ନୂଆଦିଲ୍ଲୀ: ଆଇସିସି ଚାମ୍ପିଅନ୍ସ ଟ୍ରଫି ଆରମ୍ଭକୁ ଆଉ ମାତ୍ର କିଛି ଦିନ ରହିଛି । ଫେବ୍ରୁଆରୀ ୧୯ରୁ ଆରମ୍ଭ ହେବାକୁ ଥିବା ଏହି ଟୁର୍ଣ୍ଣାମେଣ୍ଟ ପୂର୍ବରୁ ଏହାର ଉଦଘଟାନୀ ସମାରୋହ ତାରିଖକୁ ନେଇ ସମସ୍ତେ ଅପେକ୍ଷା କରିଛନ୍ତି । ତେବେ ଏହାରି ଭିତର ଖବର ସାମନାକୁ ଆସୁଛି ଯେ ଆଇସିସି କୌଣସି ପ୍ରକାର ଫଟୋସୁଟ୍ କିମ୍ୱା ପ୍ରେସ୍ କନଫରେନ୍ସିଂ ପାଇଁ ଅନୁମତି ଦେଇ ନାହିଁ । ଏହାସହ ରୋହିତ୍ ଶର୍ମାଙ୍କ ପାକିସ୍ତାନ ଯିବା ଚର୍ଚ୍ଚା ଉପରେ ମଧ୍ୟ ବିରାମ ଲାଗିଛି ।
ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ପାକିସ୍ତାନ କ୍ରିକେଟ୍ ବୋର୍ଡ (ପିସିବି)ର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଚାମ୍ପିଅନ୍ସ ଟ୍ରଫି ଆରମ୍ଭ ପୂର୍ବରୁ କ୍ୟାପ୍ଟେନଙ୍କ କୌଣସି ଫଟୋସୁଟ୍ କିମ୍ୱା ପ୍ରେସ୍ କନଫରେନ୍ସ ପାକିସ୍ତାନରେ ହେବ ନାହିଁ । ଟିମ୍ଗୁଡ଼ିକର ବ୍ୟସ୍ତ କାର୍ଯ୍ୟକ୍ରମ ଯୋଗୁ ଟୁର୍ଣ୍ଣାମେଣ୍ଟ ପୂର୍ବରୁ କ୍ୟାପ୍ଟେନଙ୍କ ବୈଠକ ରଦ୍ଦ କରିବା ପାଇଁ ବାଧ୍ୟ ହୋଇଛୁ । ଉଲ୍ଲେଖଯୋଗ୍ୟ ଯେ ଟୁର୍ଣ୍ଣାମେଣ୍ଟ ପୂର୍ବରୁ ସବୁ ଟିମ୍ ବ୍ୟସ୍ତ ଅଛନ୍ତି । ଇଂଲଣ୍ଡ ଏବଂ ଭାରତ ସୀମିତ ଓଭର ସିରିଜ୍ ଖେଳୁଛନ୍ତି, ଅନ୍ୟପଟେ ଅଷ୍ଟ୍ରେଲିଆ, ଶ୍ରୀଲଙ୍କା ଟେଷ୍ଟ ଏବଂ ଦିନିକିଆ ସିରିଜ୍ ଖେଳୁଛନ୍ତି ।
ଭାରତ ଟୁର୍ଣ୍ଣାମେଣ୍ଟର ସମସ୍ତ ମ୍ୟାଚ୍ ଦୁବାଇରେ ଖେଳିବ । ପ୍ରଥମ ଲିଗ୍ ପର୍ଯ୍ୟାୟ ମ୍ୟାଚ୍ ଫେବ୍ରୁଆରୀ ୨୦ରେ ବାଂଲାଦେଶକୁ ସାମନା କରିବ । ଏହାପରେ ଫେବ୍ରଆରୀ ୨୩ରେ ପାକିସ୍ତାନ ସହ ମୁକାବିଲା ଖେଳିବ । ମାର୍ଚ୍ଚ ୨ରେ ନ୍ୟୁଜିଲାଣ୍ଡ ସହ ଭାରତର ମୁକାବିଲା ହେବ । ଭାରତ କେବଳ ଥରେ ଚାମ୍ପିଅନ୍ସ ଟ୍ରଫି ଜିତିବାରେ ସଫଳ ହୋଇଛି । ୨୦୧୩ ମସିହାରେ ଧୋନୀଙ୍କ କ୍ୟାପ୍ଟେନ୍ସିରେ ଭାରତ ଚାମ୍ପିଅନ୍ସ ଟ୍ରଫି ଜିତିଥିଲା ।
