ନୂଆଦିଲ୍ଲୀ: ଆତଙ୍କବାଦୀ ପାଣ୍ଠି ଯୋଗାଣ ମାମଲାରେ ଦିଲ୍ଲୀର ଏକ କୋର୍ଟ ଶୁକ୍ରବାର ଜମ୍ମୁ-କାଶ୍ମୀରର ବାରମୁଲ୍ଲାର ଲୋକସଭା ସାଂସଦ ଇଞ୍ଜିନିୟର ରସିଦଙ୍କ ଜାମିନ ଆବେଦନକୁ ଖାରଜ କରିଦେଇଛନ୍ତି। ଅତିରିକ୍ତ ସେସନ୍ସ ଜଜ୍ ଚନ୍ଦର ଜିତ ସିଂହଙ୍କ "ଜାମିନ ଆବେଦନ ଖାରଜ କରାଯାଉଛି" ବୋଲି କହିଥିବା ସମ୍ବାଦ ସରବରାହ ସଂସ୍ଥା ପିଟିଆଇ ରିପୋର୍ଟ ପ୍ରକାଶ କରିଛି।
ଆତଙ୍କବାଦୀଙ୍କୁ ପାଣ୍ଠି ଯୋଗାଣ ମାମଲାରେ ବେଆଇନ କାର୍ଯ୍ୟକଳାପ (ନିବାରଣ) ଆଇନ ଅନୁଯାୟୀ ୨୦୧୭ ରଶିଦଙ୍କୁ ଏନ୍ଆଇଏ ଗିରଫ କରିଥିଲା। ୨୦୧୯ ଠାରୁ ସେ ତିହାର ଜେଲରେ ଅଛନ୍ତି।
ଏପ୍ରିଲ ୪ ତାରିଖ ପର୍ଯ୍ୟନ୍ତ ଲୋକସଭା କାର୍ଯ୍ୟରେ ଯୋଗ ଦେବା ପାଇଁ ଟ୍ରାଏଲ କୋର୍ଟ ମାର୍ଚ୍ଚ ୧୦ ତାରିଖରେ ଇଞ୍ଜିନିୟର ରଶିଦଙ୍କୁ କଷ୍ଟୁଡି ପାରୋଲ କିମ୍ବା ଅନ୍ତରୀଣ ଜାମିନ ଦେବାକୁ ମନା କରିଦେଇଥିଲେ। ନିମ୍ନ ଅଦାଲତଙ୍କ ଏହି ଆଦେଶକୁ ରଶିଦ ମାର୍ଚ୍ଚ ୧୦ ତାରିଖରେ ଚ୍ୟାଲେଞ୍ଜ କରିଥିଲେ।
ପଢନ୍ତୁ- ବିଜେପି କର୍ମୀ ହତ୍ୟା ଘଟଣାରେ ପି.ବିଜୟନଙ୍କ ସହଯୋଗୀଙ୍କ ଭାଇ ସମେତ ୯ ସିପିଏମ୍ ନେତା ଦୋଷୀ ସାବ୍ୟସ୍ତ
ଏହାର ଜବାବ ଦେଇ ୧୭ ମାର୍ଚ୍ଚରେ ଏନ୍ଆଇଏ କହିଛି ଯେ ରସିଦଙ୍କୁ "କାରାଦଣ୍ଡରୁ ରକ୍ଷା ପାଇବା ପାଇଁ" ସାଂସଦ ଭାବରେ ତାଙ୍କର ସ୍ଥିତି ବ୍ୟବହାର କରିବାକୁ ଅନୁମତି ଦିଆଯାଇପାରିବ ନାହିଁ। ଏଜେନ୍ସି ଯୁକ୍ତି ଦେଇଥିଲା ଯେ ରସିଦଙ୍କୁ ମଧ୍ୟବର୍ତ୍ତୀକାଳୀନ ଜାମିନ କିମ୍ବା କଷ୍ଟୁଡି ପାରୋଲ ଦିଆଯାଇପାରିବ ନାହିଁ। କାରଣ ଆଇନଗତ ହେପାଜତରେ ଥିବା ସମୟରେ ତାଙ୍କର ସଂସଦ ଅଧିବେଶନରେ ଯୋଗଦେବାର କୌଣସି ବଳପୂର୍ବକ ଅଧିକାର ନାହିଁ ବୋଲି ଏଜେନ୍ସି ଯୁକ୍ତି ରଖିଥିଲା।
କାଶ୍ମୀରରେ ସଶସ୍ତ୍ର ଗୋଷ୍ଠୀ ଏବଂ ବିଚ୍ଛିନ୍ନତାବାଦୀମାନଙ୍କୁ ପାଣ୍ଠି ଯୋଗାଇବା ଅଭିଯୋଗରେ ଜାତୀୟ ତଦନ୍ତ ସଂସ୍ଥା ଦ୍ୱାରା ଗିରଫ ହୋଇଥିବା କାଶ୍ମୀର ବ୍ୟବସାୟୀ ଜହୁର ୱାଟାଲିଙ୍କ ବିରୋଧରେ ତଦନ୍ତ ବେଳେ ଇଞ୍ଜିନିୟର ରଶିଦଙ୍କ ନାଁ ଆସିଥିଲା। ଏହି ମାମଲାରେ ଏଜେନ୍ସି ବିଚ୍ଛିନ୍ନତାବାଦୀ ନେତା ୟାସିନ ମାଲିକ, ଲସ୍କର-ଏ-ତୈବା ପ୍ରତିଷ୍ଠାତା ହାଫିଜ୍ ସଇଦ ଏବଂ ହିଜବୁଲ ମୁଜାହିଦ୍ଦିନ ମୁଖ୍ୟ ସୟଦ ସଲାହୁଦ୍ଦିନଙ୍କ ସମେତ ଅନେକ ଲୋକଙ୍କ ବିରୁଦ୍ଧରେ ଚାର୍ଜସିଟ୍ ଦାଖଲ କରିଥିଲା। ମାମଲାର ଶୁଣାଣି ବେଳେ ମଲ୍ଲିକ ଦୋଷ ସ୍ୱୀକାର କରିବା ପରେ ଏକ ଟ୍ରାଏଲ୍ କୋର୍ଟ ୨୦୨୨ରେ ତାଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି।
