ଗାନ୍ଧିନଗର: କାର୍ରୁ ମିଳିଲା କିଲୋ କିଲୋ ସୁନା । ୧୫ କିଲୋଗ୍ରାମ ସୁନା ଜବତ କରିଛି ପୋଲିସ । ପ୍ରାୟ କୋଟିଏରୁ ଅଧିକ ଟଙ୍କାର ସୁନା ଜବତ ହୋଇଛି । ଏହି ଘଟଣାରେ ଦୁଇ ଜଣ ଗିରଫ ହୋଇଛନ୍ତି । ଏଭଳି ଘଟଣା ଗୁଜରାଟର ସୁରଟରୁ ସାମ୍ନାକୁ ଆସିଛି । ଗାଡ଼ି ଯାଞ୍ଚ ବେଳେ ପୋଲିସକୁ ଏକ କାର୍ରୁ ୧୫କିଲୋ ସୁନା ମିଳିଛି । ଅଭିଯୁକ୍ତକୁ ପଚରାଉଚରା ବେଳେ ପୋଲିସ ଜାଣିବାକୁ ପାଇଛି, ଏତେ ପରିମାଣରେ ସୁନା ମହିଧରପୁରର ଉମ୍ଭଲେର ଏକ କାରଖାନାରୁ ଅଣାଯାଇଥିଲା । ତେବେ କାହାର ଏହି ସୁନା, କୁଆଡ଼େ ଯାଉଥିଲା, ସେନେଇ ତଦନ୍ତ ଚଳାଇଛି ପୋଲିସ ।
ଏହି ଘଟଣାକୁ ନେଇ ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି, ଶୁକ୍ରବାର ରାତିରେ ସୁରଟର ସାସୋରୀ ଥାନାକୁ ଏକ ଗୁପ୍ତ ସୂଚନା ମିଳିଥିଲା । ଯେଉଁଥିରେ କୁହାଯାଇଥିଲା, ମହିଧରପୁରର ଉମ୍ଭଲେରୁ ଏକ ସେଲେରିଓ କାର୍ରେ ବିପୁଳ ପରିମାଣରେ ସୁନା ରପ୍ତାନୀ ହେଉଛି । ଏନେଇ ଖବର ପାଇବା ପରେ ତୁରନ୍ତ ପୋଲିସ ଟିମ୍ ଚେକିଂ ବ୍ଲକିଂ ଆରମ୍ଭ କରିଥିଲେ । ସିମାଡ଼ା ଚେକ୍ ପୋଷ୍ଟ ନିକଟରେ ପୋଲିସ ନାକାବନ୍ଦୀ କରି ଗାଡ଼ି ଗୁଡ଼ିତୁ ଅଟକାଇ ତନତନ ତନଖି କରିଥିଲା । ଯାଞ୍ଚ ବେଳେ ପୋଲିସ ହାତରେ ୧୫ କିଲୋ ଓଜନର ସୁନା ଲାଗିଥିଲା । ତେବେ ଏତେ ପରିମାଣର ସୁନା କାହାର ଏବଂ କେଉଁ ଆଡ଼େ ଯାଉଥିଲା ତଦନ୍ତ କରୁଛି ପୋଲିସ ।
