ଅଛନ୍ତି । ତାଙ୍କୁ ଆଇପିଏଲ ୨୦୨୫ ଲାଗି ପଞ୍ଜାବ କିଙ୍ଗ୍ସ ୧୮ କୋଟି ଟଙ୍କା କିଣିଛି ।