ନୂଆଦିଲ୍ଲୀ: ଦିଲ୍ଲୀରେ ଦୁଇ ଦିନ ପରେ ଫେବ୍ରୁଆରୀ ୫ରେ ୭୦ ଆସନ ପାଇଁ ମତଦାନ ହେବ । ମତଦାନ ପୂର୍ବରୁ ନିର୍ବାଚନ ଆୟୋଗ ଏକ ବିଜ୍ଞପ୍ତି ଜାରି କରିଛନ୍ତି । ନିର୍ବାଚନ ଆୟୋଗଙ୍କ ନିର୍ଦ୍ଦେଶ ଅନୁସାରେ ଫେବ୍ରୁଆରୀ ୫ରେ ସକାଳ ୭ଟାରୁ ସଂଧ୍ୟା ୬.୩୦ ଯାଏ ଏକଜିଟ୍ ପୋଲ୍ ଉପରେ ସମ୍ପୂର୍ଣ୍ଣ ବ୍ୟାନ ରହିବ । ନିର୍ଦ୍ଦେଶନାମା ଅନୁସାରେ ଯେପର୍ଯ୍ୟନ୍ତ ମତଦାନ ଚାଲିବ, ସେପର୍ଯ୍ୟନ୍ତ କୌଣସି ଏକଜିଟ୍ ପୋଲ୍ ପ୍ରସାରଣ ହେବ ନାହିଁ । ସଂଧ୍ୟା ୬.୩୦ ପରେ ମିଡିଆରେ ଏକଜିଟ୍ ପୋଲ୍ ଦେଖାଯାଇପାରିବ । ଉଲ୍ଲେଖଯୋଗ୍ୟ ଯେ ଫେବ୍ରୁଆରୀ ୫ରେ ଦିଲ୍ଲୀରେ ଗୋଟିଏ ପର୍ଯ୍ୟାୟରେ ମତଦାନ ହେବ । ଏହାସହ ଅନ୍ୟ ଦୁଇ ରାଜ୍ୟରେ ମଧ୍ୟ ଉପନିର୍ବାଚନ ହେବ ।
ଫେବ୍ରୁଆରୀ ୫ରେ ଦିଲ୍ଲୀ ବିଧାନସଭାର ୭୦ ଆସନ ସମେତ ଉତ୍ତର ପ୍ରଦେଶର ମିଲ୍କିପୁର ବିଧାନସଭା ଏବଂ ତାମିଲନାଡ଼ୁର ଇରୋଡ ଆସନ ପାଇଁ ମତଦାନ ହେବ । ଏଥିପାଇଁ ଆଜି ସୋମବାର ସଂଧ୍ୟାରୁ ପ୍ରଚାର ଥମିଛି । ଶେଷ ଦିନରେ ସବୁ ରାଜନୈତିକ ଦଳ ନିଜ ସପକ୍ଷରେ ଜନତାଙ୍କ ମତ କରିବା ପାଇଁ ସବୁ ଉଦ୍ୟମ କରିଛନ୍ତି । ପ୍ରଚାର ଶେଷ ଦିନରେ ବିଜେପି ପାଇଁ ସ୍ୱରାଷ୍ଟ୍ର ମନ୍ତ୍ରୀ ଅମିତ୍ ଶାହ ଜଙ୍ଗପୁରାରେ ଆୟୋଜିତ ନିର୍ବାଚନୀ ରାଲିକୁ ସମ୍ୱୋଧିତ କରିଥିଲେ । ଆମ ଆଦମୀ ପାର୍ଟିକୁ ଟାର୍ଗେଟ୍ କରିବା ସହ 'ଶୀଶମହଲ'କୁ ନେଇ ଆପ୍ ମୁଖ୍ୟ ଅରବିନ୍ଦ କେଜ୍ରିୱାଲଙ୍କୁ ସମାଲୋଚନା କରିଥିଲେ । ଶାହ କହିଥିଲେ ଯେ ବିଜେପି କ୍ଷମତାକୁ ଆସିଲେ ଶୀଶମହଲକୁ ସାଧାରଣ ଲୋକଙ୍କ ପାଇଁ ଖୋଲାଯିବ ।
