ନୂଆଦିଲ୍ଲୀ ୧୧/୦୪: ଖୋଲିବ ୨୬/୧୧ ମୁମ୍ବାଇ ଆଟାକ୍ ଷଡଯନ୍ତ୍ରର ଗୁମର । ୧୮ ଦିନିଆ ରିମାଣ୍ଡରେ ତହବୁର ରାଣା । ରିମାଣ୍ଡରେ ନେଇ ପଚରାଉଚରା କରିବାକୁ NIA ମାଗିଥିଲା ୨୦ ଦିନ । ତେବେ ୧୮ ଦିନ ଅନୁମତି ଦେଇଛନ୍ତି ପଟିଆଲା ହାଉସକୋର୍ଟ । ଏହାପରେ ରାଣାକୁ NIA ହେଡକ୍ବାର୍ଟର ଅଣାଯାଇଛି । ସେଠାରେ ତିଆରି ହୋଇଥିବା ସ୍ବତନ୍ତ୍ର ସେଲରେ ରାଣାକୁ ଜେରା କରାଯିବ ।
ଏହି ୧୮ ଦିନ ମଧ୍ୟରେ ରାଣାଠାରୁ ୨୬/୧୧ ମୁମ୍ବାଇ ଆତଙ୍କୀ ଆକ୍ରମଣର ସବୁ ଷଡଯନ୍ତ୍ରର ଖୁଲାସା କରିବାକୁ ଯୋଜନା ପ୍ରସ୍ତୁତ କରିଛି NIA । ତେବେ ଜାଣିଛନ୍ତି କି, ଏହି ମୋଷ୍ଟ ଓ୍ୱାଣ୍ଟେଡ ଆତଙ୍କୀଙ୍କୁ ଆଣିବାକୁ ଭାରତ ଖର୍ଚ୍ଚ କରିଛି କୋଟ୍ ଟଙ୍କା । ଏମିତିକି ବିମାନ ବି ଯାଇଥିଲା ଭଡାରେ । ଆସନ୍ତୁ ଜାଣିବା ପୁରା ଘଟଣା ।
ରାଣାକୁ ଆମେରିକାରୁ ଭାରତ ଆଣିବା ଥିଲା ବେଶ୍ ଚ୍ୟାଲେଞ୍ଜ । ଅପରେସନ ଯେତିକି ସମ୍ବେଦନଶୀଳ ଥିଲା, ସେତିକି ମହଙ୍ଗା ବି ଥିଲା। ବିଳାସପୂର୍ଣ୍ଣ ଚାର୍ଟର ବିମାନ ଗଲ୍ଫ ଷ୍ଟ୍ରିମ୍ G-550 ବ୍ୟବହାର କରାଯାଇଥିଲା । ଯାହାର ମୂଲ୍ୟ ପ୍ରତି ଘଣ୍ଟାରେ ପ୍ରାୟ ୯ ଲକ୍ଷ ଟଙ୍କା ଥିଲା। ୪୦ ଘଣ୍ଟାର ଉଡ଼ାଣ ପାଇଁ ଖର୍ଚ୍ଚ ହୋଇଥିଲା ୪ କୋଟି ଟଙ୍କା । ଜେଟ୍ ଭିଏନା ସ୍ଥିତ ଏକ ବିମାନ ସେବାରୁ ଭଡାରେ ନିଆଯାଇଥିଲା ଚାର୍ଟର ପ୍ଲେନ୍। ବୁଧବାର ଦିନ ସ୍ଥାନୀୟ ସମୟ ଭୋର ୨:୧୫ରେ ମିଆମିରୁ ଉଡ଼ାଣ କରିଥିଲା ବିମାନ ।
ସେହି ଦିନ ସନ୍ଧ୍ୟା ୭ଟାରେ ରୋମାନିଆର ରାଜଧାନୀ ବୁଖାରେଷ୍ଟରେ ପହଞ୍ଚିଥିଲା। ସେଠାରେ ପ୍ରାୟ ୧୧ ଘଣ୍ଟା ବିରତି ନେବା ପରେ, ଏହା ଗୁରୁବାର ସକାଳ ୬:୧୫ ରେ ପୁଣି ଥରେ ଉଡ଼ାଣ ଆରମ୍ଭ କରିଥିଲା । ଆଉ ସନ୍ଧ୍ୟା ୬:୨୨ ରେ ଦିଲ୍ଲୀର ପାଲମ ବିମାନବନ୍ଦରରେ ଅବତରଣ କରିଥିଲା। ପ୍ରାୟ ୪୦ ଘଣ୍ଟା ପରେ ଏହା ଦିଲ୍ଲୀର ପାଲମ ବିମାନବନ୍ଦରରେ ଅବତରଣ କରିଥିଲା ସ୍ୱତନ୍ତ୍ର ବିମାନ।
