ନୂଆଦିଲ୍ଲୀ: ଆତଙ୍କବାଦୀ କାର୍ଯ୍ୟକଳାପ ଅଭିଯୋଗରେ ଗିରଫ ହେଲେ ଦକ୍ଷିଣ ଆଫ୍ରିକାର ପୂର୍ବତନ ରାଷ୍ଟ୍ରପତି ଜାକବ ଜୁମାଙ୍କ ଝିଅ। ତାଙ୍କୁ ଏବେ କୋର୍ଟରେ ହାଜର କରାଯିବ। ଜୁମାଙ୍କ ଝିଅ ଡୁଡୁଜିଲେ ଜୁମା-ସାମ୍ବୁଦଲା ମଧ୍ୟ ଜଣେ ସଂସଦ ସଦସ୍ୟ। ତାଙ୍କ ବିରୁଦ୍ଧରେ ଜୁଲାଇ ୨୦୨୧ରେ ଦଙ୍ଗା ସୃଷ୍ଟି କରିବାର ଓ ହିଂସାକୁ ଉସୁକାଇବାର ଅଭିଯୋଗ ଆସିଛି। ଜୁଲାଇ ୨୦୨୧ରେ ହୋଇଥିବା ଦଙ୍ଗାରେ ୩୫୦ରୁ ଅଧିକ ଲୋକଙ୍କର ମୃତ୍ୟୁ ହୋଇଥିଲା।

ପୋଲିସ କହିଛି ଯେ ଡୁଡୁଜିଲେ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି। ତାଙ୍କ ବିରୁଦ୍ଧରେ ଆତଙ୍କବାଦ ଏବଂ ସମ୍ପର୍କିତ କାର୍ଯ୍ୟକଳାପ (ନିବାରଣ) ଆଇନ ଏବଂ ହିଂସାକୁ ଉସୁକାଇବା ଅଭିଯୋଗରେ ମାମଲା ରୁଜୁ ହୋଇଛି। "୨୦୨୧ ମସିହାରେ ଦେଶ ବ୍ୟାପି ଘଟିଥିବା ହିଂସା ପରେ ଡର୍ବାନ କ୍ରାଇମବ୍ରାଞ୍ଚ ଦ୍ୱାରା ତଦନ୍ତ ଆରମ୍ଭ ହୋଇଥିଲା। ଏହି ଗମ୍ଭୀର ସଂଗଠିତ ଅପରାଧ ମାମଲାର ତଦନ୍ତ ସଫଳ ହୋଇଛି, ଏହାର ରେଜଲ୍ଟ ହେଉଛି ଏହି ଗିରଫଦାରୀ ବୋଲି ପୋଲିସ ବ୍ରିଗେଡିୟର ଥାଣ୍ଡି ବାମ୍ବୋ କହିଛନ୍ତି।

ଡୁଡୁଜିଲଙ୍କ ରାଜନୈତିକ ଦଳ ସ୍ପଷ୍ଟ କରିଛି ଯେ ସେ ଗୁରୁବାର କୋର୍ଟରେ ହାଜର ହେବେ। ଡୁଡୁଜିଲ ବିରୁଦ୍ଧରେ ମାମଲା 'X' ରେ କରାଯାଇଥିବା ଏକ ପୋଷ୍ଟ ଉପରେ ଆଧାରିତ। ଡୁଡୁଜିଲେ ତାଙ୍କ ପିତାଙ୍କୁ ଜେଲ ଯିବା ପରେ ଏହି ପୋଷ୍ଟ କରିଥିଲେ ଏବଂ ଦେଶବ୍ୟାପୀ ପ୍ରତିବାଦ ସମୟରେ ଅଧିକ କ୍ଷତି ପହଞ୍ଚାଇବାକୁ ପ୍ରତିବାଦକାରୀଙ୍କୁ ଆହ୍ୱାନ କରିଥିଲେ ବୋଲି ଅଭିଯୋଗ ହୋଇଛି।

ଦୁର୍ନୀତି ତଦନ୍ତରେ ସାକ୍ଷ୍ୟ ଦେବା ପାଇଁ କୋର୍ଟଙ୍କ ନିର୍ଦ୍ଦେଶକୁ ଅବମାନନା କରିବାରୁ ପୂର୍ବତନ ରାଷ୍ଟ୍ରପତି ଜୁମାଙ୍କୁ ଜେଲ ହୋଇଥିଲା। ନିଆଯାଇଥିଲା। ଏହା ପରେ, ଉତ୍ତ୍ୟକ୍ତ ଜନତା ଦୋକାନଗୁଡ଼ିକରେ ଲୁଟପାଟ ଏବଂ ନିଆଁ ଲଗାଇ ଦେଇଥିଲେ ଏବଂ ସରକାରୀ ସମ୍ପତ୍ତି ମଧ୍ୟ କ୍ଷତି କରିଥିଲେ। ଏହି ମାମଲାରେ ୫,୦୦୦ରୁ ଅଧିକ ଲୋକଙ୍କୁ ଗିରଫ କରାଯାଇଥିଲା।