ନୂଆଦିଲ୍ଲୀ: ସାଉଥ୍ ସୁଡାନରେ ଭୟଙ୍କର ବିମାନ ଦୁର୍ଘଟଣା। ଚାଲିଗଲା ୧୮ ଜଣଙ୍କ ଜୀବନ। ବୁଧବାର ଦକ୍ଷିଣ ସୁଡାନର ୟୁନିଟି ଷ୍ଟେଟରେ ୨୧ ଜଣ ଯାତ୍ରୀ ଏବଂ କର୍ମଚାରୀଙ୍କୁ ନେଇ ଯାଉଥିବା ଏକ ବିମାନ ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ୧୮ ଜଣଙ୍କର ମୃତ୍ୟୁ ହୋଇଥିବା ଜାତିସଂଘ ରେଡିଓ ମିରାୟାରେ ରିପୋର୍ଟ ପ୍ରକାଶ ପାଇଛି। 

ଦକ୍ଷିଣ ସୁଡାନରେ ମିଳିତ ଜାତିସଂଘ ମିଶନ (UNMISS) ଦ୍ୱାରା ପରିଚାଳିତ ରେଡିଓ ମିରାୟାର ରିପୋର୍ଟ ଅନୁଯାୟୀ, ବିମାନଟି ଉତ୍ତର ରାଜ୍ୟର ଏକ ଅଏଲଫିଲ୍ଡରୁ ଯାତ୍ରା କରିବା ସମୟରେ ଦୁର୍ଘଟଣାଗ୍ରସ୍ତ ହୋଇଥିଲା। ରେଡିଓ ରିପୋର୍ଟରେ ଘଟଣା ବିଷୟରେ ଅଧିକ ତଥ୍ୟ ଦିଆଯାଇ ନଥିବା ବେଳେ ଦକ୍ଷିଣ ସୁଡାନର ସୂଚନା ମନ୍ତ୍ରୀ ମାଇକେଲ ମୁକୁଏଲ ଘଟଣା ସମ୍ପର୍କର କୌଣସି ମନ୍ତବ୍ୟ ଦେଇ ନାହାନ୍ତି। 

ଯୁଦ୍ଧଗ୍ରସ୍ତ ଦକ୍ଷିଣ ସୁଡାନରେ ଏଇ ଗିଛି କିଛି ବର୍ଷ ହେବ ଅନେକ ବିମାନ ଦୁର୍ଘଟଣା ହୋଇଛି। ସେପ୍ଟେମ୍ବର ୨୦୧୮ରେ ଏଭଳି ଏକ ଦୁର୍ଘଟଣା ହୋଇଥିଲା। ଏକ ଛୋଟ ବିମାନ ରାଜଧାନୀ ଜୁବାରୁ ୟିରୋଲ ସହରକୁ ଉଡ଼ାଣ ଭରୁଥିବା ବେଳେ ଦୁର୍ଘଟଣାଗ୍ରସ୍ତ ହୋଇଥିଲେ। ଏଥିରେ ୧୯ ଯାତ୍ରୀଙ୍କର ମୃତ୍ୟୁ ହୋଇଥିଲା। 

ସେହିଭଳି ୨୦୧୫ରେ ରାଜଧାନୀ ଜୁବା ବିମାନବନ୍ଦରରୁ ଉଡ଼ାଣ ଭରିଥିବା ଋଷ ନିର୍ମିତି ଏକ କାର୍ଗୋ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଏଥିରେ ୧୨ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା।