ନୂଆଦିଲ୍ଲୀ: ଯମୁନା ପାଣି ବିଷାକ୍ତ ଘଟଣାକୁ ନେଇ ମୁଖ୍ୟ ନିର୍ବାଚନ କମିଶନଙ୍କୁ ସମାଲୋଚନା କରିଛନ୍ତି ଆପ୍ ମୁଖ୍ୟ ଅରବିନ୍ଦ କେଜରିୱାଲ୍। ଚିଫ୍ ଇଲେକ୍ସନ କମିଶନ ରାଜୀବ କୁମାର ରାଜନୀତି କରୁଛନ୍ତି ବୋଲି ସେ କହିଛନ୍ତି। ଅବସର ପରେ ତାଙ୍କର ନିଯୁକ୍ତର ଆଶା ରହିଛି ବୋଲି ସେ ଅଭିଯୋଗ କରିଛନ୍ତି।
ଏବଂ କହିଛନ୍ତି ରାଜୀବ କୁମାର ଏବଂ ତାଙ୍କର ନିର୍ବାଚନ କମିଶନରଙ୍କୁ ଯମୁନା ପାଣିର ତିନୋଟି ବୋତଲ ପଠାଇବେ ଏବଂ ସେହି ପାଣି ପିଇବାକୁ ଚ୍ୟାଲେଞ୍ଜ ଦେଇଛନ୍ତି କେଜରିୱାଲ୍। ଜାନୁଆରୀ ୨୭ ତାରିଖରେ କେଜରିୱାଲ୍ ଏକ ରାଲିରେ ସମ୍ବୋଧନ କରି ଯମୁନା ପାଣିରେ ହରିୟାଣା ସରକାର ବିଷ ମିଶାଇଛନ୍ତି ବୋଲି କହିଥିଲେ। ଯମୁନା ପାଣିରେ ଅତ୍ୟଧିକ କେମିକଲ ଓ ଶିଳ୍ପ ଆବର୍ଜନା ମିଶାଇ ପାଣି ବିଷାକ୍ତ କରି ଦେଉଛନ୍ତି। ଫଳରେ ଦିଲ୍ଲୀବାସୀ ପାଣି ପାଇଁ ଅସୁବିଧାରେ ସମ୍ମୁଖୀନ ହେଉଛନ୍ତି ବୋଲି କେଜରିୱାଲ୍ କହିଥିଲେ। ଯାହାକୁ ନେଇ ବିବାଦ ବଢ଼ିବା ପରେ ଇଲେକ୍ସନ କମିଶନ ନୋଟିସ କରି ଏହାର ପ୍ରମାଣ ମାଗିଥିଲେ। ବୁଧବାର ସନ୍ଧ୍ୟା ୮ ସୁଦ୍ଧା ଉତ୍ତର ଦେବାକୁ କହିଥିଲେ।
ନୋଟିସର ଉତ୍ତର ଦେଇ ବୁଧବାର କେଜରିୱାଲ୍ କହିଥିଲେ ଯେ ସେ ଦିଲ୍ଲୀ ଜଳ ବୋର୍ଡ ଦେଇଥିବା ରିପୋର୍ଟକୁ ଆଧାର କରି ବୟାନ ଦେଇଥିଲେ। ଯମୁନା ପାଣି ବିଷାକ୍ତ ହେବା ଏକ ଜନସ୍ୱାର୍ଥ ପ୍ରସଙ୍ଗ। ଏହାକୁ ସର୍ବସମ୍ମୁଖରେ ଉଜାଗର କରିବାକୁ ସେ ଏପରି କହିଥିଲେ। ହେଲେ ଇଲେକ୍ସନ କମିଶନ କେଜରିୱାଲ୍ଙ୍କ ଉତ୍ତରରେ ସନ୍ତୁଷ୍ଟ ନହେବାରୁ ଗୁରୁବାର ପୁଣି ୫ଟି ପ୍ରଶ୍ନ କରିଛନ୍ତି।
ଶୁକ୍ରବାର ୧୧ଟା ସୁଦ୍ଧା ଏହି ୫ ପ୍ରଶ୍ନର ଉତ୍ତର ଦେବାକୁ ଇଲେକ୍ସନ କମିଶନ ନିର୍ଦ୍ଦେଶ ଦେଇଛନ୍ତି। ଉତ୍ତର ନଦେଲେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କମିସନ ନୋଟିସ୍ରେ କହିଛନ୍ତି।
ଏହାକୁ ସମାଲୋଚନା କରି କେଜରିୱାଲ୍ କହିଛନ୍ତି ଯେ ଏପରି କରି ମୁଖ୍ୟ ନିର୍ବାଚନ କମିଶନ ନିର୍ବାଚନ କମିଶନକୁ ଅଡ଼ୁଆରେ ପକାଇ ଦେଲେ। ଆମ ପାଖରେ ୨୦ଟି ବୋତଲ ଅଛି। ଆମେ ସେଥିମଧ୍ୟରୁ ତିନୋଟିକୁ ନିର୍ବାଚନ କମିଶନଙ୍କ ପାଖକୁ ପଠାଇବୁ। ଏକ ସାମ୍ବାଦିକ ସମ୍ମିଳନୀର ଖୋଦ୍ ରାଜୀବ କୁମାର ଜୀ ଏବଂ ତାଙ୍କ ନିର୍ବାଚନ କମିଶନରମାନମାନେ ଏହି ପାଣି ପିଇବେ।
କେଜରିୱାଲ୍ ଆହୁରି କହିଛନ୍ତି "ମୁଁ ନିର୍ବାଚନ କମିଶନଙ୍କୁ ସମ୍ପୂର୍ଣ୍ଣ ସମ୍ମାନର ସହିତ କହିବାକୁ ଚାହୁଁଛି ଯେ ସେମାନେ ଦିଲ୍ଲୀରେ ଖୋଲାଖୋଲି ଟଙ୍କା ଓ କମ୍ଭଳି ବଣ୍ଟା ଯାଉଛି, ହେଲେ ସେମାନେ ଏହା ଦେଖିପାରୁ ନାହାନ୍ତି। ସେମାନେ କାହିଁକି ରାଜନୀତିରେ ବ୍ୟସ୍ତ ରହୁଛନ୍ତି? କାରଣ ରାଜୀବ କୁମାର ଅବସର ପରେ ଚାକିରି ଚାହୁଁଛନ୍ତି। ଯଦି ରାଜୀବ କୁମାର ଚାହାଁନ୍ତି, ତେବେ ସେ ଦିଲ୍ଲୀର ଯେକୌଣସି ଆସନରୁ ନିର୍ବାଚନ ଲଢ଼ିପାରିବେ।" ସେ କହିଛନ୍ତି। ରାଜୀବ କୁମାର ଆସନ୍ତା ମାସରେ ଅବସର ନେବେ ବୋଲି କେଜରିୱାଲ୍ କହିଛନ୍ତି।
ଇତିହାସ କଥା କହି କେଜରିୱାଲ କହିଛନ୍ତି “ମୁଁ ତାଙ୍କୁ କହିବାକୁ ଚାହୁଁଛି ଯେ ଇତିହାସ ତାଙ୍କୁ କେବେ କ୍ଷମା କରିବ ନାହିଁ। ନିର୍ବାଚନ କମିଶନ ଯେ କେବେ ଏଭଳି ଅବ୍ୟବସ୍ଥାରେ ପଡ଼ିଯିବ ଏକଥା ମୁଁ କେବେ କଳ୍ପନା କରି ନଥିଲି। ମୁଁ ଜାଣି ସେମାନେ ମୋତେ ଦୁଇ ଦିନ ଭିତରେ ଜେଲ୍ ପୂରାଇବାକୁ ଚାହୁଁଛନ୍ତି। ଯାହା କରୁଛନ୍ତି କରନ୍ତୁ, ମୁଁ ଭୟ କରେ ନାହିଁ। ଦେଶ ପୂର୍ବରୁ କେବେ ଏପରି ନିର୍ବାଚନ ଦେଖିନାହିଁ।”
ଗୁରୁବାର ସାମ୍ବାଦିକ ସମ୍ମିଳନୀ କରି ଯମୁନା ପାଣି ନେଇ ଆଜି କଂଗ୍ରେସ ଓ ବିଜେପି ନେତାଙ୍କୁ ଚ୍ୟାଲେଞ୍ଜ୍ ଦେଇଛନ୍ତି କେଜରିୱାଲ୍। ଆଜିର ସାମ୍ବାଦିକ ସମ୍ମିଳନୀରେ କେଜରିୱାଲ କ୍ଲୋରିନ୍ ମିଶ୍ରିତ ୭ ପିପିଏମ ଆମୋନିଆ ଥିବା ଚାରୋଟି ପାଣି ବୋତଲକୁ ଦେଖାଇଥିଲେ। ପାଣି ବୋତଲଗୁଡ଼ିକରେ କଂଗ୍ରେସ ନେତା ରାହୁଲ ଗାନ୍ଧୀ, କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ଦିଲ୍ଲୀ ବିଜେପି ମୁଖ୍ୟ ବୀରେନ୍ଦ୍ର ସଚଦେବ ଏବଂ ହରିୟାଣା ମୁଖ୍ୟମନ୍ତ୍ରୀ ନାୟବ ସିଂହ ସାଇନିଙ୍କ ନାଁ ଲେଖାଯାଇଥିଲା। ଏହି ୪ ନେତାଙ୍କୁ ଏହି ବୋତଲରୁ ପାଣି ପିଇବାକୁ କେଜରିୱାଲ୍ ଚ୍ୟାଲେଞ୍ଜ୍ ଦେଇଛନ୍ତି। ସଞ୍ଜୟ ସିଂହ ଏହି ବୋତଲକୁ ସେହି ନେତାମାନଙ୍କ ପାଖରେ ପହଞ୍ଚାଇବେ। ଯଦି ସେମାନଙ୍କର ସାହସ ଅଛି ତେବେ ନେତାମାନେ ସାମ୍ବାଦିକ ସମ୍ମିଳନୀରେ ବୋତଲରୁ ପାଣି ପିଇକି ଦେଖନ୍ତୁ ବୋଲି କେଜରିୱାଲ୍ ଚ୍ୟାଲେଞ୍ଜ କରିଛନ୍ତି।
