ଭୁବନେଶ୍ଵର:  ରାତି ପାହିଲେ ଶ୍ରୀରାମ ନବମୀ । ସମ୍ବଲପୁର , ଭଦ୍ରକ , କଟକ ଆଦି ସହରରେ ବାହାରିବ ରାମନବମୀ ଶୋଭାଯାତ୍ରା । ଏଥର ଶ୍ରୀରାମ ନବମୀକୁ ଶାନ୍ତି ଶୃଙ୍ଖାଳାର ସହ ପାଳି କରିବାକୁ ଏହି ସବୁ ସହରରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ସମ୍ବଲପୁର ସହରର ସମ୍ବେଦନଶିଳୀ ଅଞ୍ଚଳରେ ପୋଲିସ ପଇଁତରା ମାରିଥିବା , ପୂରା ସହରକୁ ସିସିଟିଭି ଓ ଡ୍ରୋନ ସର୍ଭିଲାନସରେ ରଖାଯାଇଛି । ସେହିଭଳି ଭଦ୍ରକ ସହରକୁ ମଧ୍ୟ ଜଗିବେ ବ୍ୟପକ ପୋଲିସ ଫୋର୍ସ । 

ପୋଲିସ ଛାଉଣୀରେ ସମ୍ବଲପୁର ସହର | ସିସିଟିଭି ଓ ଡ୍ରୋନ୍ ସର୍ଭିଲାନ୍ସରେ ସହରର ମୁଖ୍ୟ ଓ ସମ୍ବେଦନଶୀଳ ସ୍ଥାନ । କାରଣ ରାତି ପାହିଲେ ପାଳିତ ହେବ ରାମ ନବମୀ |  ଆଉ ସୁରକ୍ଷା ପାଇଁ ଏ ସବୁ ବ୍ୟବସ୍ଥା । ଗତକାଲି ସଂଧ୍ୟାରେ ପୋଲିସ ଫ୍ଲାଗ ମାର୍ଚ୍ଚ କରିଥିବା ବେଳେ ସମ୍ବେଦନଶୀଳ ଅଞ୍ଚଳରେ ଡଗ ସ୍କ୍ବାର୍ଡ, ବମ୍ ସ୍କ୍ବାଡ ଜରିଆରେ କଡ଼ାକଡ଼ି ଚେକିଂ ଚାଲିଛି | ଖାସ କରି ମୋତିଝରଣ ଅଂଚଳ, ଧନକଉଡା ମାର୍ଗରେ ପୋଲିସ ଘର, ଛାତ ଉପର,ଦୋକାନ ଘର ଛାନଭିନ କରିଛି | ଶୋଭାଯାତ୍ରା ଓ ବାଇକ ରାଲି ଯିବାକୁ ଥିବା ଅଞ୍ଚଳ ସଂପୂର୍ଣ୍ଣ ପୋଲିସ ସର୍ଭିଲାନ୍ସରେ ରହିଛି |  ସହରର ପ୍ରତି ଛକରେ ଷ୍ଟାଣ୍ଡ ପୋଷ୍ଟ କରାଯିବା ସହ ବିଏସଏଫ, ରାପିଡ ଆକ୍ସନ ଫୋର୍ସ, ଓଡିଶା ପୋଲିସ ମୂତୟନ ହୋଇଛନ୍ତି |  ୨୦୨୩ 2ପରି ସ୍ଥିତି ନହେବା ପାଇଁ ପୋଲିସ ସବୁ ପ୍ରକାର କସରତ କରୁଛି |  ଅତିରିକ୍ତ ଏସପି, ଏସଡିପିଓ, ଥାନା ଅଧିକାରୀମାନେ ଘନ ଘନ ପଇଁତରା ମାରୁଛନ୍ତି । ରାମ ନବମୀ ପରେ ହନୁମାନ ଜୟନ୍ତୀ ଯାଏଁ ସମ୍ବଲପୁର ସହର ଏଭଳି କଡା ସୁରକ୍ଷା ବଳୟରେ ରହିବ |

ଏ ହେଉଛି ଭଦ୍ରକ ସହରର ଦୃଶ୍ୟ । ଶ୍ରୀରାମ ନବମୀ ପାଇଁ ପୁରା ସହର ଗୈରିକମୟ ହୋଇଛି । ମହୋତ୍ସବ ପାଇଁ ବିଭିନ୍ନ କାର୍ଯ୍ୟକ୍ରମ ଆୟୋଜିତ ହୋଇଥିବାବେଳେ ସ୍ଥାନୀୟ ଗାନ୍ଧି ପଡ଼ିଆରେ ଆଧ୍ୟାତ୍ମିକ ଓ ସାଂସ୍କୃତିକ କାର୍ଯ୍ୟକ୍ରମ ଜାରି ରହିଛି I  ଏଥର ୩୫ ବର୍ଷରେ ପଦାର୍ପଣ କରୁଛି ଭଦ୍ରକ ଶ୍ରୀରାମ ନବମୀ ମହାଯଜ୍ଞ ସମିତି । ବିଭିନ୍ନ ମେଢ କମିଟି ନିଜ ମେଢକୁ ସରସ ସୁନ୍ଦର କରିବାକୁ ଲାଗି ପଡ଼ିଛନ୍ତି । ଆଇନ ଶୃଙ୍ଖଳା ପାଇଁ କ୍ରାଇମବ୍ରାଞ୍ଚ ସ୍ବତନ୍ତ୍ର ଡ଼ିଜି ବିନୟତୋଷ ମିଶ୍ରଙ୍କ ଅଧ୍ୟକ୍ଷତାରେ ସମୀକ୍ଷା ବୈଠକ ବସିଥିଲା । ଯେଉଁଥିରେ ବରିଷ୍ଠ ପୋଲିସ ଅଧିକାରୀ ଯୋଗଦେଇଥିଲେ । ଏଥର ଭଦ୍ରକରେ ୨୭ ପ୍ଲାଟୁନ ଫୋର୍ସ ମୁତୟନ ହେବେ । ଗୋଟିଏ କଂପାନୀ ସିଆରପିଏଫ , ଗୋଟିଏ କମ୍ପାନୀ ବିଏସଏଫ ଓ ଗୋଟିଏ କଂପାନୀ ରାପିଡ୍ ଆକ୍ସନ ଫୋର୍ସ ବି ମୃତୟନ ପାଇଁ ଯୋଜନା ହୋଇଛି । ସହର ସାରା ପୋଲିସ ପଇଁତରା ମାରିବା ସହ ଫ୍ଲାଗ୍ ମାର୍ଚ୍ଚ କରିଛି । ବିଭିନ୍ନ ସ୍ଥାନରେ ବଜ୍ର ଗାଡ଼ି ବୁଲିଛି । ସହର ଉପରେ ନଜର ରଖିବ ଡ୍ରୋନ୍ କ୍ୟାମେରା । ସେହିପରି କଟକରେ ମଧ୍ୟ ରାମ ନବମୀ ପାଇଁ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ସହରର ବିଭିନ୍ନ ସମ୍ବେଦନଶୀଳ ଅଞ୍ଚଳରେ ପୋଲିସ ଫ୍ଲାଗ ମାର୍ଚ୍ଚ କରିଛି।