ନୂଆଦିଲ୍ଲୀ ୧୯।୧୧: ଆଗାମୀ ବିଧାନସଭା ନିର୍ବାଚନକୁ ନେଇ ଦିଲ୍ଲୀ ପୋଲିସ ଏବେ ପ୍ରସ୍ତୁତ। ଏହିକ୍ରମରେ ଦିଲ୍ଲୀ ପୋଲିସ ଅଧିନିୟମ ପ୍ରାବଧାନରେ ୧,୧୦୦ରୁ ଅଧିକ ଅଭ୍ୟାସଗତ ଅପରାଧୀଙ୍କୁ ରାଜଧାନୀରୁ ତଡାଯାଇଛି। ଏକ ଅଧିକାରୀକ ବୟାନରେ ଏହି ସୂଚନା ଦିଆଯାଇଛି। ପୋଲିସର ଜନୈକ ବରିଷ୍ଠ ଅଧିକାରୀ କହିଛନ୍ତି ଯେ ଶାନ୍ତି ଓ ସଦଭାବନା କାୟମ ରଖିବା ଉଦ୍ଦେଶ୍ୟରେ ନିଆଯାଇଥିବା ପଦକ୍ଷେପ ଅପରାଧୀଙ୍କୁ ଏକ ନିଶ୍ଚିତ ଅବଧି ନିମନ୍ତେ ବିଶେଷ କ୍ଷେତ୍ରରୁ ଦୂରରେ ରଖିବା ପାଇଁ ନିଆଯାଇଥାଏ।
ଅଧିକାରୀ କହିଛନ୍ତି ଯେ ଦିଲ୍ଲୀର ବିଭିନ୍ନ ଜିଲ୍ଲାରୁ ମୋଟ ୧,୧୩୦ ଜଣଙ୍କୁ ରାଜଧାନୀରୁ ତଡା ଯାଇଛି। ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ କରିବାକୁ ଦିଲ୍ଲୀ ପୋଲିସ ଅଧିନିୟମ ୪୭ ଓ ୪୮ (ଅପରାଧ ଘଟାଉଥିବା ବ୍ୟଙ୍କିଙ୍କୁ ହଟାଇବା) ଉପଯୋଗୀ ସାବ୍ୟସ୍ତ ହୋଇଛି। ସେ କହିଛନ୍ତି ଯେ ଏହି ପ୍ରକ୍ରିୟାରେ ପ୍ରଥମେ ସମ୍ପୃକ୍ତ ବ୍ୟକ୍ତିଙ୍କୁ ନୋଟିସ୍ ଦିଆଯାଏ। ଏଥିରେ ତାଙ୍କୁ ସହରରୁ କାହିଁକି ତଡା ନଯିବ ସେ ନେଇ କାରଣ ଦର୍ଶାଇବାକୁ କୁହାଯାଏ। ଯଦି ତାଙ୍କର ସ୍ପଷ୍ଟିକରଣ ସନ୍ତୋଷଜନକ ନ ହୁଏ ତେବେ ତାଙ୍କ ବିରୋଧରେ ପରବର୍ତ୍ତୀ କାର୍ଯ୍ୟାନୁଷ୍ଠାନ କରାଯାଏ।
ତେବେ ରାଜଧାନୀ ଦିଲ୍ଲୀରୁ ଅପରାଧୀଙ୍କୁ ଦୂରେଇ ରଖିବା ପାଇଁ ସେମାନଙ୍କୁ ତଡାଯିବା କିଛି ନୂଆ ଘଟଣା ନୁହେଁ। ଏହା ପୂର୍ବରୁ ୨୦୧୫ ମସିହାରେ ୨୬୮, ୨୦୧୬ ମସିହାରେ ୨୧୫, ୨୦୧୭ ମସିହାରେ ୧୩୩, ୨୦୧୮ ମସିହାରେ ୭୯, ୨୦୧୯ ମସିହାରେ ୩୦୨, ୨୦୨୦ ମସିହାରେ ୧୭୬, ୨୦୨୧ ମସିହାରେ ୩୧୧, ୨୦୨୨ ମସିହାରେ ୭୧୬ ଓ ୨୦୨୩ ମସିହାରେ ୬୧୯ ଜଣଙ୍କୁ ସହରରୁ ତଡା ଯାଇଥିଲା। ପୋଲିସ ଅଧିକାରୀ କହିଛନ୍ତି ଯେ ଅଭ୍ୟାସଗତ ଅପରାଧୀଙ୍କୁ ସହରରୁ ବାହାର କରିବା ସମାଜରେ ଶାନ୍ତି ଓ ସଦଭାବନା କାୟମ ରଖିବାରେ ଗୁରୁତ୍ୱପୂର୍ଣ୍ଣ ହୋଇଥାଏ।
ଉଲ୍ଲେଖଯୋଗ୍ୟ ଯେ ଦିଲ୍ଲୀ ବିଧାନସଭା ନିର୍ବାଚନ ପାଇଁ ଜାରି ହୋଇଥିବା ଆଦର୍ଶ ଆଚରଣ ସଂହିତା ଅନୁସାରେ ପୋଲିସ ଏବେ ବେଶ୍ ସତର୍କ ଅଛି। ଧାର୍ଯ୍ୟ ସୀମାରୁ ଅଧିକ ମୋକଦ୍ଦମା ଥିବା ଅପରାଧୀଙ୍କ ବିରୋଧରେ କାର୍ଯ୍ୟାନୁଷ୍ଠାନ କରାଯାଉଛି। ଦିଲ୍ଲୀରେ ଫେବୃଆରୀ ୫ ତାରିଖ ଦିନ ଭୋଟ ଗ୍ରହଣ ହେବ ଓ ୮ ତାରିଖରେ ଭୋଟ ଗଣନା ହେବ।
