ନୂଆଦିଲ୍ଲୀ ୧୮/୦୩: ଆମେରିକାର ଜାତୀୟ ଗୁଇନ୍ଦା ନିର୍ଦ୍ଦେଶକ ତୁଲସୀ ଗବାର୍ଡ ଓ ପ୍ରଧାନମନ୍ତ୍ରୀ ମୋଦୀ ଭେଟ୍ଘାଟ । ସୋମବାର ଦିନ ଥିଲା ଭେଟ୍ଘାଟ ଆଲୋଚନା । ତେବେ ଏହି ଦେଖା ସାକ୍ଷାତ ବେଳେ ଉପହାର ଦିଆନିଆ ବି ଚାଲିଥିଲା । ମୋଦୀ ତୁଲସୀଙ୍କୁ ଭେଟିଦେଇଥିଲେ ପ୍ରୟାଗରାଜ ମହାକୁମ୍ଭରୁ ଆଣିଥିବା ଗଙ୍ଗା ଜଳ ।
ସୋସିଆଲ ମିଡିଆ ପ୍ଲାଟଫର୍ମ X ରେ ଏକ ପୋଷ୍ଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ ସେ ତୁଲସୀ ଗବାର୍ଡଙ୍କୁ ଭାରତରେ ସ୍ୱାଗତ କରି ଖୁସି । ସେ ଏହା ମଧ୍ୟ କହିଛନ୍ତି ଯେ ଆମେରିକା ଏବଂ ଭାରତ ଉଭୟ ଆତଙ୍କବାଦ ବିରୋଧରେ ଲଢ଼ିବା, ସାମୁଦ୍ରିକ ଓ ସାଇବର ସୁରକ୍ଷା ସହଯୋଗ ବୃଦ୍ଧି କରିବାକୁ ପ୍ରତିଶୃତିବଦ୍ଧ । ଭାରତ-ଆମେରିକା ବ୍ୟାପକ ବିଶ୍ୱ ରଣନୈତିକ ସହଭାଗୀତାକୁ ଆଗକୁ ବଢିବ ବୋଲି ସମସ୍ତଙ୍କ ଆଶା ।
ଏହି ସମୟରେ ତୁଲସୀ ଗବାର୍ଡ ପ୍ରଧାନମନ୍ତ୍ରୀ ମୋଦିଙ୍କୁ ରିଟର୍ଣ୍ଣ ଗିଫ୍ଟ ଆକାରରେ ଦେଇଥିଲେ ତୁଳସୀ ମାଳା । ଏହି ଅବସରରେ ମୋଦୀ ତୁଲସୀଙ୍କୁ କହି ଶୁଣାଇଥିଲେ ମହାକୁମ୍ଭ ବିଷୟରେ କିଛି । ପ୍ରଧାନମନ୍ତ୍ରୀ ମୋଦୀ ତୁଲସୀ ଗବାର୍ଡଙ୍କୁ କହିଥିଲେ ଯେ ୨୬ ଫେବୃଆରୀରେ ଅନୁଷ୍ଠିତ ଏହି ଧାର୍ମିକ ସମାବେଶରେ ୬୬ କୋଟିରୁ ଅଧିକ ଲୋକ ଯୋଗ ଦେଇଥିଲେ । ଯାହାକି ଥିଲା ବିଶ୍ୱପ୍ରସିଦ୍ଧ ମହାକୁମ୍ଭ ମେଳା ।
ସେପଟେ ପ୍ରଧାନମନ୍ତ୍ରୀ ମୋଦିଙ୍କୁ ଭେଟିବା ପୂର୍ବରୁ ତୁଲସୀ ଗବାର୍ଡ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ ଭେଟିଥିଲେ । ଜାତୀୟ ରାଜଧାନୀ ଦିଲ୍ଲୀରେ ଅନୁଷ୍ଠିତ ଏହି ବୈଠକରେ ନିଷିଦ୍ଧ ଖଲିସ୍ତାନୀ ସଂଗଠନ ଶିଖ୍ ଫର୍ ଜଷ୍ଟିସ୍ (SFJ) ଦ୍ୱାରା ଆମେରିକୀୟ ମାଟିରେ କରାଯାଉଥିବା ଭାରତ ବିରୋଧୀ କାର୍ଯ୍ୟକଳାପ ଉପରେ ଆଲୋଚନା କରାଯାଇଥିଲା।
