ରାଉରକେଲା: ପୁରୁଷ ଏଚଆଇଏଲ୍ର ଲିଗ୍ ପର୍ଯ୍ୟାୟ ଖେଳ ଶେଷ । ପଏଣ୍ଟ ଟେବୁଲର ଟପ୍ ଫୋର୍ରେ ଥବା ୪ ଦଳ ସେମିଫାଇନାଲ ପାଇଁ ଉନ୍ନୀତ୍ତ ହୋଇଛନ୍ତି । ସେମାନେ ହେଲେ ବେଙ୍ଗଲ ଟାଇଗର୍ସ, ସୁରମା ହକି ବ୍ଲକ୍, ହାଇଦ୍ରାବାଦ ତୁଫାନ୍ ଏବଂ ତାମିଲନାଡ଼ୁ ଡ୍ରାଗନ୍ସ । ଜାନୁଆରୀ ୩୧ ତାରିଖ ଅର୍ଥାତ୍ ଆସନ୍ତାକାଲି ଏହି ୪ ଟିମ୍ ମଧ୍ୟରେ ସେମିଫାଇନାଲ୍ ମୁକାବିଲା ଖେଳାଯିବ । ପ୍ରଥମ ମ୍ୟାଚ୍ ବେଙ୍ଗଲ ଟାଇଗର୍ସ ଏବଂ ତାମିଲନାଡ଼ୁ ଡ୍ରାଗନ୍ସ ମଧ୍ୟରେ ସଂଧ୍ୟା ୬ଟାରେ ଖେଳାଯିବ । ସେହିପରି ଦ୍ବିତୀୟ ମ୍ୟାଚ୍ ସଂଧ୍ୟା ୮ଟାରେ ସୁରମା ହକି କ୍ଲବ୍ ଏବଂ ହାଇଦ୍ରାବାଦ ତୁଫାନ ମଧ୍ୟରେ ଖେଳାଯିବ । ଦୁଇ ବିଜୟୀ ଟିମ୍ ହକି ଇଣ୍ଡିଆ ଫାଇନାଲ ମ୍ୟାଚରେ ମୁହାଁମୁହିଁ ହେବେ ।
ବୁଧବାର ଲିଗ୍ ରାଉଣ୍ଡର ୨ଟି ମ୍ୟାଚ୍ ଖେଳାଯାଇଥିଲା । ସୁରମା ୧-୧ (୩-୦)ରେ ବେଙ୍ଗଲ ଟାଇଗର୍ସକୁ ଏବଂ ୟୁପି ରୁଦ୍ରସ ୨-୨ (୩-୨) ଗୋଲରେ ତାମିଲନାଡୁ ଡ୍ରାଗନ୍ସକୁ ପରାଜିତ କରିଥିଲେ । ଉଭୟ ମ୍ୟାଚ୍ ବେଶ୍ ଚିତାକର୍ଷକ ଥିଲା ଏବଂ ସୁଟଆଉଟରେ ଫଳାଫଳ ନିର୍ଣ୍ଣୟ ହୋଇଥିଲା । ବେଙ୍ଗଲ ଟାଇଗର୍ସ ୧୦ଟି ମ୍ୟାଚ୍ରୁ ସର୍ବାଧିକ ୧୯ ପଏଣ୍ଟ ସହ ଟେବୁଲରେ ପ୍ରଥମ, ସୁରମା ସମାନ ପଏଣ୍ଟ ସହ ଦ୍ୱିତୀୟ, ୧୮ ପଏଣ୍ଟ ସହ ହାଇଦ୍ରାବାଦ ତୁଫାନ୍ସ ତୃତୀୟ ଏବଂ ସେହି ୧୮ ପାଏଣ୍ଟ ପାଇ ଡ୍ରାଗନ୍ସ ଚତୁର୍ଥ ସ୍ଥାନରେ ରହିଛନ୍ତି ।
ସେପଟେ ବେଦାନ୍ତ କଳିଙ୍ଗ ଲାନସର୍ସ ଏବଂ ଟିମ୍ ଗୋନାଶିକା ନୈରାଶ୍ୟଜନକ ପ୍ରଦର୍ଶନ କରି ସେମି ଫାଇନାଲ ଦୌଡ଼ରୁ ବାଦ ପଡ଼ିଥିଲେ । ଲାନସର୍ସ ୧୦ଟି ମ୍ୟାଚ୍ରୁ ୩ଟି ବିଜୟ ଓ ୧ ସୁଟଆଉଟ୍ ବିଜୟ ସହ ମୋଟ୍ ୧୨ ପଏଣ୍ଟ ପାଇଥିଲା । ସେହିପରି ଟିମ୍ ଗୋନାଶିକା ମଧ୍ୟ ସମାନ ପଏଣ୍ଟ ପାଇଥିଲା । ୟୁପି ରୁଦ୍ରସ ୧୭ ପଏଣ୍ଟ ସହ ଟେବୁଲରେ ପଞ୍ଚମ, କଳିଙ୍ଗ ଲାନସର୍ସ ଷଷ୍ଠ, ଗୋନାଶିକା ସପ୍ତମ ଏବଂ ଦିଲ୍ଲୀ ଏସ୍ଜି ପାଇପର୍ସ ଅଷ୍ଟମ ସ୍ଥାନରେ ରହି ଅଭିଯାନ ଶେଷ କରିଛନ୍ତି ।
