ଆନନ୍ଦପୁର ୧୬।୧: କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ହାଟଡିହି ବ୍ଲକ୍ ଆକରୁଆ ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବକୁ ନେଇ ଗେଟ୍‌ରେ ତାଲା ପକାଇ ଧାରଣା ବସିଲେ ଛାତ୍ରଛାତ୍ରୀ ଓ ଅଭିଭାବକ । 

ବିଦ୍ୟାଳୟରେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ୮ଟି ଶ୍ରେଣୀରେ ୨୦୨ ଜଣ ଛାତ୍ରଛାତ୍ରୀ ଅଧ୍ୟୟନ କରୁଥିବା ବେଳେ ଆବଶ୍ୟକ ଶିକ୍ଷକ ନଥିବାରୁ ଶିକ୍ଷାଦାନ ହୋଇପାରୁନି । ୬ ଜଣ ଶିକ୍ଷକ ନିଯୁକ୍ତି ଥିଲେ ବି ପ୍ରଧାନ ଶିକ୍ଷକ ଅଧିକାଂଶ ସମୟ ଅଫିସ କାମରେ ବ୍ୟସ୍ତ ରହୁଥିବା ବେଳେ ଅଧିକାଂଶ ଶିକ୍ଷୟିତ୍ରୀ ଥିବାରୁ ଅନେକ ସମୟରେ ସେମାନେ ଛୁଟିରେ ରହୁଥିବାରୁ ଉପଯୁକ୍ତ ଶିକ୍ଷାଦାନ ହୋଇ ପାରୁନି । କିନ୍ତୁ ବ୍ଲକ ଶିକ୍ଷା ଅଧିକାରୀ ଏଠାରୁ ଜଣେ ଶିକ୍ଷୟିତ୍ରୀଙ୍କୁ ଅନ୍ୟତ୍ର ଡେପୁଟେସନ କରି ନେଇଯିବା ଫଳରେ ଛାତ୍ରଛାତ୍ରୀ ଓ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି । ଆଉ ଅଳ୍ପ ଦିନ ପରେ ବାର୍ଷିକ ପରୀକ୍ଷା ଥିବାବେଳେ ଛାତ୍ରଛାତ୍ରୀ ମାନେ ଶିକ୍ଷାଲାଭରୁ ବଞ୍ଚିତ ହୋଇଛନ୍ତି । ଏହାକୁ ନେଇ ଗୁରୁବାର ସକାଳୁ ସମସ୍ତ ଛାତ୍ରଛାତ୍ରୀ ଓ ଅଭିଭାବକ ମାନେ ସ୍କୁଲ ଫାଟକରେ ତାଲା ପକାଇ ରାସ୍ତାରେ ବସିଛନ୍ତି । ଏହି ସମସ୍ୟାକୁ ନେଇ ଗ୍ରାମବାସୀ ମାନେ ହାଟଡିହି ବ୍ଲକ୍ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ଠାରେ ପହଞ୍ଚି ସମସ୍ୟା ସମ୍ପର୍କରେ ଅବଗତ କରିଛନ୍ତି । 

ସେପଟେ କିନ୍ତୁ ଏବିଓ କହିଛନ୍ତି ଯେ, ପିଟିଆର ନର୍ମ ଅନୁସାରେ ସେଠାରୁ ୨ ଜଣ ଶିକ୍ଷକଙ୍କୁ ଡେପୁଟେସନରେ ଅନ୍ୟତ୍ର ଦିଆଯାଇଛି । ହେଲେ ଆଗାମୀ ଦିନରେ ଡିଷ୍ଟ୍ରିକ୍ ସ୍ପାଉସ୍ ଗ୍ରାଉଣ୍ଡ ଶିକ୍ଷକ ଆସିଲେ ସେଠାରେ ଶିକ୍ଷକ ନିଯୁକ୍ତି କରାଯିବ । ଏହି ପ୍ରକ୍ରିୟା ଆସନ୍ତା ମାସ ପ୍ରଥମ ସପ୍ତାହ ସୁଦ୍ଧା ହେବ ।

You Can Read:

ବର୍ତ୍ତମାନ ସୁଦ୍ଧା ରାଜ୍ୟରେ HMPVର କୌଣସି ସୂଚନା ନାହିଁ : ଜନସ୍ବାସ୍ଥ୍ୟ ନିର୍ଦ୍ଦେଶକ