ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର କଂଗ୍ରେସକୁ ଜୋରଦାର ଟାର୍ଗେଟ୍ କରି ଏହାକୁ ଦେଶର ସବୁଠୁ ଦୁର୍ନୀତିଗ୍ରସ୍ତ ପାର୍ଟି ବୋଲି କହିଛନ୍ତି । ସେ କହିଛନ୍ତି ଯେ ଜମି ଲୁଟନ୍ତି, ମହିଳାଙ୍କ ସହ ଦୁର୍ବ୍ୟବହାର କରନ୍ତି ଏବଂ ଅର୍ବାନ ନକ୍ସଲଙ୍କୁ ସମର୍ଥନ କରନ୍ତି । ପ୍ରଧାନମନ୍ତ୍ରୀ ମୋଦୀ ଲୋକଙ୍କୁ ସକର୍ତ କରାଇ କହିଛନ୍ତି ଯେ ଯଦି ଆମେ ଭାଗ ଭାଗ ହୋଇଯିବା ତେବେ ଆମକୁ ବାଣ୍ଟିଥିବା ଲୋକ ଉତ୍ସବ ପାଳନ କରିବେ ।
ମହାରାଷ୍ଟ୍ରର ଠାଣେରେ ଏକ ସାର୍ବଜନୀନ କାର୍ଯ୍ୟକ୍ରମକୁ ସମ୍ୱୋଧିତ କରି ପିଏମ୍ ମୋଦୀ କହିଛନ୍ତି, 'କଂଗ୍ରେସ ଦେଶର ସବୁଠୁ ଦୁର୍ନୀତିଗ୍ରସ୍ତ ଦଳ । ହରିୟାଣା କଂଗ୍ରେସର ଜଣେ ନେତା ଡ୍ରଗ୍ସ ସହ ଧରାପଡ଼ିଛି । ଏମାନେ ଶୋଷଣ କରିବା ପାଇଁ ନୂଆ ନୂଆ ଉପାୟ ଖୋଜନ୍ତି । ହିମାଚଳ ପ୍ରଦେଶରେ ତ’ ସେମାନେ ସବୁ ସୀମା ପାର୍ କରିଛନ୍ତି । ଶୌଚାଳୟ ଟ୍ୟାକ୍ସ ନାମକ ଏକ ନୂଆ ଟ୍ୟାକ୍ସ ପ୍ରସ୍ତାବ ଦେଇଛନ୍ତି, ଯାହା ଆଣ କଳ୍ପନା ବାହାରେ । ଗୋଟିଏ ପଟେ ମୁଁ ଶୌଚାଳୟ ଉପଲବ୍ଧ କରାଉଛି ଏବଂ ଅନ୍ୟପଟେ ସେମାନେ ଶୌଚାଳୟ ଉପରେ ଟ୍ୟାକ୍ସ ଲଗାଉଛନ୍ତି । ସେମାନେ ଜମି ଲୁଟନ୍ତି ଏବଂ ମହିଳାଙ୍କ ସହ ଦୁର୍ବ୍ୟବହାର କରୁଛନ୍ତି । କଂଗ୍ରେସର ଆଜି ପର୍ଦ୍ଦାଫାସ ହୋଇଛି । ସେମାନେ ଅର୍ବାନ ନକ୍ସଲର ସଂଗଠନ ଚଲାଉଛନ୍ତି । କଂଗ୍ରେସ ଖୋଲା ଖୋଲି ଭାବେ ସେମାନଙ୍କ ସମର୍ଥନରେ ରହିଛି, ଯେଉଁମାନେ ଭାରତର ବିକାଶରେ ବାଧା ସୃଷ୍ଟି କରୁଛନ୍ତି ।'
ପ୍ରଧାନମନ୍ତ୍ରୀ କହିଛନ୍ତି, 'ସେମାନେ ସମାଜକୁ ଭାଗ ଭାଗ କରି କ୍ଷମତାକୁ ଆସିବା ମିଶନରେ ଅଛନ୍ତି । ଇତିହାସରୁ ଆମକୁ ଶିକ୍ଷା ନେବାର ଅଛି । ଆମକୁ ଏକଜୁଟ୍ ରହିବାର ଅଛି । ଯଦି ଆମେ ଭାଗ ଭାଗ ହୋଇଯିବା, ତେବେ ସେମାନେ ଉତ୍ସବ ପାଳନ କରିବେ । ସେମାନେ ଯେଉଁଠାକୁ ଯାଉଛନ୍ତି, ସେଠାରେ ବିନାଶ ହେଉଛି । ସେମାନେ ହିଁ ଦେଶକୁ ଗରିବୀ ଭିତରକୁ ଠେଲି ଦେଇଥିଲେ । ତାଙ୍କ ସହ ମେଣ୍ଟ କରୁଥିବା ଦଳ ବି ତୁଷ୍ଟିକରଣ କଥା କହିବା ଆରମ୍ଭ କରନ୍ତି । କଂଗ୍ରେସ ସାବରକରଙ୍କୁ ଅପମାନିତ କରେ ।'
ପ୍ରଧାନମନ୍ତ୍ରୀ ମୋଦୀ ଅଭିଯୋଗ କରିଛନ୍ତି ଯେ କଂଗ୍ରେସର ବିଚାରଧାରା ଆରମ୍ଭରୁ ହିଁ ବିଦେଶୀ ରହିଛି । ସେ କହିଛନ୍ତି, 'ଇଂରେଜ ଶାସନ ପରି କଂଗ୍ରେସ ପରିବାର ମଧ୍ୟ ଦଳିତ, ପଛୁଆ, ଆଦିବାସୀଙ୍କୁ ନିଜ ସମକକ୍ଷ ବୋଲି ଭାବେ ନାହିଁ । ସେମାନେ ଭାବନ୍ତି ଯେ ଭାରତ ଉପରେ ଗୋଟିଏ ପରିବାର ଶାସନ ରହିବା ଦରକାର, କାରଣ ଇଂରେଜ ସେମାନଙ୍କୁ ଏହି ହକ୍ ଦେଇ ଯାଇଥିଲେ ।'
