କଟକ ୦୫।୦୪ : ପୋଲିସ ବିଭାଗ ପ୍ରତି ରାଜ୍ୟ ସରକାର ଖୁବ ଯତ୍ନବାନ ଅଛନ୍ତି। ହାବିଲଦାର କନଷ୍ଟେବଳ ଓ ସିପାହୀ ମହାସଂଘର ଯେଉଁ ସବୁ ଦାବି ରହିଛି ତାହା ଚଳିତ ଆର୍ଥିକ ବର୍ଷରେ ପୂରଣ କରାଯିବ ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା। କଟକ ସ୍ଥିତ ଓଏସ୍ଏପି ଷଷ୍ଠ ବାଟାଲିୟନର ୪୬ ତମ ବାର୍ଷିକ ଉତ୍ସବରେ ଯୋଗଦେଇ ଏପରି କହିଛନ୍ତି ଉପମୁଖ୍ୟମନ୍ତ୍ରୀ ।
ସେହିପରି ରାଜସ୍ବମନ୍ତ୍ରୀ ସୁରେଶ ପୂଜାରୀ କହିଛନ୍ତି ଯେ, ବାଟାଲିୟନ ପାଇଁ ଜାଗାର ଅଭାବ ରହିଛି, କଟକ ସହର ସମ୍ପ୍ରସାରଣ ପ୍ରକଳ୍ପ ଲାଗି ବାଟାଲିୟନର କିଛି ଜାଗାକୁ ଜିଲ୍ଲା ପ୍ରଶାସନ ପକ୍ଷରୁ ଅଧିଗ୍ରହଣ କରାଯାଇଥିଲା। ତେଣୁ ଜାଗା ଯୋଗାଇ ଦେବାକୁ ମହାସଂଘ ଦାବି କରିଛି। ଯାହା ଖୁବ ଶୀଘ୍ର ପୂରଣ କରାଯିବ। ଆଗାମୀ ଦିନରେ ମହାସଂଘର ଦାବିକୁ ପୂରଣ ଦିଗରେ ସରକାର କାମ କରିବେ ।
ତେବେ ଆୟୋଜିତ ଉତ୍ସବରେ ଚୌଦ୍ୱାର କଟକ ବିଧାୟକ ସୌଭିକ ବିଶ୍ୱାଳ ଯୋଗଦେଇଥିଲେ। ପୋଲିସ କଲ୍ୟାଣ ପାଣ୍ଠିକୁ ୧୦ ଲକ୍ଷ ଟଙ୍କାର ଅନୁଦାନ ରାଶି ଦେବାକୁ ବିଧାୟକ ସୌଭିକ କହିଛନ୍ତି। ଶୁକ୍ରବାର ସଂନ୍ଧ୍ୟାରେ ମହାସଂଘ ପକ୍ଷରୁ ବାର୍ଷିକ ଉତ୍ସବ ପାଳନ କରାଯାଇଛି। ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ମଧ୍ୟ ହୋଇଥିଲା।
