ନୂଆଦିଲ୍ଲୀ ୧୮।୦୩; ମହାକାଶରୁ ଫେରୁଛନ୍ତି ସୁନୀତା ୱିଲିୟମ୍ସ । ଆଉ କିଛି ଘଣ୍ଟାର ଅପେକ୍ଷା । କାଉଣ୍ଟଡାଉନ୍ ବିଗନ୍ । କେବଳ ସୁନୀତା ନୁହେଁ ତାଙ୍କ ସାଥୀ ବୁଚ୍ ୱିଲମୋର ବି ଫେରିବେ । ଆରମ୍ଭ ହୋଇଗଲାଣି ପ୍ରସ୍ତୁତି । କାରଣ ତାଙ୍କୁ ଆଣିବାକୁ ଯାଇଥିବା କ୍ରୁ-୧୦ ପହଞ୍ଚିଛି ମହାକାଶରେ । ସୁନୀତା ୱିଲିୟମ୍ସ ଏବଂ ତାଙ୍କ ସାଥୀ ବୁଚ ୱିଲମର, ଯିଏ ଆଠ ଦିନର ମିଶନକୁ ଯାଇଥିଲେ, କିନ୍ତୁ ତାଙ୍କୁ ପ୍ରାୟ ନଅ ମାସ ମହାକାଶରେ ବିତାଇବାକୁ ପଡିଲା। ବୈଷୟିକ ତ୍ରୁଟି ହେତୁ ତାଙ୍କ ଫେରିବା ସ୍ଥଗିତ ରହିଲା ।
ବୁଧବାର ଅର୍ଥାତ୍ ୧୯ ତାରିଖ ପୃଥିବୀପୃଷ୍ଠକୁ ଫେରିବେ ମହାକାଶଚାରୀ ସୁନୀତା ୱିଲିୟମସ । ଏନେଇ ସ୍ପଷ୍ଟ କରିଛି ନାସା । ତେବେ ISSରେ ୯ମାସ ବିତାଇବା ପରେ, ସବୁଠାରୁ ବଡ଼ ପ୍ରଶ୍ନ ଉଠୁଛି ଯେ ଏହି ଲମ୍ବା ମିଶନ ପାଇଁ NASA ସେମାନଙ୍କୁ କେତେ ଟଙ୍କା ଦରମା ଦେବ ? ଦରମା ସହିତ ଅନ୍ୟ କିଛି ସହଯୋଗ କରିବ କି ?
ନାସା କେତେ ଦରମା ଦେବ ?
ନାସାର ମହାକାଶଚାରୀମାନେ ସରକାରୀ କର୍ମଚାରୀ ଏବଂ ସେମାନଙ୍କ ପାଇଁ କୌଣସି ଓଭରଟାଇମ୍ ଦରମା ନାହିଁ। ତାଙ୍କର ଦରମା GS-15 ପେ ଗ୍ରେଡ୍ ଅଧୀନରେ ଆସେ। ଯାହା ଆମେରିକାର ବରିଷ୍ଠ ସରକାରୀ ଅଧିକାରୀମାନଙ୍କୁ ଦିଆଯାଏ । ସୁନୀତା ୱିଲିୟମ୍ସ ତାଙ୍କର ୯ମାସର ଦୀର୍ଘ ମିଶନ ପାଇଁ ପ୍ରାୟ ୮୧ ଲକ୍ଷ ଟଙ୍କାରୁ ୧.୦୫କୋଟି ଟଙ୍କା ପର୍ଯ୍ୟନ୍ତ ଦରମା ପାଇବେ। କିନ୍ତୁ ଯଦି ଆପଣ ଭାବୁଛନ୍ତି ଯେ ଏତେ ଦିନ ପର୍ଯ୍ୟନ୍ତ ମହାକାଶରେ ରହିବା ବଦଳରେ ସେମାନେ କିଛି ବଡ଼ ବୋନସ ପାଇବେ, ତେବେ ଏହା ଭାବିବାର ଧାରଣା ଭୁଲ ।
ଏତିକି ଅତିରିକ୍ତ ଦେୟ ଦିଆଯିବ
ନାସା ମହାକାଶଚାରୀମାନଙ୍କୁ ମାତ୍ର $୪, ଅର୍ଥାତ୍ ପ୍ରାୟ ୩୪୭ଟଙ୍କା ପ୍ରତିଦିନ ଭତ୍ତା ଦିଏ। ଏହାର ଅର୍ଥ ହେଉଛି, ସମଗ୍ର ୨୮୭ ଦିନର ମିଶନରେ, ସେ ଅତିରିକ୍ତ ଦେୟ ଭାବରେ ମୋଟ ମାତ୍ର $୧,୧୪୮ (ପ୍ରାୟ ₹୧ ଲକ୍ଷ) ପାଇବେ। ଏହା ଜାଣି ସମସ୍ତଙ୍କୁ ଆଶ୍ଚର୍ଯ୍ୟ ଲାଗିପାରେ ଯେ ଏତେ ମାସ ଧରି ମହାକାଶରେ ରହିବା ଏବଂ ବିପଦ ନେବା ସତ୍ତ୍ୱେ, ସେମାନେ ଏତେ କମ ପରିମାଣର ଭତ୍ତା ପାଉଛନ୍ତି ।
ସ୍ପେଶ୍କ୍ରାଫ୍ଟରେ ବିପଦ କ’ଣ ?
ସ୍ପେସଏକ୍ସ ଫାଲକନ୍ ୯ ରକେଟ୍ ପ୍ରାୟ ୩ ଘଣ୍ଟାରେ ୪୦୦ କିଲୋମିଟର ଦୂରତା ଅତିକ୍ରମ କରିବ ଏବଂ ଆଟଲାଣ୍ଟିକ ମହାସାଗର କିମ୍ବା ମେକ୍ସିକୋ ଉପସାଗରରେ ପଡ଼ିଯିବ। କିନ୍ତୁ ପୃଥିବୀକୁ ଫେରିବା ଏତେ ସହଜ ନୁହେଁ। ବିଶେଷଜ୍ଞଙ୍କ ମତରେ, ଯେତେବେଳେ ଡ୍ରାଗନ୍ କ୍ୟାପସୁଲ୍ ପୃଥିବୀର ବାୟୁମଣ୍ଡଳରେ ପ୍ରବେଶ କରେ, ଏହାର କୋଣ ସମ୍ପୂର୍ଣ୍ଣ ସଠିକ୍ ହେବା ଆବଶ୍ୟକ। ଛୋଟ ଭୁଲ ମଧ୍ୟ ଏକ ବଡ଼ ଦୁର୍ଘଟଣାର କାରଣ ହୋଇପାରେ। ଏହା ପୂର୍ବରୁ ମଧ୍ୟ, ମହାକାଶ ଅଭିଯାନ ସମୟରେ, ଭୁଲ ପ୍ରବେଶ କୋଣ ଯୋଗୁଁ କ୍ରୁ ସଦସ୍ୟମାନେ ଅସୁବିଧାର ସମ୍ମୁଖୀନ ହୋଇଛନ୍ତି ।
ନାସାର ସମୟ ସାରଣୀ ଧାର୍ଯ୍ୟ; ସ୍ପେଶ୍ ଷ୍ଟେସନରୁ ଫେରିବେ ସୁନୀତା ଓ ସାଥି
