ପୁରୀ ୬।୧୧: ପୁରୀରେ ଚନ୍ଦନପୁର ଥାନା ଅନ୍ତର୍ଗତ କାପ୍ତେଶ୍ଵରରେ ଯୁବକଙ୍କୁ ହତ୍ୟା ଘଟଣାରେ ସମସ୍ତ ଅଭିଯୁକ୍ତକୁ ଭୁବନେଶ୍ୱର ନିକଟରୁ ଗିରଫ କରାଯାଇଛି । ଏହି ହତ୍ୟାକାଣ୍ଡ ଘଟଣାରେ ଦୁଇ ମହିଳା ମଧ୍ୟ ସାମିଲ ଅଛନ୍ତି । ହତ୍ୟାକାଣ୍ଡରେ ବ୍ୟବହୃତ ଛୁରୀ ଓ କାଠ ଫାଳିଆ ଜବତ । ମାତ୍ର ୨ ହଜାର ବକେୟା ଟଙ୍କା ପାଇଁ କାହ୍ନା ମଲ୍ଲିକଙ୍କୁ ହତ୍ୟା କରାଯାଇଥିବା ସାମ୍ବାଦିକ ସମ୍ମିଳନୀରେ ଅତିରିକ୍ତ ଏସପି ସୁଶୀଲ ମିଶ୍ର ସୂଚନା ଦେଇଛନ୍ତି । ଗିରଫ ଅଭିଯୁକ୍ତ ହେଉଛନ୍ତି ବିଜୁ ଭୋଇ, ଅଜୟ ଭୋଇ, ମିଟୁ ଓରଫ ରତ୍ନାକର ଭୋଇ, ରୁନୁ ଭୋଇ, କନକ ଭୋଇ ଓ ପୂର୍ଣ୍ଣିମା ଭୋଇ । କାହ୍ନା ଓ ବିଜୁ ଦାଦନ ଖଟିବା ପାଇଁ ଯାଇଥିବା ବେଳେ ବିଜୁ ୨ ହଜାର ଟଙ୍କା ଧାର ନେଇଥିଲା ।
ସୋମବାର ସକାଳେ କାହ୍ନା ମଲ୍ଲିକ ବକେୟା ଟଙ୍କା ମାଗିବା ପାଇଁ ଯାଇଥିବା ବେଳେ ତାଙ୍କୁ ମରଣାନ୍ତକ ଆକ୍ରମଣ ହୋଇଥିଲା । ଖବର ପାଇଁ ଉଦ୍ଧାର ପାଇଁ ଯାଇଥିବା ତାଙ୍କ ଭାଇ ଅସିତ ମଲ୍ଲିକଙ୍କୁ ମଧ୍ୟ ସେମାନେ ଆକ୍ରମଣ କରିଥିଲେ । ଘଟଣାସ୍ଥଳରେ କାହ୍ନାଙ୍କ ମୃତ୍ୟୁ ହୋଇଥିବା ବେଳେ ଅସିତଙ୍କ ମୁଣ୍ଡରେ ଗଭୀର ଆଘାତ ଲାଗିଛି । ସେ ଚିକିତ୍ସାଧୀନ ଅଛନ୍ତି । ବକେୟା ଟଙ୍କା ମାଗିବାରୁ ଉଭୟଙ୍କ ମଧ୍ୟରେ ବଚସା ହୋଇ ଏହି ହତ୍ୟାକାଣ୍ଡ ଘଟିଥିବା ପୋଲିସ ସୂଚନା ଦେଇଛି ।
You Can Read:
