ନୂଆଦିଲ୍ଲୀ: ପାକିସ୍ତାନର ବଲୁଚିସ୍ତାନରେ ଟ୍ରେନ୍ ଅପହରଣ କରିଥିବା ବଲୁଚ୍ ଲିବରେସନ ଆର୍ମି ଆହୁରି ୫୦ ଜଣ ବନ୍ଧକଙ୍କୁ ହତ୍ୟା କରିଛି । ପୂର୍ବରୁ ୫୦ ଜଣ ବନ୍ଧକଙ୍କୁ ହତ୍ୟା କରାଯାଇଥିବା ଖବର ଆସିଥିଲା ଏବଂ ଏବେ ଆହୁରି ୫୦ ଜଣଙ୍କ ହତ୍ୟା କରାଯାଇଥିବା ଖବର ଆସୁଛି । ଏପର୍ଯ୍ୟନ୍ତ ବଲୁଚ୍ ଲିବରେସନ୍ ଆର୍ମି (BLA) ୧୦୦ ଜଣ ବନ୍ଧକଙ୍କୁ ହତ୍ୟା କରିସାରିଛି ।
ତେବେ ଗତ ୧ ଘଣ୍ଟା ମଧ୍ୟରେ BLA ଏହି ୫୦ ଜଣ ପଣବନ୍ଦୀଙ୍କୁ ହତ୍ୟା କରିଛି । ଗୁରୁତ୍ୱପୂର୍ଣ୍ଣ କଥା ହେଉଛି ଯେ ବଲୁଚିସ୍ତାନର ରାଷ୍ଟ୍ରୀୟ ଅଦାଲତ ଏହି ୫୦ ବନ୍ଧକଙ୍କୁ ଯୁଦ୍ଧ ଅପରାଧ, ଲୋକଙ୍କୁ ବଳପୂର୍ବକ ଗାୟବ କରିବା ଏବଂ ବଲୁଚିସ୍ତାନରେ ସମ୍ବଳ ଶୋଷଣ ପାଇଁ ଦୋଷୀ ସାବ୍ୟସ୍ତ କରିଥିଲା ।
ପୂର୍ବରୁ ମାର୍ଚ୍ଚ ୧୧ ରାତିରେ ପାକିସ୍ତାନୀ ଡ୍ରୋନ୍ ଆକ୍ରମଣର ଜବାବରେ BLA ୧୦ ଜଣ ବନ୍ଦୀଙ୍କୁ ହତ୍ୟା କରିଥିଲା । ଆଜି BLA ଏବଂ ପାକିସ୍ତାନ ସେନା ମଧ୍ୟରେ ହୋଇଥିବା ସଂଘର୍ଷରେ ୧୦ ଜଣ ପାକିସ୍ତାନୀ ସୈନିକଙ୍କ ମୃତ୍ୟୁ ଘଟିଥିଲା । ଗତକାଲି ମଧ୍ୟ ଉଭୟ ପାର୍ଶ୍ୱରୁ ଗୁଳିଚାଳନା ଯୋଗୁ ୩୦ ଜଣ ପାକିସ୍ତାନୀ ସୈନିକଙ୍କ ମୃତ୍ୟୁ ହୋଇଥିଲା । ଏପଟେ ଆଜିର ୫୦ ଜଣଙ୍କୁ ମିଶାଇ ମୋଟ ମୃତ୍ୟୁ ସଂଖ୍ୟା ଏବେ ୧୦୦ରେ ପହଞ୍ଚିଛି । ସେପଟେ ଏବେ ବି ପ୍ରାୟ ୧୫୦ ଜଣଙ୍କୁ ପଣବନ୍ଦୀ ରଖିଛି ବିଏଲଏ ।
ଜାଫର୍ ଏକ୍ସପ୍ରେସ ଅପହରଣକୁ ୨୮ ଘଣ୍ଟାରୁ ଅଧିକ ସମୟ ବିତିଗଲାଣି । ବଲୁଚ୍ ଆର୍ମି ପାକିସ୍ତାନ ସରକାରଙ୍କୁ ୪୮ ଘଣ୍ଟା ସମୟ ଦେଇଥିଲା, ଯାହାର ଅର୍ଥ ହେଉଛି ପାକ୍ ସରକାରଙ୍କ ପାଖରେ ବନ୍ଧକଙ୍କ ଜୀବନ ବଞ୍ଚାଇବା ପାଇଁ ଆଉ ମାତ୍ର ୨୦ ଘଣ୍ଟା ଅଛି । ଯଦି ଏହି ସମୟ ମଧ୍ୟରେ ପାକିସ୍ତାନ ସରକାର BLA ସହିତ କୌଣସି ଚୁକ୍ତି ନକରନ୍ତି, ତେବେ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ ।
ପାକିସ୍ତାନ ସେନା ବନ୍ଦୀଙ୍କୁ ମୁକ୍ତ କରିବା ପାଇଁ ସବୁ ପ୍ରୟାସ କରୁଛି, କିନ୍ତୁ ଉଦ୍ଧାର କାର୍ଯ୍ୟରେ ଅନେକ ଅସୁବିଧାର ସମ୍ମୁଖୀନ ହେଉଛି । ରିପୋର୍ଟ ଅନୁସାରେ, BLA ଏହାର ଆତ୍ମଘାତୀ ଆକ୍ରମଣକାରୀଙ୍କୁ ବନ୍ଦୀଙ୍କ ମଧ୍ୟରେ ରଖିଛି । ବିସ୍ଫୋରଣକାରୀ ଆତ୍ମଘାତୀ ଜ୍ୟାକେଟ୍ ପିନ୍ଧିଛନ୍ତି, ଯାହା ଫଳରେ ସୁରକ୍ଷା ବାହିନୀ ପାଇଁ ବନ୍ଧକମାନଙ୍କୁ ଉଦ୍ଧାର କରିବା କଷ୍ଟକର ହୋଇପଡିଛି ।
