ନୂଆଦିଲ୍ଲୀ: ଇସ୍ରାଏଲ୍ର ପ୍ରଚଣ୍ଡ ପ୍ରହାରରେ ହିଜବୁଲ୍ଲା ମୁଖ୍ୟ ହାସନ୍ ନସ୍ରଲ୍ଲାହ ମୃତ୍ୟୁ ହୋଇଛି । ଏନେଇ ଲେବାନନ୍ରେ ୫ ଦିନିଆ ରାଷ୍ଟ୍ରୀୟ ଶୋକ ପାଳନ କରାଯାଉଛି । ରବିବାର ଇସ୍ରାଏଲ ସେନା ପୁଣି ଦକ୍ଷିଣ ଲେବାନନ୍ରେ ଏୟାର ଷ୍ଟ୍ରାଇକ୍ କରିଛି । ଏଥିରେ ୧୦୫ ଜଣ ପ୍ରାଣ ହରାଇଛନ୍ତି । ଆକ୍ରମଣରେ ହିଜ୍ବୁଲ୍ଲାର ପ୍ରିଭେଣ୍ଟିଭ୍ ସିକ୍ୟୁରିଟି ୟୁନିଟ୍ କମାଣ୍ଡର ତଥା ଆତଙ୍କୀ ସଙ୍ଗଠନର କେନ୍ଦ୍ରୀୟ ପରିଷଦ ସଦସ୍ୟ ନବୀଲ କୌକ୍ ନିପାତ ହୋଇଛି । ଶୁକ୍ରବାର ହୋଇଥିବା ହମ୍ଲାରେ ନସ୍ରଲ୍ଲାହ ବ୍ୟତୀତ ହିଜ୍ବୁଲ୍ଲାର ଅନ୍ୟ ଜଣେ ବରିଷ୍ଠ ନେତା ଅଲ୍ଲୀ କାରାକି ମଧ୍ୟ ପ୍ରାଣ ହରାଇଥିଲା । ତା’ର ମୃତ୍ୟୁକୁ ରବିବାର ଆତଙ୍କୀ ସଂଗଠନ ସ୍ପଷ୍ଟ କରିଛି ।
ଏପଟେ ସୋମବାର ଭୋରରୁ ଦକ୍ଷିଣ ଲେବାବନରେ ଏୟାର ଷ୍ଟ୍ରାଇକ୍ କରିଛି ଇସ୍ରାଏଲ ଡିଫେନ୍ସ ଫୋର୍ସ । ଲେବନନର ଜନବସତି ଅଞ୍ଚଳରେ ଆଇଡିଏଫର ଏହା ପ୍ରଥମ ହମଲା । ରାଜଧାନୀ ବିରୁଟର କୋଲା ଜିଲ୍ଲାରେ ଏହି ଆକ୍ରମଣ ହୋଇଛି । ଏଥିରେ ଗୋଟିଏ ବିଲ୍ଡିଂ ସମ୍ପୂର୍ଣ୍ଣ ଭାବେ ଧ୍ବଂସ ହୋଇଯାଇଥିଲା ବେଳେ ୪ଜଣ ସାଧାରଣ ଲୋକ ପ୍ରାଣ ହରାଇଛନ୍ତି । ନ୍ୟୁଜ୍ ଏଜେନ୍ସି ରୟଟର୍ସ ରିପୋର୍ଟ ମୁତାବକ, ଏହି ଆକ୍ରମଣରେ ପପୁଲାର ଫ୍ରଣ୍ଟ ଫର୍ ଦି ଲିବେରସନ ଅଫ୍ ପାଲେଷ୍ଟାୟୀନ ବା ପିଏଫଏଲପି ଆତଙ୍କବାଦୀ ଗ୍ରୁପର ୩ଜଣ କମାଣ୍ଡର ପ୍ରାଣ ହରାଇଥିବା ସୂଚନା ରହିଛି ।
ରବିବାର ଦକ୍ଷିଣ ଲେବାନନ୍ସ୍ଥିତ ଏକ ଗାଁ ନିକଟରେ ୪୫ ଟାର୍ଗେଟ୍ ଉପରେ ହମ୍ଲା ହୋଇଥିବା ଇସ୍ରାଏଲୀ ସେନା କହିଛି । ଲେବାନନ ସ୍ବାସ୍ଥ୍ୟ ମନ୍ତ୍ରଣାଳୟ କହିଛି, ରବିବାର ଆକ୍ରମଣରେ ପ୍ରାୟ ୧୦୫ଜଣଙ୍କ ମୃତ୍ୟୁ ହୋଇଛି । ଦକ୍ଷିଣ ପ୍ରାନ୍ତ ସିଡନ୍ ସିଟିରେ ହୋଇଥିବା ହମଲାରେ ୩୨ଜଣଙ୍କ ଜୀବନ ଯାଇଛି । ସେହିପରି ଉତ୍ତର ପ୍ରାନ୍ତର ବାଲବେକ୍ ହର୍ମେଲ ଅଞ୍ଚଳରେ ହୋଉଥିଲା ଆତ୍ମଘାତୀ ଆକ୍ରମଣରେ ୨୧ଜଣଙ୍କ ମୃତ୍ୟୁ ହୋଇଛି । ଏଥିରେ ୪୭ ଗୁରୁତର ଭାବେ ଆହତ ହୋଇଛନ୍ତି ।
ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ଆମେରିକାରୁ ଫେରିବା ପରେ ଶନିବାର ଏକ ଭିଡିଓ ବାର୍ତ୍ତା ଜାରି କରି କହିଥିଲେ, ଆମ କାମ ଶେଷ ହୋଇନାହିଁ । ଆହୁରି କାମ ବାକି ଅଛି । ମୁଁ ନସ୍ରଲ୍ଲାହକୁ ମାରିବା ପାଇଁ ନିର୍ଦ୍ଦେଶ ଦେଇଥିଲି । କାରଣ ହିଜ୍ବୁଲ୍ଲା ଦୁର୍ବଳ ପଡ଼ିଥିଲେ ନସ୍ରଲ୍ଲାହ ପୁଣି ନିଜ ଆତଙ୍କୀ ସଙ୍ଗଠନକୁ ଛିଡ଼ା କରାଇଥାନ୍ତା । ସେହିଭଳି ଆମେରିକାର ହ୍ୱାଇଟ୍ ହାଉସ୍ କହିଛି, ନସ୍ରଲ୍ଲାହର ମୃତ୍ୟୁରେ କେହି ଶୋକ ମନାଉନାହାନ୍ତି । ଆମେରିକାର ଜାତୀୟ ସୁରକ୍ଷା ମୁଖପାତ୍ର ଜନ୍ କିର୍ବି କହିଛନ୍ତି, ହିଜ୍ବୁଲ୍ଲା ଏକ ଆତଙ୍କବାଦୀ ସଙ୍ଗଠନ ଏବଂ ନସ୍ରଲ୍ଲାହ ଜଣେ ଆତଙ୍କବାଦୀ ଥିଲା ।
