ନୂଆଦିଲ୍ଲୀ: ନମ୍କିନ୍ ଏବଂ ମିଠା ବ୍ରାଣ୍ଡ୍ ହଲ୍ଦୀରାମକୁ କିଣିବା ପାଇଁ ବିଶ୍ୱର ବଡ଼ ବଡ଼ କମ୍ପାନିଙ୍କ ଲମ୍ବା ଲାଇନ୍ । ହଲ୍ଦୀରାମ୍ର ପ୍ରମୋଟର ପରିବାର ପ୍ରଥମେ କମ୍ପାନିରେ ବୃହତ୍ ଭାଗ ଅଂଶଧନ ବିକ୍ରି ଲାଗି ଯୋଜନା କରିଥିଲେ ହେଁ ଏବେ ଏମାନେ ଯୋଜନା ପରିବର୍ତ୍ତନ କରିଥିବା ଜଣାପଡ଼ିଛି । ଗଣମାଧ୍ୟମ ରିପୋର୍ଟ ଅନୁସାରେ, ପରିବାର ଏବେ କମ୍ପାନିରେ ମାତ୍ର ୧୦ରୁ ୧୫% ଅଂଶଧନ ବିକ୍ରି କରିବାକୁ ଚାହୁଁଛନ୍ତି ।
ରିପୋର୍ଟ ମୁତାବକ ଘରୋଇ ଇକ୍ୱିଟି ସଂସ୍ଥା ବେନ୍ କ୍ୟାପିଟାଲ, ବ୍ଲାକ୍ଷ୍ଟୋନ ଏବଂ ଟେମାସେକ୍ ହୋଲ୍ଡିଙ୍ଗ୍ସ ହଲ୍ଦୀରାମକୁ କିଣିବାକୁ ଆଗ୍ରହ ଦେଖାଇଛନ୍ତି କିନ୍ତୁ କମ୍ପାନି ଏବେ ମାତ୍ର କିଛି ଅଂଶଧନ ବିକ୍ରି କରିବାକୁ ଯୋଜନା କରୁଛି । ସୂଚନା ଅନୁଯାୟୀ, ହଲ୍ଦୀରାମ ପରିବାର ଏବେ ବଡ଼ ଭାଗ ଅଂଶଧନ ବିକ୍ରି କରିବାକୁ ଚାହୁଁନାହିଁ । ଏବେ କମ୍ପାନି ସ୍ୱଳ୍ପ ଅଂଶଧନ ବିକ୍ରି କରିବାର ଯୋଜନା ପ୍ରସ୍ତୁତ କରିଛି । ହଲ୍ଦୀରାମର ବ୍ୟବସାୟ ଭଲ ଚାଲିଛି । କମ୍ପାନି ଏବେ ଲାଭରେ ଅଛି । ୨୦୩୨ ସୁଦ୍ଧା ଭାରତର ସ୍ନାକ୍ସ ବଜାର ଦୁଇଗୁଣା ହୋଇ ୯୫,୫୨୧.୮ କୋଟି ଟଙ୍କାରେ ପହଞ୍ଚିବା ଅନୁମାନ ରହିଛି । ଏହି କାରଣରୁ ବିଶ୍ୱର ବଡ଼ ବଡ଼ କମ୍ପାନି ଏ ସୁଯୋଗର ଲାଭ ଉଠାଇବାକୁ ଚାହାନ୍ତି ।