କୌଣସି ବିଳାସପୂର୍ଣ୍ଣ ହୋଟେଲଠାରୁ କମ୍ ନୁହେଁ ଗଲ୍ଫଷ୍ଟ୍ରିମ୍ G550 ବିମାନ । ୨୦୧୩ରେ ନିର୍ମିତ ଗଲ୍ଫଷ୍ଟ୍ରିମ୍ G550କୁ ଅଲ୍ଟ୍ରା ଲଙ୍ଗ ରେଞ୍ଜ ମିଡ୍-ଆକାର ବର୍ଗରେ କରାଯାଇଛି । ଏହାର ସବୁଠାରୁ ସ୍ୱତନ୍ତ୍ର ବୈଶିଷ୍ଟ୍ୟ ହେଉଛି ଭିତରର ଚମତ୍କାର ସାଜସଜ୍ଜା। ବିମାନର ସର୍ବାଧିକ ୧୯ ଯାତ୍ରୀ ଯିବାର ରହିଛି କ୍ଷମତା ।
୯ଟି ଡିଭାନ୍ ସିଟ୍ ଅଛି ଯାହା ଶୋଇବା ପାଇଁ ବେଡ୍ରେ ପରିଣତ ହୁଏ । ଏଥିରେ ୬ଟି ବେଡ୍ ବି ଅଛି। ଏହା ବ୍ୟତୀତ, ଏହି ବିମାନରେ ଉଡ଼ାଣ ସମୟରେ ଓ୍ୱାଇଫାଇ ସେବା, ସାଟେଲାଇଟ୍ ଫୋନ୍ ଏବଂ ଆଧୁନିକ ମନୋରଞ୍ଜନ ବ୍ୟବସ୍ଥା ଅଛି। ଏହାର ଅଣ୍ଡାକୃତିର ଝରକା ଏହାକୁ ଏକ ସ୍ୱତନ୍ତ୍ର ପରିଚୟ ଦିଏ । VIP ସେବାଠାରୁ କମ୍ ସେବା ଦିଏନି ଏହି ବିମାନ ।
ପ୍ରଶ୍ନ ଉଠୁଛି ଯେ ଆତଙ୍କୀ ପାଇଁ ଏତେ ପରିମାଣର ଟଙ୍କା କାହିଁକି କରାଗଲା ଖର୍ଚ୍ଚ? ଯାହା ଜଣାପଡିଛି ସୁରକ୍ଷା ଦୃଷ୍ଟିରେ ଏପରି ନିଷ୍ପତ୍ତି ନେଇଥିଲେ ସରକାର୍ । କାରଣ ତହବୁର ଜଣେ ହାଇପ୍ରୋଫାଇଲ ଆତଙ୍କବାଦୀ । ଆମେରିକା ଓ ଭାରତ ଉଭୟର ସୁରକ୍ଷା ଏଜେନ୍ସି ତାଙ୍କ ପ୍ରତ୍ୟର୍ପଣ ସମ୍ପର୍କରେ ବିଶେଷ ସତର୍କତା ଅବଲମ୍ବନ କରିଥିଲେ। ଏପରି ସ୍ଥିତିରେ, ଚାର୍ଟର ବିମାନକୁ ଏକମାତ୍ର ସୁରକ୍ଷିତ ବିକଳ୍ପ ଭାବେ କରାଯାଇଥିଲା ବିବେଚନା । ଯାହା ଦ୍ଵାରା ଯେକୌଣସି ପ୍ରକାରର ଅତର୍କିତ ଘଟଣାକୁ ଏଡାଯାଇପାରିବ। କୋଟି କୋଟି ଟଙ୍କା ଖର୍ଚ୍ଚ ହେଲା ସତ, କିନ୍ତୁ କଣ ଉଦ୍ଦେଶ୍ୟ ହେବ ସଫଳ?
