ନୂଆଦିଲ୍ଲୀ: ଗତ କିଛି ମାସ ହେବ ସୁନା ଦର ଅହେତୁକ ଭାବେ ବୃଦ୍ଧି ଘଟିିଛି। ଏହି କାରଣରୁ ସୁନା ମୂଲ୍ୟ ଏକ ଲକ୍ଷ ଟଙ୍କା ଟପିବାର ସମ୍ଭାବନା ଦେଖା ଦେଇଛି। ଦିଲ୍ଲୀର ସରାଫା ବଜାରରୁ ମଧ୍ୟ ଏହି ସଙ୍କେତ ମିଳିଛି। ଦେଶରେ ୨୪ କ୍ୟାରେଟ୍ ସୁନା ଦାମ ୯୧ ହଜାର ଟପି ସାରିଛି। ଆଉ ଦେଶର ରାଜଧାନୀ ଦିଲ୍ଲୀରେ ସୁନା ଦର ୯୪ ହଜାର ଟପି ସାରିଛି। 

ଅନ୍ୟପଟେ ଆଉ ଏକ ପୂର୍ବାନୁମାନ ସାମ୍ନାକୁ ଆସିଛି, ଯେଉଁଥିରେ ସୁନା ବଜାରରେ ଚହଳ ପଡ଼ିଛି। ଉକ୍ତ ଅନୁମାନ ଅନୁଯାୟୀ, ଆଗାମୀ ଦିନରେ ସୁନା ଦାମ ଏକ ଲକ୍ଷ ଟଙ୍କା ଛାଡ଼ନ୍ତୁ ୫୫ ହଜାର ଟଙ୍କାକୁ ଖସିପାରେ। ଅର୍ଥାତ ସୁନା ଦର ନିଜର ସର୍ବୋଚ୍ଚ ସ୍ତରରୁ ୪୦ ପ୍ରତିଶତ ହ୍ରାସ ଖସିପାରେ। ତେବେ ଆସନ୍ତୁ ଜାଣିବା ଏହି ଭବିଷ୍ୟତବାଣୀ କିଏ କରିଛି ଏବଂ କେଉଁ ଆଧାରରେ କରିଛି।

୫୫ ହଜାର ତଳକୁ ଖସିବ ସୁନା !

ଚଳିତ ବର୍ଷ ଏ ପର୍ଯ୍ୟନ୍ତ ସୁନା ଦାମ ୨୦ ପ୍ରତିଶତ ବୃଦ୍ଧି ଘଟି ସାରିିଛି। ନିବେଶକମାନେ ମିଳିଥିବା ଏହି ସୁଯୋଗର ଭରପୂର ଫାଇଦା ଉଠାଇ ଆଶାତୀତ ଆୟ କରି ଚାଲିଛନ୍ତି। ଅନ୍ୟପଟେ ଗ୍ରାହକ ଏବେ ସୁନା କିଣିବା ପାଇଁ ପଛଘୁଞ୍ଚା ଦେଉଥିବା ଦେଖିବାକୁ ମିଳିଛି। ଯଦି ଏମିତି ସ୍ଥିତି ବଜାୟ ରହେ ତେବେ ସୁନାର ଷ୍ଟକ ବଢିଯିବ ଏବଂ ଚାହିଦା କମିବାର ସମ୍ଭାବନା ରହିବ। ଏମିତି ସ୍ଥିତିରେ ସୁନା ଦର ହ୍ରାସ ପାଇପାରେ। ଆମେରିକାର ଜଣେ ବିଶେଷଜ୍ଞ ସୁନା ଦାମ ହ୍ରାସ ନେଇ ଭବିଷ୍ୟତବାଣୀ କରିଛନ୍ତି। ମର୍ଣ୍ଣିଂଷ୍ଟାରର ବିଶେଷଜ୍ଞ ଆଗାମୀ କିଛି ବର୍ଷରେ ସୁନା ଦାମରେ ୩୮ ପ୍ରତିଶତ ହ୍ରାସ ଦେଖିବାକୁ ମିଳିପାରେ।

୨୪ କ୍ୟାରେଟ୍ ସୁନା ଦାମ ବର୍ତ୍ତମାନ ଭାରତୀୟ ବଜାରରେ ୧୦ ଗ୍ରାମ ପିଛା ୯୦ ହଜାର ଟଙ୍କା ଟପି ସାରିଛି। ତେବେ ଆଗାମୀ କିଛି ବର୍ଷରେ ୪୦ ପ୍ରତିଶତ ହ୍ରାସ ସହ ସୁନା ୧୦ ଗ୍ରାମ ପ୍ରତି ୫୫ ହଜାର ଟଙ୍କାକୁ ଖସିପାରେ। 

