ମାଲକାନଗିରି ୦୮।୦୪ : ଲାଲ୍ ସଂଗଠନକୁ ଝଟ୍କା । ଛତିଶଗଡର ଦାନ୍ତେୱାଡାରେ ସୁରକ୍ଷା ବାହିନୀ ନିକଟରେ ୨୬ ଜଣ ନକ୍ସଲ ଆତ୍ମସମର୍ପଣ କରିଛନ୍ତି । ସେମାନଙ୍କ ମଧ୍ୟରେ ୩ ଜଣଙ୍କ ମୁଣ୍ଡରେ ୫୦ ହଜାରରୁ ୩ ଲକ୍ଷ ଟଙ୍କା ପର୍ଯ୍ୟନ୍ତ ପୁରସ୍କାର ରାଶି ରହିଥିଲା ।
ଦାନ୍ତେୱାଡା ଏସ୍ପି ଗୌରବ ରାୟଙ୍କ ସୂଚନା ଅନୁସାରେ ଆତ୍ମସମର୍ପଣ କରିଥିବା ନକ୍ସଲମାନେ ହେଉଛନ୍ତି ଜନମିଲିସିଆ, ଜନତାନ ସରକାର ଓ ଆରପିସି (ରିଭୋଲ୍ୟୁସନାରୀ ପାର୍ଟି କମିଟି)ର ସଦସ୍ୟ । ଏହା ଛଡା ଦଣ୍ଡକାରଣ୍ୟ ଆଦିବାସୀ କିଷାନ ମଜଦୁର ସଙ୍ଗଠନ ଓ ଚେତନା ନାଟ୍ୟ ମଣ୍ଡଳୀ ଭଳି ନକ୍ସଲଙ୍କ ଛାମୁଆଁ ସଙ୍ଗଠନର ସଦସ୍ୟ ମଧ୍ୟ ଅଛନ୍ତି । ନକ୍ସଲଙ୍କ ତ୍ରୁଟିପୂର୍ଣ୍ଣ ବିଚାରଧାରାକୁ ଛାଡି ସେମାନେ ବରିଷ୍ଠ ପୁଲିସ ଓ ସିଆରପିଏଫ ଅଧିକାରୀଙ୍କ ନିକଟରେ ଆତ୍ମସମର୍ପଣ କରିଛନ୍ତି । ଏହି ନକ୍ସଲଙ୍କ ମଧ୍ୟରେ ଅଛନ୍ତି ଆମଦାଇ ଏରିଆ ଜନମିଲିସିଆ କମାଣ୍ଡର ରାଜେଶ କଶ୍ୟପ, ଜନତାନ ସରକାର ସ୍କ୍ୱାଡ଼ ମୁଖ୍ୟ କୋଶା ଦେବୀ ଓ ଚେତନା ନାଟ୍ୟ ମଞ୍ଚର ଛୋଟୁ କୁଞ୍ଜମ । ରାଜେଶ କଶ୍ୟପଙ୍କ ମୁଣ୍ଡରେ ୩ ଲକ୍ଷ, କୋଶା ଦେବୀଙ୍କ ମୁଣ୍ଡରେ ୧ ଲକ୍ଷ ଏବଂ ଛୋଟୁ କୁଞ୍ଜମଙ୍କ ମୁଣ୍ଡ ଉପରେ ୫୦ ହଜାର ଟଙ୍କାର ପୁରସ୍କାର ରାଶି ରହିଥିଲା । ଏହାକୁ ମିଶାଇ କେବଳ ଦାନ୍ତେୱାଡାରେ ଗତ ୨୦୨୦ ଜୁନ୍ରୁ ଏପର୍ଯ୍ୟନ୍ତ ମୋଟ ୯୫୩ ଜଣ ନକ୍ସଲ ଆତ୍ମସମର୍ପଣ କରିସାରିଲେଣି ।
