ମଧ୍ୟପ୍ରଦେଶ ୨୧/୧୨: ମଧ୍ୟପ୍ରଦେଶର ଦେୱାସ୍ ଜିଲ୍ଲାରେ ଭୟଙ୍କର ଅଘଟଣ । ଘରେ ନିଆଁ ଲାଗିବାରୁ ବାପା-ମାଆ ସମେତ ଦୁଇ ପିଲା ମୃତ । ଘରେ ଶୋଇଥିବା ବେଳେ ନିଆଁ ଲାଗିବାରୁ ଘଟିଛି ଅଘଟଣ । ମଧ୍ୟପ୍ରଦେଶ ଦେୱାସ୍ ସହରର ନୟାପୁରା ଅଞ୍ଚଳରେ ଘଟିଛି ଘଟଣା ।
ସୂଚନା ପାଇ ଅଗ୍ନିଶମ ବାହିନୀ ଟିମ୍ ଘଟଣାସ୍ଥଳରେ ପହଞ୍ଚି ଘଣ୍ଟା ଘଣ୍ଟା ଚେଷ୍ଟା ପରେ ନିଆଁକୁ ନିୟନ୍ତ୍ରଣ କରିଥିଲେ । ମୃତକଙ୍କ ମଧ୍ୟରେ ସ୍ୱାମୀ, ସ୍ତ୍ରୀ ଏବଂ ଦୁଇ ପିଲା ଅଛନ୍ତି । ମୃତକଙ୍କ ଘରର ତଳ ମହଲାରେ ଏକ ଡାୟରୀ ଫାର୍ମ ଚାଲୁଥିଲା । ଯେଉଁଥିରେ ନିଆଁ ଲାଗିଯାଇ ଧୀରେ ଧୀରେ ଏକ ବିରାଟ ରୂପ ନେଇଥିଲା ।
ସୂଚନା ଥାଉକି, ଡାୟରୀ ଫାର୍ମରେ ନିଆଁ ଲାଗିଥିଲା । କିଛି ସମୟ ମଧ୍ୟରେ ନିଆଁ ବିଲଡିଂକୁ ବ୍ୟାପିଯାଇଥିଲା । ଦ୍ୱିତୀୟ ମହଲାରେ ରହୁଥିବା ସ୍ୱାମୀ, ପତ୍ନୀ ଏବଂ ଦୁଇ ପିଲା ଏହି ଦୁର୍ଘଟଣାରେ ଦୁଃଖଦ ମୃତ୍ୟୁ ବରଣ କରିଛନ୍ତି । ମୃତକଙ୍କ ନାମ ଦୀନେଶ, ତାଙ୍କ ପତ୍ନୀ ଗାୟତ୍ରୀ, ଝିଅ ଇଶିକା ଏବଂ ପୁଅ ଚିରାଗ ବୋଲି ଜଣାପଡିଛି । ଦୀନେଶ ବୃତ୍ତିରେ ଜଣେ କାର୍ପେଣ୍ଟର ଥିଲେ । ତାଙ୍କ ଘରର ତଳ ମହଲାରେ ଏକ ଡାୟରୀ ଫାର୍ମ ଚଳାଉଥିଲେ। ଅଗ୍ନିକାଣ୍ଡର କାରଣ ବର୍ତ୍ତମାନ ସୁଦ୍ଧା ଜଣା ପଡିନାହିଁ।