ସମ୍ଭାବିତ ହ୍ରାସର ପ୍ରମୁଖ କାରଣ

ଆର୍ଥିକ ଅନିଶ୍ଚିତତା, ଦରବୃଦ୍ଧି ଚିନ୍ତା ଓ ଭୌଗୋଳିକ ଅସ୍ଥିରତା କାରଣରୁ ସୁନା ଦରରେ  ଅହେତୁକ ବୃଦ୍ଧି ଦେଖିବାକୁ ମିଳିଛି। ବିଶେଷ କରି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ କାର୍ଯ୍ୟକାଳ ସମୟରେ ଆରମ୍ଭ ହୋଇଥିବା ଟ୍ରେଡ୍ ବିବାଦ କାରଣରୁ ସୁନା ଦରରେ ଜବରଦସ୍ତ ବୃଦ୍ଧି ଘଟିଛି। କିନ୍ତୁ ଏବେ କିଛି କାରଣ ସୁନା ଦରକୁ ହ୍ରାସ କରିପାରେ।

 ଯୋଗାଣ ବୃଦ୍ଧି- ସୁନାର ଉତ୍ପାଦନ ବୃଦ୍ଧି ଘଟିଛି। ୨୦୨୪ର ଦ୍ଵିତୀୟ ତ୍ରୈମାସରେ ମାଇନିଙ୍ଗ ପ୍ରଫିଟ ୯୫୦ ଡଲାର ପ୍ରତି ଅନ୍ସ ପହଞ୍ଚି ସାରିଛି। ଗ୍ଲୋବାଲ ରିଜର୍ଭ ୯ ପ୍ରତିଶତ ବଢି ୨, ୧୬, ୨୬୫ ଟନକୁ ବୃଦ୍ଧି ଘଟିଛି। ଅଷ୍ଟ୍ରେଲିଆ ଉତ୍ପାଦନ ବଢାଇବା ଓ ରିସାଇକିଲ ଗୋଲ୍ଡର ଯୋଗାଣରେ ମଧ୍ୟ ବୃଦ୍ଧି ଦେଖିବାକୁ ମିଳିଛି। ଯାେଗାଣ ବଢିଲେ ଯେ କୌଣସି ସାମଗ୍ରୀର ଦର  ହ୍ରାସ ପାଇଥାଏ।

କମିବ ଚାହିଦା- କେନ୍ଦ୍ରୀୟ ବ୍ୟାଙ୍କ ଗତ ବର୍ଷ ୧୦୪୫ ଟନ ସୁନା କ୍ରୟ କରିଥିଲା, ଯାହା ଚାହିଦାକୁ କମ କରିପାରେ। ଓ୍ଵାର୍ଲ୍ଡ ଗୋଲ୍ଡ କାଉନସିଲର ଏକ ସର୍ଭେରୁ ଦେଖିବାକୁ ମିଳିଛି ଯେ, ୭୧ ପ୍ରତିଶତ କେନ୍ଦ୍ରୀୟ ବ୍ୟାଙ୍କ ନିଜର ସୁନା ମହଜୁଦ କମ କରିବାକୁ ଯୋଜନା କରୁଛନ୍ତି। 

ମାର୍କେଟ୍ ସାଚୁରେସନ(କୌଣସି ସାମଗ୍ରୀ ପର୍ଯ୍ୟାପ୍ତ ପରିମାଣରେ ଉପଲବ୍ଧ)- ୨୦୨୪ରେ ଗୋଲ୍ଡ ସେକ୍ଟରରେ ମର୍ଜର ଓ ଅଧିଗ୍ରହଣ ଯୋଗୁଁ ସୁନାର ଉପଲବ୍ଧତା ୩୨ ପ୍ରତିଶତ ବୃଦ୍ଧି ଦେଖିବାକୁ ମିଳିଛି। ଏହା ସୁନା ଦରକୁ ସର୍ବୋଚ୍ଚସ୍ତରରେ ପହଞ୍ଚାଇଛି। ସର୍ବୋଚ୍ଚ ସ୍ତର ଛୁଇଁବା ପରେ ଯେ କୌଣସି ପଦାର୍ଥର ଦାମ ହ୍ରାସ ହୋଇଥାଏ।