ଖନୌରୀ ୧୯।୧: କେନ୍ଦ୍ର ସରକାର ଫେବୃଆରୀ ୧୪ ତାରିଖରେ ପଞ୍ଜାବର ବିକ୍ଷୋଭକାରୀ ଚାଷୀଙ୍କ ସହ ଚଣ୍ଡିଗଡ଼ରେ ବୈଠକ କରିବେ, ଯେଉଁଥିରେ ସେମାନଙ୍କ ଦାବି ଉପରେ ଆଲୋଚନା କରାଯିବ। ସରକାରଙ୍କ ଜନୈକବରିଷ୍ଠ ଅଧିକାରୀ ରବିବାର ଏହି ସୂଚନା ଦେଇଛନ୍ତି। ସେ କହିଛନ୍ତିଯେ ଏହି ବୈଠକ ଚଣ୍ଡିଗଡ଼ ସେକ୍ଟର ୨୬ସ୍ଥିତ ମହାତ୍ମା ଗାନ୍ଧି ଇନିଷ୍ଟିଚ୍ୟୁଟରେ ଅନୁଷ୍ଠିତ ହେବ। ଏଥିରେ ଆନ୍ଦୋଳନକାରୀ ଚାଷୀ ଓ ସରକାର ଅଂଶଗ୍ରହଣ କରିବେ।
ଏହି ସୂଚନା ମିଳିବା ପରେ ପଞ୍ଜାବର ୧୧୧ ଚାଷୀଙ୍କ ପଞ୍ଚମ ଦିନରେ ପହଞ୍ଚିଥିବା ଅନଶନ ଓ ହରିୟାଣାରେ ୩ ଦିନରେ ପହଞ୍ଚିଥିବା ୧୦ ଚାଷୀଙ୍କ ଆମରଣ ଅନଶନ ରବିବାର ସମାପ୍ତ ହୋଇଛି। କୃଷକ ନେତା କାକା ସିଂହ କୋଟଡା, ସୁଖଜିତ ସିଂହ ହରଦୋଝଣ୍ଡେ ଓ ବଲଦେବ ସିଂହ ସିରସା ଅନଶନକାରୀ ଚାଷୀଙ୍କୁ ଫଳ ରସ ପିଆଇ ସେମାନଙ୍କ ଅନଶନ ସମାପ୍ତ କରାଇଛନ୍ତି। ଆନ୍ଦୋଳନକାରୀ ଚାଷୀ ଫସଲର ଏମଏସପି ନିମନ୍ତେ ଆଇନଗତ ଗ୍ୟାରେଣ୍ଟି ଦାବି କରୁଛନ୍ତି।
ପ୍ରସ୍ତାବିତ ବୈଠକ ଘୋଷଣା ପରେ କୃଷକ ନେତା ଜଗଜିତ ସିଂହ ଡଲ୍ଲେବାଲ ଚିକିତ୍ସା ସହାୟତା ନେବା ପାଇଁ ରାଜି ହୋଇଛନ୍ତି। ତାଙ୍କ ଅନଶନ ୫୪ ଦିନରେ ପ୍ରବେଶ କରିଥିବା ବେଳେ ତାଙ୍କୁ ଗ୍ଲୁକୋଜ ଲଗାଯାଇଛି। ତେବେ ଦାବି ପୂରଣ ନ ହେବା ପର୍ଯ୍ୟନ୍ତ ସେ ଅନ୍ନ ଓ ଭୋଜନ ଗ୍ରହଣ କରିବେ ନାହିଁ ବୋଲି ସଫାସଫା କହିଛନ୍ତି। ଏହା ପୂର୍ବରୁ କେନ୍ଦ୍ର କୃଷି ମନ୍ତ୍ରାଳୟଙ୍କ ଯୁଗ୍ମ ସଚିବ ପ୍ରିୟ ରଞ୍ଜନଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଅନଶନରେ ବସିଥିବା ଡଲ୍ଲେବାଲଙ୍କ ନିକଟକୁ ପହଞ୍ଚି ଆଲୋଚନା କରିଛନ୍ତି।
ପ୍ରତିନିଧି ଦଳ ଗତ ୧୧ ମାସ ହେଲା ଆନ୍ଦୋଳନ ଚଳାଇ ଆସୁଥିବା ସଂଯୁକ୍ତ କିଷାନ ମୋର୍ଚ୍ଚା (ଅଣ ରାଜନୈତିକ) ଓ କିଷାନ ମଜଦୂର ମୋର୍ଚ୍ଚାର ପ୍ରତିନିଧିଙ୍କ ସହିତ ଆଲୋଚନା କରିଛନ୍ତି। ଏହି ବୈଠକ ଘୋଷଣା ପରେ କୃଷକ ନେତାମାନେ ଡଲ୍ଲେବାଲଙ୍କୁ ଚିକିତ୍ସା ସହାୟତା ନେବାକୁ ଅନୁରୋଧ କରିଥିଲେ, ଯାହା ଦ୍ୱାରା ହେବାକୁ ଥିବା ବୈଠକରେ ସେ ଅଂଶଗ୍ରହଣ କରିପାରିବେ। କେନ୍ଦ୍ର ସରକାର ମଧ୍ୟ ସେ ଅନଶନ ସମାପ୍ତ କରି ବୈଠକରେ ଅଂଶଗ୍ରହଣ କରିବେ ବୋଲି ଆଶାବ୍ୟକ୍ତ କରିଛନ୍ତି।
ଗତବର୍ଷ ଫେବୃଆରୀରେ କେନ୍ଦ୍ର ମନ୍ତ୍ରୀଙ୍କ ସହିତ ଆଲୋଚନା ବିଫଳ ହେବା ପରେ ପ୍ରଥମ ଥର କେନ୍ଦ୍ରିୟ ପ୍ରତିନିଧି ଦଳ ପ୍ରସ୍ତାବ ସହିତ ଆନ୍ଦୋଳନରତ ଚାଷୀଙ୍କୁ ଭେଟିଛନ୍ତି। ଗତବର୍ଷ ୮,୧୨,୧୫ ଓ ୧୮ ଫେବୃଆରୀରେ କେନ୍ଦ୍ରମନ୍ତ୍ରୀ ଓ ଆନ୍ଦୋଳନକାରୀ ଚାଷୀଙ୍କ ମଧ୍ୟରେ ୪ ରାଉଣ୍ଡ ଆଲୋଚନା ହୋଇଥିଲା। ତେବେ ଏହି ଆଲୋଚନା ବିଫଳ ହୋଇଥିଲା। ଏଣୁ ଗତବର୍ଷ ଫେବୃଆରୀ ୧୩ ତାରିଖରୁ ସଂଯୁକ୍ତ କିଷାନ ମୋର୍ଚ୍ଚା (ଅଣ-ରାଜନୈତିକ) ଓ କିଷାନ ମଜଦୂର ମୋର୍ଚ୍ଚା ବ୍ୟାନରରେ ଚାଷୀମାନେ ଶମ୍ଭୁ ଓ ଖନୌରୀ ସୀମାରେ ବସି ରହିଛନ୍ତି। କାରଣ ସୁରକ୍ଷା କର୍ମୀମାନେ ସେମାନଙ୍କୁ ଦିଲ୍ଲୀ ସୀମାରେ ପ୍ରବେଶ ଅନୁମତି ଦେଇ ନଥିଲେ।
