ନୂଆଦିଲ୍ଲୀ ୧୬।୩: ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ହାଫିଜ ସଈଦ ପାକିସ୍ତାନ ଝେଲମ ଗୁଳିକାଣ୍ଡରେ ଆହତ ହୋଇ ବର୍ତ୍ତି ଯାଇଛି। ତାକୁ ରାୱଲପିଣ୍ଡିର ଆର୍ମି ହସ୍ପିଟାଲରେ ଭର୍ତ୍ତି କରାଯାଇଛି। ସଈଦ ପାକିସ୍ତାନୀ ସେନାର କୋର କମାଣ୍ଡର ମଙ୍ଗଲାଙ୍କୁ ଭେଟି ଫେରୁଥିବା ବେଳେ ଦୁର୍ବୃତ୍ତଙ୍କ ଆକ୍ରମଣର ସମ୍ମୁଖୀନ ହୋଇଥିଲା। ଏଥିରେ ହାଫିଜର ପୁତୁରା ଅବୁ କତାଲର ମୃତ୍ୟୁ ହୋଇଛି। ତେବେ କେତେକ ଗଣମାଧ୍ୟମରେ ହାଫିଜ ସଈଦର ମୃତ୍ୟୁ ହୋଇଥିବା ଖବର ପ୍ରସାରିତ ହେଉଛି। ତେବେ ଗୁଳିକାଣ୍ଡରେ ଆହତ ହାଫିଜର ଏବେ ଚିକିତ୍ସା ଚାଲିଛି।
ହାଫିଜ ସଈଦକୁ ଭାରତରେ ମୁମ୍ବାଇ ୨୬/୧୧ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ମନେ କରାଯାଉଛି। ଏହି ଆକ୍ରମଣରେ ୧୬୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା। ଏହା ପୂର୍ବରୁ ୨୦୦୬ ମୁମ୍ବାଇ ଟ୍ରେନ ବିସ୍ଫୋରଣ ପଛରେ ମଧ୍ୟ ହାଫିଜ ସଈଦର ହାତ ଥିଲା। ୨୦୦୧ରେ ହାଫିଜ ସଈଦ ଭାରତୀୟ ସଂସଦକୁ ମଧ୍ୟ ଟାର୍ଗେଟ କରିଥିଲା। ସେ ଏନଆଇଏ ମୋଷ୍ଟ ୱାଣ୍ଟେଡ ଲିଷ୍ଟରେ ମଧ୍ୟ ରହିଛି। ମୁମ୍ବାଇ ଆକ୍ରମଣ ପରେ ପାକିସ୍ତାନ ନିକଟରେ ହାଫିଜ ସଈଦର ସମର୍ପଣ ଦାବି ରଖିଥିଲା ଭାରତ। ତେବେ ପାକିସ୍ତାନ ତାକୁ ଆତଙ୍କବାଦୀ ସ୍ୱୀକାର କରିବାକୁ ରାଜି ହେଉ ନାହିଁ।
ଭାରତରେ ମୋଷ୍ଟ ୱାଣ୍ଟେଡ ଆତଙ୍କବାଦୀ ହାଫିଜ ସଈଦର ପୁତୁରା ନଦୀମ ଓରଫ ଅବୁ କତାଲକୁ ଶନିବାର ବିଳମ୍ବିତ ରାତ୍ରିରେ ପାକିସ୍ତାନର ଝେଲମରେ ହତ୍ୟା କରିଦିଆଯାଇଛି। ଅଜ୍ଞାତ ବନ୍ଧୁକଧାରୀ ତାକୁ ଗୁଳି କରି ହତ୍ୟା କରିଛନ୍ତି। କତାଲ ଜମ୍ମୁ-କାଶ୍ମୀର ରିୟାସୀ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ଥିଲା। ଏହି ଆକ୍ରମଣରେ ୯ ଜଣଙ୍କ ମୃତ୍ୟୁ ହୋଇଥିଲା ଓ ୪୧ ଜଣ ଆହତ ହୋଇଥିଲେ। ରଜୌରୀ ଆକ୍ରମଣରେ ମଧ୍ୟ ଅବୁ କତାଲର ହାତ ଥିଲା। କତାଲ ଜମାତ-ଉଦ-ଦବାର ଟପ କମାଣ୍ଡରଙ୍କ ମଧ୍ୟରେ ଜଣେ ଥିଲା। ଅଜ୍ଞାତ ବନ୍ଧୁକଧାରୀଙ୍କ ଗୁଳିରେ ଅବୁ କତାଲର ଜଣେ ସହଯୋଗୀ ମଧ୍ୟ ପ୍ରାଣ ହରାଇଛି।
