ନୂଆଦିଲ୍ଲୀ: ୧୩ ବର୍ଷ ପରେ ରଣଜୀ କ୍ରିକେଟରେ ବିରାଟଙ୍କ ପଦାର୍ପଣ । ୨୦୨୪-୨୫ ରଣଜୀ ଏଲଏଇଟି ଗ୍ରୁପର ଶେଷ ରାଉଣ୍ଡ ମ୍ୟାଚରେ ନଜରକୁ ଆସିଛନ୍ତି ଟିମ୍ ଇଣ୍ଡିଆର ଷ୍ଟାର କ୍ରିକେଟର ବିରାଟ୍ କୋହଲି । ଦିଲ୍ଲୀ ଓ ରେଲଓ୍ବେ ମଧ୍ୟରେ ଜାରି ରହିଥିବା ମ୍ୟାଚରେ ସେ ଭାଗ ନେଇଛନ୍ତି । ଦିଲ୍ଲୀ ଅଧିନାୟକ ଆୟୂଷ ବଦୋନିଙ୍କ ଅଧୀନରେ ୧୩ ବର୍ଷ ପରେ ରଣଜୀ ମ୍ୟାଚ୍ ଖେଳିବାକୁ ଅରୁଣ ଜେଟଲୀ ଷ୍ଟାଡିୟମକୁ ଓହ୍ଲାଇଛନ୍ତି । ବିରାଟ୍ କୋହଲି ଏହି ମ୍ୟାଚ୍ ଖେଳୁଥିବାରୁ ବିସିସିଆଇ ପକ୍ଷରୁ ଏହାର ଲାଇଭ୍ ଟେଲିକାଷ୍ଟ ମଧ୍ୟ ହେଉଛି । ସେପଟେ ଲୋକାଲ୍ ବୟଙ୍କୁ ଦେଖିବାରୁ ଆରୁଣ ଜେଟଲୀ ଷ୍ଟାଡିୟମରେ ଫ୍ୟାନ୍ସ ଭିଡ଼ ଦେଖିବାକୁ ମିଳିଛି । ଚେଜ୍ ମାଷ୍ଟରଙ୍କ ଖେଳ ଦେଖିବାକୁ ରାତି ପ୍ରାୟ ୩ଟାରୁ ଦର୍ଶକଙ୍କ ଲମ୍ବା ଲାଇନ୍ ଲାଗିଛି । ଭାଇରାଲ୍ ଭିଡିଓ ପୋଷ୍ଟରୁ ଦାବି ହୋଇଛି ଯେ, ମ୍ୟାଚ୍ ଦେଖିବାକୁ ୨ କିଲୋମିଟର ପର୍ଯ୍ୟନ୍ତ ଲାଇନ୍ ଲାଗିଛି ।
ଏପଟେ ଭିଡ଼କୁ ଦେଖି ଷ୍ଟାଡିୟମ କର୍ତ୍ତୃପକ୍ଷ ଟେନସନରେ ପଡ଼ିଯାଇଛନ୍ତି । ଆରୁଣ ଜେଟଲୀ ଷ୍ଟାଡିୟମ ବାହାରେ ବିରାଟ କୋହଲିଙ୍କୁ ଦେଖିବାକୁ ଫ୍ୟାନ୍ସଙ୍କ ମଧ୍ୟରେ ଠେଲାପେଲା ଏବଂ ହାତାହାତୀ ପରିସ୍ଥିତି ସୃଷ୍ଟି ହୋଇଛି । ୩ଜଣ ତଳେ ପଡ଼ି ଆହତ ହୋଇଥିବା ସୂଚନା ରହିଛି । ଗେଟ୍ ସାମ୍ନାରେ ମୁତୟନ ଥିବା ଡିଡିସିଏର ସୁରକ୍ଷାକର୍ମୀ ସେମାନଙ୍କୁ ହସ୍ପିଟାଲରେ ଭର୍ତ୍ତି କରିଛନ୍ତି । ସୂଚନା ଅନୁଯାୟୀ, ଷ୍ଟାଡିୟମ ବାହାରେ ଭିଡ଼ ନିୟନ୍ତ୍ରଣ ପାଇଁ ଅର୍ଦ୍ଧ ସାମରିକବଳଙ୍କୁ ମୁତୟନ କରାଯାଇଛି ।
