ନୂଆଦିଲ୍ଲୀ: କୋଲକାତା ନାଇଟ୍ ରାଇଡର୍ସ ଗୁରୁବାର ଆଗାମୀ ଆଇପିଏଲ୍ ନିଲାମୀ ପୂର୍ବରୁ ରିଟେନ୍ ଖେଳାଳିଙ୍କ ତାଲିକା ଜାରି କରିଥିଲା । ପୂର୍ବ ସଂସ୍କରଣରେ ଚାମ୍ପିୟନ ଟିମର ଅଧିନାୟକ ଶ୍ରେୟସ ଆୟରଙ୍କ ନାଁ କିନ୍ତୁ ରିଟେନ୍ ଲିଷ୍ଟରେ ନଥିଲା । ଏହାକୁ ନେଇ କ୍ରିକେଟ୍ ପ୍ରେମୀଙ୍କ ମଧ୍ୟରେ ଅନେକ ପ୍ରଶ୍ନ ଉଠିଥିଲା । ତେବେ ଏହାରି ଭିତରେ ଶୁକ୍ରବାର କୋଲକାତା ନାଇଟ୍ ରାଇଡର୍ସ ସିଇଓ ବଡ଼ ଖୁଲାସା କରିଛନ୍ତି । ଶ୍ରେୟସ୍ ଆୟର ଫ୍ରାଞ୍ଚାଇଜିଠାରୁ ଅଲଗା ହେବା ପାଇଁ ନିଷ୍ପତ୍ତି ନେଇଥିବା କେକେଆର ସିଇଓ ଭେଙ୍କି ମୈସୁର କହିଛନ୍ତି । କେକେଆର ନିଜ ସ୍କ୍ୱାଡରେ ୬ ଖେଳାଳିଙ୍କୁ ରିଟେନ କରିବା ପାଇଁ ନିଷ୍ପତ୍ତି ନେଇଛି ।
କେକେଆର ସିଇଓ କହିଛନ୍ତି ଯେ ଫ୍ରାଞ୍ଚାଇଜି ଶ୍ରେୟସ ଆୟରଙ୍କୁ ଟିମରେ ରଖିବା ପାଇଁ ଚାହୁଁଥିଲା କିନ୍ତୁ ଶ୍ରେୟସ୍ ଆୟର ନିଜେ ଫ୍ରାଞ୍ଚାଇଜିଠାରୁ ଅଲଗା ହେବା ପାଇଁ ନିଷ୍ପତ୍ତି ନେଇଛନ୍ତି । ଭେଙ୍କି ମୈସୁର କହିଛନ୍ତି, 'ରିଟେନସନକୁ ନେଇ ପରସ୍ପର ମଧ୍ୟରେ ସହମତି ଜରୁରୀ । ଏହା ଏକାତରଫା ନୁହେଁ, କେବଳ ଫ୍ରାଞ୍ଚାଇଜି ପାଖରେ ହିଁ ଅଧିକାର ନଥାଏ, ଖେଳାଳି ବି ଅନେକ ଜିନିଷ ଦେଖିଥାନ୍ତି । ଭିନ୍ନ ଭିନ୍ନ କାରଣରୁ ଅନେକ ଥର ବୁଝାମଣା ହୋଇପାରି ନଥାଏ । ଅନେକ ଥର ଟଙ୍କାକୁ ନେଇ ତ’, ଅନେକ ଥର ଖେଳାଳି ନିଜେ ନିଲାମୀକୁ ଓହ୍ଲାଇବାକୁ ଚାହାନ୍ତି ।'
ଭେଙ୍କି କହିଛନ୍ତି, 'ଏହାଦ୍ୱାରା ନିଷ୍ପତ୍ତି ଉପରେ ପ୍ରଭାବ ପଡ଼ିଥାଏ, ସେ (ଶ୍ରେୟସ ଆୟର) ଆମ ଲିଷ୍ଟରେ ନମ୍ୱର ୱାନରେ ଥିଲେ । ସେ କ୍ୟାପ୍ଟେନ ଥିଲେ ଏବଂ ତାଙ୍କୁ ଦେଖି ଆମେ ଟିମ୍ ଗଢିଥାନ୍ତୁ । ଏଥିପାଇଁ ଆମେ ତାଙ୍କୁ ୨୦୨୨ରେ ଚୟନ କରିଥିଲୁ, ୨୦୨୩ରେ ସେ ଆହାତ ଥିଲେ । ସେ ସୁସ୍ଥ ହୋଇ ଫେରିଲେ ଟିମର ଅଧିନାୟକ ହେବେ ବୋଲି ଆମେ କହିଥିଲୁ । ସେ ଭଲ ପ୍ରଦର୍ଶନ ବି କରିଥିଲେ ଏବଂ ମୋ ସହ ସମ୍ପର୍କ ମଧ୍ୟ ଭଲ ରହିଛି । ତେବେ ଶେଷରେ ଲୋକେ ନିଜ ନିଷ୍ପତ୍ତି ନିଜେ ନେଇଥାନ୍ତି । ଆମେ ଖେଳାଳିଙ୍କୁ ସମର୍ଥନ କରୁଛୁ ।'
କୋଲକାତା ନାଇଟ୍ ରାଇଡର୍ସ ରିଟେନ କରିଥିବା ଖେଳାଳି:
ସୁନୀଲ ନାରିନ (୧୨ କୋଟି)
ରିଙ୍କୁ ସିଂ (୧୩ କୋଟି)
ଆଣ୍ଡ୍ରେ ରସେଲ (୧୨ କୋଟି)
ବରୁଣ ଚକ୍ରବର୍ତ୍ତୀ (୧୨ କୋଟି)
ରମଣଦୀପ ସିଂ (୪ କୋଟି)
ହର୍ଷିତ ରାଣା (୪ କୋଟି)
